Kryeministri Hashim Thaçi ka kërkuar nga Kryesia e Kuvendit që ta vë në rend dite votimin për themelimin e Forcave të Armatosura të Kosovës. Ai tha se kjo është një mundësi historike e cila nuk duhet të humbet.

Këto komente, ai i bëri në mbledhjen e Qeverisë, në të cilën u miratua edhe Projektligji për ndryshimin dhe plotësimin e ligjeve që kanë të bëjnë me FSK-në, si dhe projektligji për mbrojtjen juridike dhe mbështetjen financiare të personave të potencial në proceset pranë gjykatës speciale.

Aleanca për ardhmërinë e Kosovës, ka reaguar ndaj aktiviteteve të kryeministrit të Kosovës, Hashim Thaçi, sidomos “premtimeve” të tij rreth arsimit, gjatë aktiviteteve të fundit nëpër Kosovë.
“Të gjithë tanimë e dinë se gjendja në arsimin e Kosovës, me qeverisjen Thaçi nga viti 2008, ka shënuar degradim të përmasave të papara deri më tani”, thuhet në kumtesën e AAK-së.

Kjo për faktin se sipas AAK-së, sot në universitetin më të madh të vendit, në Universitetin e Prishtinës, në një metër katror, i ndjekin studimet 4 studentë, kurse rangimi i tij në vendin e 8066 në mesin e 22 mijë universiteteve, flet për prioritetet e kryeministrit në këtë fushë dhe për “kontributin” e pakontestueshëm të Qeverisë së Kosovës .

“Është e qartë se dëshira që me çdo kusht ta fitojë edhe mandatin e tretë, ia ka turbulluar mendjen. Në fushën e bujqësisë, veterinarisë dhe përpunimit të ushqimit, që është prioritet i Kosovës, studimet i ndjekin 4 për qind të studentëve, kurse në fushën e gjeologjisë, xehetarisë dhe metalurgjisë, ku Kosova ka resurse më të mëdha në rajon, më pak se 4 për qind”, përfundon komunikata.

Forumit Transparenca në Prizren, I ka bërë thirrje kryetarit të Komunës, Ramadan Mujës, që t’i rihapë takimet e Ekzekutivit.

Përfaqësuesja e Forumit Transparenca, Elmedina Baxhaku tha se kryetari i Komunës së Prizrenit edhe në mandatin e tij të tretë të qeverisjes vazhdon praktikën e takimeve të mbyllura me drejtorët.

“Mbyllja e takimeve të ekzekutivit ka qenë njëra ndër veprimet më kundërthënëse dhe njëkohësisht më dëmtuese për demokracinë lokale, që është ndërmarrë në mandatit e dytë të kryetarit. Që nga marrja e një vendimi të këtillë, asnjëherë nuk është dhënë një arsyetim i artikuluar dhe bindës për arsyeshmërinë e kësaj mbylljeje”, tha Baxhaku.

“Kjo praktikë, e cila bie ndesh me parimet themelore të qeverisjes transparente është dëshmia më e mirë se komuna e Prizrenit po dështon në promovimin e standardeve të qeverisjes së mirë. Në takimet e kryetarit të komunës me drejtorët komunalë, merren vendimet më të ndieshme rreth menaxhimit të buxhetit komunal”

“Forumi Transparenca shpreh pakënaqësinë dhe mospajtimin e vet në lidhje me pamundësinë e mediave, organizatave të shoqërisë civile dhe qytetarëve për të marrë pjesë në takimet e kryetarit të komunës me drejtorët komunalë. Kjo mbyllje e vendimmarrjes komunale është pengesë direkte ndaj punës së këtyre akterëve, të cilët kanë për qëllim rritjen e informimit publik”.

“Për këtë arsye, Forumi Transparenca i bën thirrje kryetarit të komunës së Prizrenit që sa më parë të anulojë vendimin për mbylljen e takimeve të ekzekutivit dhe t’i rihapë ato duke u mundësuar pjesëmarrjen gazetarëve, monitoruesve të shoqërisë civile dhe qytetarëve. Çdo vonesë e kryetarit të komunës për realizimin e kësaj kërkese është dështim për të promovuar një standard elementar të qeverisjes transparente dhe cënim i së drejtës së qytetarëve për informim”.

“Forumi ‘Transparenca’ është trup joformal i përbërë nga aktivistë të shoqërisë civile dhe gazetarë të Prizrenit, të cilët janë aktiv në fushën e qeverisjes demokratike dhe misioni i tij është koordinimi i veprimeve të këtyre akterëve për të rritur nivelin e transparencës dhe llogaridhënies së qeverisjes lokale të Prizrenit”./PrizrenPress.com/

,

Pas arrestimit të shefit të verifikimit në Agjencionin Kosovar të Inteligjencës, mësohet se policia e Kosovës ka arrestuar edhe Rushit Halitin, drejtor i shkollës së mesme në Skenderaj.

Sipas Indeksonline, Haliti dyshohet se është i përfshirë në dhënien e diplomës, për ish-shefin e verifikimit në AKI, Isuf Lumi.

Kryetari i Malishevës, Ragip Begaj, në kuadër të aktiviteteve të tij dhe përmbushjes së premtimit, se brenda gjashtë muajve të parë, të zbresë në fshatra për ti takuar banorët, gjatë mbrëmjes së djeshme, ka takuar banorët në fshatin Kërvasari dhe Pagarushë, me të cilët ka biseduar për hallet dhe problemet që kanë si fshatra, si dhe i ka njoftuar aktivitetet e qeverisë komunale.

Fillimisht kryetari Begaj dhe drejtori i shëndetësisë, Hajdin Berisha, i kanë njoftuar banorët e këtyre fshatrave për angazhimin e Komunës së Malishevës, në luftimin dhe parandalimin e Etheve Hemorragjike Krime Kongo (EHKK) dhe rolin e komunës në zbatimin e strategjisë kombëtare për kundër EHKK, si dhe i kanë njoftuar për aksionin e komunës, për largimin e mbeturinave. Me këtë rast kryetari Begaj, ka kërkuar edhe ndihmën e banorëve për largimin e mbeturinave dhe ruajtjen e ambientit, si dhe ka kërkuar që të futen në sistemin e menaxhimit të mbeturinave.

Nga ana tjetër, banorët e Kërvasarisë, duke paraqitur kërkesat për nevojat e tyre, thanë se prioritet dhe emergjencë është ndërtimi i kanalizimit, i cili në fakt ka filluar të ndërtohet, pasi punimet janë duke vazhduar, pastaj rruga për lagjen Kodrali, për të cilën po ashtu morën premtimin e kryetarit për ndërtimin e kësaj rruge, si dhe largimi i mbeturinave, sipas banorëve është e domosdoshme.

Edhe në Pagarushë, largimi i mbeturinave doli një prej problemeve kryesore, si dhe ndërtimi i kanalizimit për katër lagje të fshatit, pastaj edhe largimin e derdhjes së kanalizimit në varrezat e fshatit. Nevojë tjetër për fshatin është edhe ekzistimi i një barnatoreje, pasi kanë shërbimin mjekësor, por nuk kanë barnatore.

Një problem jetik për fshatin është edhe sigurimi i ujit për pije, apo ndërtimi i ujësjellësit, për çka morën premtimin e kryetarit Begaj, se shumë shpejt do të bëhen shpime dhe hulumtime për gjetjen e ujit, edhe pse konfiguracioni i fshatit është shumë i vështirë./PrizrenPress.com/

Numri i qytetarëve të Kosovës, të cilët kanë emigrue në vende të ndryshme të botës, simbas raportit t’Agjencisë së Statistikave të Kosovës të publikuem t’Ejten, asht mbi 700 mijë persona.
Në kuadër të kësaj shifre, janë fut edhe fmijët e lindun jashtë vendit.

Shteti ku ma së shumti kanë emigrue kosovarët asht Gjermania me 35.25 për qind, e pasueme nga Zvicra me 22.94 për qind.

Raporti i titulluem “Migrimi kosovar”, asht përgatit për herë të parë dhe paraqet të dhana për migrimin ndërkombëtar dhe atë kombëtar.

Ky raport përmban aspektin demografik dhe atë socio-ekonomik të migrimit.