Kryeministri i vendit, Hashim Thaçi deklaroi të enjten se edhe pse është çështje plotësisht e padrejtë dhe fyerje për shtetin e Kosovës, Kuvendi i Kosovës duhet ta marr vendimin lidhur me themelimin e Tribunalit për krimet e supozuara të luftës së fundit në Kosovë.

Thaçi tha se kurdo që e procedon Kryesia e Kuvendit, partitë politike do të jenë prezentë në Kuvend dhe do të shqyrtohen të gjitha mundësitë që t’i jepet një përgjigje adekuate dhe meritore.

“Jemi takuar me spektrin politik kosovar, kemi biseduar me partnerët tanë ndërkombëtar. Kurdo që e procedon Kryesia e Kuvendit, partitë politike do të jenë prezentë në Kuvend dhe do të shqyrtohen të gjitha mundësitë që t’i japim një përgjigje adekuate dhe meritore dhe të përgjegjshme në raport me shtetin dhe interesat e qytetarëve, në bashkëpunim të ngushtë me Shtetet e Bashkuara të Amerikës dhe Bashkimin Evropian. E kam theksuar edhe më herët, se mes dy opsioneve, tani ka mbetur një opsion. Edhe pse kjo çështje është plotësisht e padrejtë dhe fyerje për shtetin e Kosovës, Kuvendi i Kosovës duhet ta marr vendimin”, deklaroi kryeministri Thaçi.

Deklarata të pamatura dhe tendencioze, i ka quajtur Drejtori i Departamentit për operacione, Rashid Qalaj, deklarimet e kryetarit të Komisionit për mbikëqyrjen e Agjencisë Kosovarë të Inteligjencës, Florin Krasniqi, e cila sipas Qalaj, ka për qëllim njollosjen e Policisë së Kosovës.

Qelaj në një konferencë për medie thotë se Policia e Kosovës në asnjë moment nuk do të veprojë sipas agjendave të individëve të caktuar.

“Zoti Krasniqi tenton ta sulmojë Policinë e Kosovës. Ne e ftojmë zotin Krasniqi, që për çdo informatë që ka, për cilindo individ, për cilindo pjesëtarë të Policisë së Kosovës, të vijë në Policinë e Kosovës, të shkojë në Inspektoratin Policor të Kosovës, në prokurorinë më të afërt edhe ta denoncoj”, thotë Qalaj,

Një ditë më parë, Florin Krasniqi, ka thënë se një pjesë e vogël e Njësisë Speciale të Policisë së Kosovës, janë pjesë e krimit të organizuar në Kosovë.

“Unë e kam thënë disa herë se një pjesë e vogël e njësisë speciale të Policisë së Kosovës, janë pothuajse krimi i organizuar në Kosovë, ata bëjnë bartjen e pareve, bartjen e drogave, ata janë baza e krimit. Krejt esenca e ligjit është me i largu ata njerëz. Në qoftë se nuk arrijmë me i largu kriminelët prej policisë dhe rendit publik atë herë ne kemi shumë problem”, ka thënë Krasniqi.

E sa i përket asaj se Komisioni për Mbikëqyrjen e Agjencisë së Kosovës për Inteligjencë ka pranuar 17 ankesa nga zyrtarë të institucioneve të ndryshme lidhur me procedurën e verifikimit nga Departamenti i Verifikimit të AKI-së, Qalaj thotë se asnjë epror nga Njësitë Speciale të Kosovës nuk ka, që nuk e ka kaluar verifikimin.

Në Gjykatën Themelore në Prizren vazhdoi seanca gjyqësore në rastin e Reshtanit, ndaj 15 të akuzuarve për rrahjen masive mes vëllezërve, nipave e dajallarëve, ku mbeti i vdekur Burim Kryeziu. I akuzuari për vrasje Enver Kryeziu tregoi rrëfimin e tij.

Enver Kryeziu, pjesëmarrës i rrahjes në Reshtan të Suharekës më 2 gusht të vitit 2012 tregoi në gjykatë atë që tha se e mban mend nga rrahja mes të afërmve.

Atë ditë, djemtë e dy vëllezërve që janë edhe fqinjë, u përleshën ndërmjet vete me mjete të forta, ndërsa si pasojë e kësaj rrahjeje, Burim Kryeziu vdiq pas një jave në spital, ndërsa shumë nga të rrahurit mes vete pësuan lëndime serioze.

Enver Kryeziu që të vrarin e ka djalë të xhaxhait, tha se raportet mes familjes së tij dhe asaj të xhaxhait kanë qenë shumë të mira, ndërsa sipas tij dajallarët nuk kanë shkuar mirë me xhaxhanë e tij Nuhi Kryeziun, për arsye që ai nuk i dinte.

Ai tregoi se ka punuar në Itali, ndërsa atje ka qenë bashkë me tre djemtë e xhaxhait, mes tyre edhe me Burim Kryeziun, tash të ndjerë.

Pronat e dy vëllezërve Kryeziu, Jonuzit e Nuhiut i ndan vetëm një mur, ndërsa në fjalën e tij para gjykatës Enver Kryeziu tha të ketë parë mbi këtë mur djemtë e xhaxhait Nuhi, duke kërcënuar Bajram Shalën, nipin e tyre.

Në seancën e mbajtur të hënën, nipi tjetër i Kryezinjve, Fadil Shala tregoi se ditën kritike ka pranuar një telefonatë që e njoftonte se vëllai i tij Bajrami ishte në rrezik nga djemtë e Nuhi Kryeziut.

Pastaj sipas tij, ai me babanë Izet Shalën ishin nisur drejt shtëpive të dajallarëve.

Enver Kryeziu më tutje tha se sherri kishte nisur mes djemve të xhaxhait dhe nipave, ndërsa shtoi se familja e tij vetëm kishte shikuar zhvillimet e ngjarjes, duke u munduar ta qetësojë situatën.

Ai tregoi ta ketë parë Fadil Shalën duke e goditur të ndjerin Burim Kryeziu, me një copë druri, ku nga goditja sipas tij ka rënë në tokë i ndjeri.

Për vrasjen në bashkëkryerje të Burim Kryeziut po akuzohen Fadil Shala dhe Jonuz, Enver e Artan Kryeziu.

Deklarata e Enver Kryeziut, e dhënë të mërkurën në gjykatë, dalloi nga ajo që i njëjti e kishte dhënë në prokurori.

Prokurorja Ervehe Gashi disa herë e ballafaqoi Enver Kryeziun me deklaratat e tij të mëhershme, duke nxjerrë përgjigje të paqarta nga i akuzuari. Disa herë gjatë seancës trupi gjykues reagoi duke i kërkuar të akuzuarit qartësim të përgjigjeve.

Seanca tjetër do të mbahet të enjten, ndërsa pritet të merret në pyetje Jonuz Kryeziu./Gazeta Jeta ne Kosove/

Kryesia e Partisë Demokratike të Kosovës do të mblidhet në ora 13:00, ku në agjendë është vetëm një pikë; unifikimi i qëndrimit të partisë për Gjykatën Speciale, e cila do të merret me krimet e supozuara të UÇK’së, thonë burime të Gazetës Express.
Hashim Thaçi ka vendosur ta mbledh organin ekzekutiv të partisë së tij, pasi që të mërkurën Parlamenti i Kosovës duhet të votojë për këtë gjykatë.

“Besojmë se Kryesia e PDK’së do t’i jap mbështetje krijimit të Gjykatës”, tha një zyrtar i PDK’së në kushte anonimiteti për Express.

Dje, Gazeta Express botoi pikat kryesore të kërkesës së vendeve të Quintit për lidershipin kosovar, e ku iu kërkohet të votohet Gjykata Speciale.

Ndërkohë sot, sipas burimeve ndërkombëtare të gazetës, është vendosur që të mërkurën të votohet për këtë çështje. Ende mbetet e paqartë nëse do të sigurohen 80 votat e nevojshme të ligjvënësve.

Express do t’iu mbajë të informuar gjatë ditës për gjitha zhvillimet rreth teme.

Besojmë se Kryesia e PDK’së do t’i jap mbështetje krijimit të Gjykatës”.

Lidhja Demokratike e Kosovës(LDK) në Prizren, ka reaguar për gjendjen e rënduar të energjisë elektrike.

Përfaqësuesi i Komisionit për Informim Abdullah Thaçi tha se përveç reduktimeve të ashpra në zonën urbane të qytetit gjendja alarmante rezulton të jetë në zonat rurale.
“Dega e Lidhjes Demokratike të Kosovës në Prizren bartë shqetësimin e banorëve të harruar të fshatrave të Anadrinisë .Sot është dita e tretë që fshatra të tëra janë në terr ku as që ka ndonjë shpjegim nga KEDS-it për këtë problematikë e cila është shumë jetike”.

“Pas reduktimeve të ashpra në këtë kohë, zona të tëra të territorit të komunës së Prizrenit përveç që janë pa rryme, sot në mungesë të energjisë elektrike ata kanë ngel edhe pa ujin e pijes. Kjo nga fakti se furnizimi me ujë të atyre zonave bëhet me pompa të cilat funksionojnë me energji elektrike”.

“Lidhja Demokratike e Kosovës kërkon që urgjentisht të ketë ndërhyrje institucionale dhe qytetarëve tu mundësohet të jetojnë dinjitetshëm”.

“Lidhja Demokratike e Kosovës kërkon përgjegjësi nga KEDS-i dhe për neglizhenca të tilla të bëhet penalizmi ligjor i distribucionit të furnizimit”./PrizrenPress.com/