Komisioni Qendror i Zgjedhjeve nënshkroi marrëveshje bashkëpunimi me Ministrinë e Drejtësisë, me qëllim të lehtësimit të procedurave për votim për të gjithë ata persona me të drejtë vote që gjenden në shërbimin korrektues të Kosovës. Momentalisht janë 1 mijë e 800 persona të paraburgosur dhe burgosur që kanë të drejtë vote.

Ashtu si parashihet me ligjin për zgjedhjet lokale dhe të përgjithshme në Republikën e Kosovës, Komisioni Qendror i Zgjedhjeve nënshkroi marrëveshje bashkëpunimi me Ministrinë e Drejtësisë, për lehtësimin e procedurave për votim të të gjithë atyre personave të paraburgosur dhe burgosur. Kryetarja e KQZ Valdete Daka, falënderoi Ministrinë e Drejtësisë për këtë bashkëpunim.

“Në kuadër të ligjit për zgjedhjet e përgjithshme dhe ato lokale është mundësuar të gjithë atyre personave që janë me nevoja të veçanta dhe kushte të veçanta që ta ushtrojnë ë të drejtën e tyre, që të votojnë dhe në këtë rast kemi të bëjmë me të burgosurit dhe të paraburgosurit që do të mundësohet dhe do të ju plotësohen të gjitha kushtet që ta ushtrojnë këtë të drejtë që të votojnë gjë që ju garantohet edhe me Kushtetutë edhe me Ligjin për zgjedhjet e përgjithshme”, theksoi ajo, transmeton RTK.

Ndërsa Ministri I Drejtësisë Hajredin Kui tha se është mirë që të respektohen të drejtat e gjithë qytetarëve për ta ushtruar të drejtën për vote.

“Unë premtojë që Ministria e drejtësisë do të ofrojë të gjitha të dhënat për të gjithë të burgosurit dhe të paraburgosurit me kohë. Natyrisht se do të krijuojë edhe kushte adekuate që ata të votojnë në mënyrë të ligjshme, demokratike në mënyrë sekrete dhe gjithmonë duke respektuar të drejtën e tyre si qytetarë të republikës së Kosovës që të marrin pjesë në vendimmarrje për të ardhmen e tyre qoftë në nivelin lokal apo qendror”, tha ai.

Në Kosovë janë afro 1 mijë e 800 persona në qendër të paraburgimit apo te burgimit të Shërbimit Korrektues të Kosovës të cilët do të votojnë në ditën e zgjedhjeve me 3 nëntor.

Kryetarët aktualë të disa komunave të Kosovës, të cilët garojnë në zgjedhjet lokale të 3 nëntorit, kanë ndezur “motorët” ditëve të fundit në realizimin e projekteve infrastrukturore edhe në viset më rurale, duke synuar kështu marrjen e “kokrrave” të këtyre banorëve.

Shumë projekte që nuk janë realizuar për më shumë se tre vjet mandat të këtyre kryetarëve, kanë filluar të realizohen një muaj e gjysmë para organizimit të zgjedhjeve lokale, shkruan Zëri.

Vetëm gjatë ditës së hënë (16 shtator 2013), Komuna e Prizrenit që udhëhiqet nga Ramadan Muja, ka përzgjedhur shtatë kompani për realizimin e projekteve të ndryshme infrastrukturore, përkatësisht rrugë, ujësjellës dhe kanalizim, etj.

Për shkak të rëndësisë që ka kjo komunë për partinë e kryeministrit Hashim Thaçi, të cilën madje e ka quajtur ky i fundit si Jerusalem i PDK-së, Qeveria është treguar shumë “dorëlirë” në aprovimin e projektit për Prizrenin.

Në ueb faqen zyrtare të Komisionit Rregullativ të Prokurimit Publik(KRRPP) janë publikuar fituesit e tenderëve publikë të komunës që udhëhiqet aktualisht nga Ramadan Muja, i cili po ashtu është kandidat i PDK-së për zgjedhjet e ardhshme lokale.

Në Dubovc të Vushtrisë kanë filluar gërmimet në një hapësirë të dyshuar për varrezë masive. Pjesëtarë të FSK-së, policisë së Kosovës, EULEX-it si dhe specialistët e mjekësisë ligjore, janë duke mbikëqyrur këto punime, transmeton RTK.

Kryetari i Komisionit qeveritar për të pagjeturit, Prenk Gjetaj tha se gjatë muajit mars janë marrë informacionet e para për vendin e dyshuar për varrezë masive në bodrumet e ish stacionit policor në Dubovc.

Një rast i paprecedent ka ndodhur në fshatin Zllakuqan të komunës së Klinës, kur policia ka gjetur një kuti votimit që besohet se i takon procesit zgjedhor të mbajtur më 17 nëntor të vitit 2010. Burime të sigurta të gazetës Tribuna brenda Policisë rajonale në Pejë, kanë bërë të ditur se kjo kuti është gjetur në këtë fshat pas pranimit të informacioneve nga një qytetar.

“Kutia është gjetur të dielën. Për momentin janë duke u zhvilluar hetimet se cilës qendër të votimit i takon apo nga kush është fshehur dhe rrethana të tjera”, ka thënë ky burim. Por zyrtarisht për këtë çështje askush nga policia nuk ka dashur të flasë. Të kontaktuar nga gazeta si në Prishtinë dhe në Pejë, zëdhënësit e zyrave përkatëse kanë thënë se nuk kanë informacione,shkruan Tribuna

“Aktualisht nuk jemi në dijeni për këtë çështje“, ka thënë zëdhënësi Brahim Sadria, derisa përgjigje pothuajse të njëjtë ka dhënë edhe zëdhënësi i policisë për rajonin e Pejës, Teki Sylaj. Në Komisionin Qendror të Zgjedhjeve, kanë bërë të ditur se ende një rast i tillë nuk është raportuar…

Kandidati i Lëvizjes Vetëvendosje! për kryetar të Prizrenit, Arbër Rexhaj, ka vizituar Fabrikën e Letrës “Vëllezërit Nezaj” në Ramajë. Ai u njoftua për së afërmi me punën prodhuese të kësaj ndërmarrjeje si dhe vështërsitë me të cilat ballafaqohet.

Sipas tij, mungesa e mbështetjes institucionale si dhe neglizhenca e vazhdueshme e pushtetit lokal ka bërë që ndërmarrjet prodhuese vendore të katandisen në gjendje të vështirë.

Duke prezantuar konceptin politik dhe ekonomik të Lëvizjes Vetëvensoje! Rexhaj tha se zhvillimi i sektorit prodhues në ekonominë vendase paraqet shtyllën kryesore të alternativës sonë. “Mbështetja, subvencionimi dhe lehtësirat tatimore për këto ndërmarrje paraqesin interes jetik jo vetëm të zhvillimit të bizneseve në fjalë, por edhe zhvillimit të përgjithshëm ekonomik dhe shoqëror të komunës sonë”, tha Rexhaj./PrizrenPress.com/