Për kreun e Kuvendit të Kosovës, Shoqata e Veteraneve të Luftës Çlirimtare nuk e ka asnjë arsye të kërcënoj me protestë, pasi sipas tij, miratimi i ligjit një javë para a prapa, pak ka rëndësi. Sipas tij, problemi do të mbetet, sa e si do t’i zgjidh problemet e veteranëve të luftës çlirimtare, shuma e parave që ata do ta marrin në muaj.

Kryeparlamentari i ka bërë rezyme seancës të së enjtes. Në një status të gjatë në Facebook, kreu i Kuvendit të Kosovës ka përthekuar tri pika të rendit të ditës të kësaj seance. E atë e ka postuar në profilin e tij.

“Në pikën e parë të rendit të ditës, sot është diskutuar një çështje më shumë se serioze, siç është siguria e jetës së njerëzve, është fjala për vrasjet në Pejë. Unë jam i bindur se çështje të tilla meritojnë dhe kërkojnë një trajtim më serioz. Konflikti në mes familjes Elshani dhe Kelmendi është më shumë se i dhimbshëm”, ka shkruar Krasniqi, për të cilin, këtu shtrohen domosdo dy pyetje.

“E para, institucionet e sigurisë kombëtare a i kanë kryer të gjitha obligimet e veta, konform ligjeve në fuqi? dhe e dyta, shoqëria shqiptare në përgjithësi, a i ka bërë përpjekjet e duhura për të ndihmuar në ndonjë formë të ndërmjetësimit në mes familjeve në fjalë?”, ka pyetur ai.

Përgjigje, natyrisht, u ka dhënë vetë.

“As mediat si pushtet i katërt nuk duket se kanë bërë të mundshmen, përkundrazi kanë heshtur shumë.
Një gjë është e sigurt, kjo shkallë e pa sigurisë që mbretëron që sa vjet në qytetin e Pejës duhet të ndërpritet. Qytetarët e Pejës nuk e meritojnë ketë nivel të pa sigurisë, as familjet në fjalë nuk e meritojnë ketë gjendje lufte të pa kuptimtë”, ka thënë Krasniqi.

“Zgjedhjen e Avokatit të popullit e përsëritëm. Përsëritja, ndodhi për shkak të paqartësive që u shkaktuan nga interpretime të ndikuara nga grupe apo individ që me çdo kusht kërkonin zgjedhjen e të preferuarit të tyre.

E përsëritëm votimin për të bindur opinionin se nuk ekzistonte vullneti për t’i zgjedhur kandidatet e propozuar nga Komisioni funksional”.

Në pikën e tretë, Krasniqi ka folur për diskutimet për Ligjin e Veteranëve të Luftës Çlirimtare, që të radhitej në rend të ditës, e që për të ishte i pa kuptimtë.

“Ligji për tu radhitur në rendin e ditës, është dashur të bënim shmangien nga Rregullorja e Punës së Kuvendit e jo të diskutohej se çka duhet të përmbante ligji. Ky diskutim duhet të behej vetëm pasi Ligji të hynte në rend të ditës. Arsyeja pse Ligji nuk hyri në rend të ditës ishte e pakuptimtë”.

“Sido që të jetë, Ligji në fjalë i plotëson të gjitha kushtet për t’u renditur në seancën e radhës me amendamentet e propozuara pa pasur nevojë të bëjmë shmangie nga Rregullorja e Punës se Kuvendit”, shkruan Krasniqi.

“Shoqata e Veteraneve të Luftës Çlirimtare nuk e ka asnjë arsye të kërcënoj me protestë, pasi miratimi i ligjit një javë para a prapa pak ka rëndësi. Problemi do të mbetet, sa e si do t’i zgjidhë problemet e veteranëve të luftës çlirimtare, shuma e parave që ata do ta marrin në muaj?”, ka përfunduar ai.

Thaçi nuk pranon se ka nisur fushatën elektorale. Ai i ka quajtur obligime të tij institucionale, për t’i shërbyer qytetarëve të vendit, shtimin e aktiviteteve e ditëve të fundit, kur po viziton çdo cep të vendit. Megjithatë, në Rubikon të KTV-së, kryeministri Thaçi ka thënë se rritja e aktivitetit të secilës parti në kohën e parazgjedhjeve është krejt normale.

Kryeministri nuk ka pranuar të flas për kohën që do t’i përshtatej më së shumti partisë së tij për zgjedhje. Por ka thënë se nuk do e kishte problem për asnjërën prej muajve që partitë koordinohen për të mbajtur zgjedhjet.

“Koha për organizimin e zgjedhjeve duhet të dalë nga takimi i liderëve të partive politike. Ne jemi dakorduar që të shkojnë në një datë të koordinuar, dhe kjo nuk i takon si monopol askujt”, ka thënë Thaçi. “Jemi pajtuar me të gjithë liderët që jam takuar. Nuk kemi pasur takim me Vetëvendosjen, por besoj se do të jenë në vijë me gjithë spektrin politik”.

Ai ka garantuar se të gjithë punëtorët pagat do t’i marrin me rritje për muajin prill, me 1 maj. Teksa ka përsëritur premtimet për rritje pagash për minatorët, punëtorët e KEK-ut, e rritje pensionesh.

“Deri në fund të mandatit tim do të ketë rritje 100 për qind të pagave, ngase çdo vit të mandatit do të rrisim pagat për 25 për qind”.

Deputeti i Lidhjes Demokratike të Kosovës, Muhamet Mustafa, ka sqaruar opinionin publik në lidhje me votimin e sotëm në Kuvendin e Kosovës për Ligjin e veteranëve të luftës së UÇK-së.

Ai thotë se sot nuk u votua pro dhe kundër këtij Ligji, por kundër ndarjes së veteranëve, pasi që Grupi Parlamentar i LDK-së kërkon amandamentimin e tij për të futur edhe kontributin e luftëtarëve të formacionit të FARK-ut që asokohe ka qenë nën direktivat e kryeministrit të atëhershëm në ekzil, Bujar Bukoshi.

“Disa postime po dezinformojnë se kinse sot një pjesë e deputetëve, sidomos ata të LDK, kanë votuar kundër Ligjit për veteranët e UÇK-së. Kjo nuk është e vërtetë. Votimi nuk ka qenë pro apo kundër ligjit, po lidhur me anashkalimin e rregullores për futje në rend dite sot apo javën e ardhme”, ka deklaruar deputeti Mustafa, raporton RTK.

Mustafa ka theksuar se një pjesë e deputetëve kanë menduar se është më mirë të lihet edhe pak kohë, deri në javën që vjen, që ligji të përmirësohet në interes të veteranëve, pasi, sipas tij, ka amendamente të tilla.

“Sidomos duhet të kemi kujdes që ky ligj të ketë qasje unifikuese e jo përparëse, sepse gjithë luftëtarët e lirisë kanë luftuar për lirinë e Kosovës e jo për interesa të ngushta që edhe sot ndajnë luftëtarët që ranë heroikisht dhe ata që kambanë gjallë”.

“Prandaj nuk duhet të amputohet kjo si votë kundër Ligjit. Për vonesa le të përgjigjen ata që e vonuan Ligjin që paku gjashtë vjet, e që sot po nguten e improvizojnë dhe nuk kanë gatishmëri që të unifikojnë gjithë luftëtarët e lirisë”, ka shtuar deputeti i LDK-së, Muhamet Mustafa.

Kryetari i Organizatës së Veteranëve të Luftës së Ushtrisë Çlirimtare të Kosovës, Muharrem Xhemajli, i pyetur për kërkesën e Lidhjes Demokratike të Kosovës, që në Projektligjin për veteranët e luftës të përfshihen edhe ish-pjesëtarët e Ministrisë së Mbrojtjes të Republikës së Kosovës (Forcat e Armatosura të Republikës së Kosovës – FARK), thotë se në luftën e Kosovës janë ballafaquar dy palë: ushtarët e UÇK-së përballë forcave policore dhe ushtarake të Serbisë.

“Më vonë është ndihma e cila ka ardhur nga forcat e NATO-s”, ka thënë Xhemajli për Telegrafin, duke shtuar se është “e papranueshme tendenca që dikush tjetër, përveç ushtarëve të UÇK-së, të përfitojë nga Ligji për veteranët e luftës”.

Ndryshe, OVL e UÇK-së javën tjetër ka paralajmëruar se do të protestojë para Kuvendit të Kosovës, nëse Kryesia e Kuvendit nuk e vendos në rend të ditës Projektligjin për veteranët.

Rusia duhet të ndalojë së përdoruri rastin e pavarësisë së Kosovës nga Serbia për të arsyetuar inkursionin e saj në Krime për shkak se këto të dyja nuk mund të krahasohen, ka thënë kryeministri i Kosovës, Hashim Thaçi, në një intervistë për Reuters.

Thaçi thotë se ngjarjet që çuan në pavarësinë e Kosovës më 2008 nuk kanë asnjë ndërlidhje me ngjarjet në Ukrainë.

“Në asnjë rrethanë rasti i Kosovës nuk mund të krahasohet me rastin e Krimesë. Kosova është rast unik. Komuniteti ndërkombëtar intervenoi pas gjenocidit të Serbisë”, ka thënë Thaçi për Reurters.

“Ne asnjëherë nuk kemi kërkuar që të shkëputemi nga një vend dhe t’i bashkohemi një tjetri”.

“Qasja e ndryshimit të kufijve dhe aneksimit të territoreve nga një vend tjetër është qasje e gabuar dhe mund të ketë pasoja për të gjithë botën”, ka theksuar më tej ai.

Kujtojmë se në luftën e Kosovës janë të vrarë mbi 12 mijë persona, shumica prej tyre shqiptarë, ndërkaq u zhvendosën nga shtëpitë e tyre afër 1 milion tjerë.

Reuters shkruan se Thaçi sot shihet si fytyra pro-perëndimore e Kosovës, me përkrahjen e Uashingtonit dhe shumicës së shteteve anëtare të BE-së.

Lideri rus, Vladimir Putin ka kritikuar shtetet perëndimore për, siç e ka quajtur ai, “hipokrizi”, duke thënë se ata e kanë pranuar të drejtën e Kosovës për vetëvendosje dhe pavarësi nga Serbia, por tani ia mohojnë krimeasve të drejtën për t’u shkëputur nga Ukraina.

Lëvizja Vetëvendosje! gjendjen e krijuar në Prizren e vlerëson si të pashembullt. Anëtarët e VV-së në KK të Prizrenit, janë shprehur edhe një herë se nuk mund të vazhdojë punën kryetari i dënuar Ramadan Muja.

“Pas rrethanave të krijuara në Komunën e Prizrenit, në mbledhjen e jashtëzakonshme të thirrur nga 17 këshilltarët e opozitës në Kuvendin Komunal të Prizrenit, koalicioni në krye me PDK-në ka braktisur sallën duke e pamundësuar debatin mjaft të rëndësishëm për gjendjen e krijuar pas dënimit të kryetarit të komunës”

“Menjëherë pas fjalimit të shefit të grupit parlamentar të PDK-së, kryesuesi i Kuvendit Komunal, Kujtim Gashi, me arsyetimin e mungesës së kuorumit shpalli të mbyllur seancën pavarësisht se qëllimi i thirrjes së mbledhjes së sotme ishte debati mbi gjendjen e krijuar, dhe jo marrja e ndonjë vendimi”.

“Lëvizja Vetëvendosje! shpreh keqardhje për gjendjen në të cilën ky pushtet e ka katandisur Komunën e Prizrenit dhe dënon këtë papërgjegjësi të pozitës. Konsiderojmë se debatet për çështjet që kanë rëndësi për qytetarët, janë element fondamental i demokracisë dhe u pengojmë vetëm zaptuesve të pushtetit”.

“Gjendja e krijuar në Komunën e Prizrenit, është e pashembullt. Në gjithë historinë e pushtetit lokal te kësaj komune, vetëm në përjashtim të kohës se aparteidit dhe rrethanave të luftërave në të kaluarën nuk është regjistruar ndonjë rast si ky i degjenerimit dhe degradimit të pushtetit. Dhe kjo gjë i ndodhi Prizrenit pikërisht në kohën e qeverisjes së PDK-së përmes Ramadan Mujës”.

“Lëvizja Vetëvendosje! konsideron se i dënuari Ramadan Muja nuk mund ta vazhdoj detyrën e tij. Ai gëzon të drejtën e garantuar kushtetuese dhe ligjore për apelim të vendimit të gjykatës, mirëpo jo edhe të drejtën morale që të vazhdoj të jetë kryetar i këtij qyteti Ai menjëherë duhet të dorëhiqet nga funksionet publike dhe betejën e tij me drejtësinë ta vazhdoj pa i mbajtur peng mbi 170.000 mijë qytetarë të Komunës së Prizrenit”

Lëvizja Vetëvendosje! në Prizren, të vetmen rrugëdalje nga kjo situatë e sheh tek dorëheqja e menjëhershme e tij dhe shpallja e zgjedhjeve të jashtëzakonshme. Ndëshkimi ligjor i Ramadan Mujës, merr kuptim vetëm kur pasohet me ndëshkimin elektoral të subjektit që e kandidoi./PrizrenPress.com/