Jakup Krasniqi nuk është duke u ndier komod në pozitën e kreut të Kuvendit të Kosovës. Bile, thotë se kjo pozitë, e cila ligjërisht i takon PDK-së, veç është duke e penguar në punën e re si kryetar i Këshillit Kombëtar të Nismës për Kosovën. Me gjithë pakënaqësitë që i ka pasur në partinë që vazhdon të drejtohet nga Hashim Thaçi, ai tash nuk ka “vijë të kuqe”, për bashkëpunim me të në të ardhmen.

Ndryshe, prej disa partive të vogla, që tashmë kanë filluar të ankohen në pragun e lartë zgjedhor, Krasniqi thotë se Nisma për Kosovën nuk e ka këtë drojë. Andaj edhe insiston që pragu prej 5% të mos ulet. Për të, e rëndësishme është që pas zgjedhjeve të ardhshme, Kosova të mos e fitojë një kryeministër të fortë e mashtrues. Në një intervistë për Tribunën, ai e pranon se bashkë me kryetarin e Nismës, Fatmir Limajn, janë nën akuza të prokurorisë, por flet me siguri të plotë, se pavarësisht rrethanave që mund të krijohen, Nisma nuk do të ndalet. Në intervistë ai jep përgjigje edhe për vendimin e Thaçit për ngritje të pagave, për të ardhmen e FSK-së, për ligjin e ri zgjedhor por edhe për shumë çështje të tjera.

Tribuna: Zoti Krasniqi, si po ecën Nisma?
Krasniqi: Njëherë për njëherë po duket se mirë është. Ka të interesuar, por i gjithë problemi është se duhet t’i verifikojmë njerëzit e duhur që t’i marrin përgjegjësitë e duhura. Kjo nuk është e lehtë dhe sigurisht se kërkon një kohë. Mirëpo është një interesim mjaft i mirë i njerëzve.

Tribuna: Pse nuk dolët me parti. Pritjet kanë qenë të tilla deri vonë?
Krasniqi: E kemi analizuar shumë, mirëpo çështja e zgjedhjeve është bukur shumë e padefinuar. Partia do një angazhim shumë më të madh dhe më të rëndë sesa që e kërkon nisma. Dhe, ndoshta jo vetëm për këtë por edhe për subjektin politik kjo mënyrë se si e kemi filluar ne do të jetë më e qëndrueshme.

Tribuna: Mirëpo synimet e një Nisme mund të jenë më të vogla se ato të partisë?

Krasniqi: Emri sigurisht se është më i madh, mirëpo më mirë është që në një fazë të ketë një përpunim edhe të dokumenteve por edhe një mundësi për t’u njohur më mirë me njerëzit që ofrohen në nismë. Procedurat në këtë fazë për ne janë më të lehta, ndërsa për perspektivën duhet ta kemi një përqendrueshmëri më të madhe. Realisht, shtrirjen mund të themi se e kemi bërë dhe do të shkojmë dalëngadalë në të gjithë Kosovën dhe do t’ia fillojmë që sot. Do t’i kemi dy apo tri takime në javë në komunat e Kosovës. Konsiderojmë që kjo fazë na shërben për t’i njohur më mirë njerëzit që marrin përgjegjësi.

Tribuna: Pritjet kanë qenë që do të ketë edhe deputetë brenda Kuvendit që do t’ju bashkoheshin, por faktikisht kjo nuk ndodhi?

Krasniqi: Ne realisht kemi biseduar me njerëz por kanë hezituar dhe ne po përpiqemi që ta bëjmë një subjekt që më tepër të ketë figura të reja politike sesa të vjetra. Ky edhe është qëllimi. Gjatë këtyre 15 viteve Kosovës i janë shtuar ekspertë të të gjitha lëmive, njerëz që nuk kanë pasur mundësi të kyçen në subjekte politike për shkak të barrikadimeve që shpeshherë bëhen në partitë politike dhe mendojmë që më mirë është që të kemi kuadro të rinj që dëshirojnë të sjellin ndryshime të reja.

Tribuna: Kuadro të rinj për nga përvoja politike apo për nga mosha?
Krasniqi: Jo vetëm për nga mosha, sepse unë nuk jam prej atyre që mendoj se mosha e bën një veprim politik të ri, për faktin se ne nuk mund të qahemi që gjatë këtyre viteve nuk kemi pasur njerëz të rinj në politikë dhe qeverisje. Mund të qahemi se kanë munguar idetë, qëllimet dhe përkushtimet që i duhen këtij vendi.

Tribuna: Në parim Nismat krijohen nga njerëzit që nuk kanë qenë të përfshirë në politikë, ndërsa ju dhe z. Limaj keni qenë?
Krasniqi: Është e vërtetë që kemi qenë në politikë dhe në Partinë Demokratike të Kosovës. Ne i kemi shfaqur pakënaqësitë tona. Pakënaqësitë kanë qenë të disa natyrave që janë shumë përmbajtjesore. Në radhë të parë kemi qenë të pakënaqur me qeverisjen, me përgjegjësinë që u është dhënë njerëzve për të drejtuar institucionet, duke filluar nga parlamenti dhe institucioneve të tjera. Kemi qenë të pakënaqur me akomodimin e njerëzve në institucionet e pavarura të shtetit të cilët nuk kanë qenë kompetentë dhe nuk i kanë pasur as përgatitjet e duhura përkatëse që janë kërkuar edhe me ligj. Kemi konsideruar se pak është bërë në themelimin e shtetit të së drejtës, pak është bërë në sundimin e rendit dhe ligjit, pak i është dhënë hapësirë njerëzve që kanë edhe dije, janë ekspertë dhe të gatshëm për t’i kontribuar vendit të vet. Të gjitha këto na kanë shtyrë që ta bëjmë një hap të ri. Zakonisht më herët i kemi quajtur iniciativa mirëpo kemi ardhur në përfundim që më mirë ta kemi një fjalë shqipe sesa një fjalë të huaj. Ta bëjmë njëherë një zgjerim nëpër komuna dhe pas zgjedhjeve mendojmë që t’i bëjmë organet e përhershme, zgjedhjet demokratike në organe të partisë dhe të ecim më pastaj në të ardhmen. Dmth nuk kemi menduar vetëm për këto zgjedhje. Kemi menduar që të jetë një subjekt politik i qëndrueshëm dhe me një profil të qartë. Ne jemi duke punuar në këto qëllime të Nismës.

Gatishmëria për t’u përballur me drejtësinë

Tribuna: E përmendët shtetin e së drejtës dhe sundimit të ligjit. Këtë e keni të specifikuar edhe në deklaratën programore. Mirëpo në fakt edhe ju edhe kryetari Limaj ballafaqoheni me akuza. Si pretendoni ta bindni elektoratin se e drejta do të jetë në anën tuaj?
Krasniqi: Unë mendoj që elektorati dhe opinioni sa i përket asaj aktakuze, e ka të qartë se nuk ka gjë prej saj, as që mund të ketë gjë prej saj. Mirëpo nganjëherë janë disa veprime edhe mediale por edhe të fushave të tjera që e kanë krijuar një rast të rrejshëm. Mendoj se unë i kam dhënë argumentet e qarta. Në vendin ku thuhet se ka ndodhur ajo ngjarje, unë prej korrikut 1998 dhe ndoshta edhe më herët deri 1999 nuk kam pasur asnjë prezencë fizike.

Tribuna: Rasti Limaj, megjithatë është më i ndërlikuar?
Krasniqi: Kjo është çështja e një rasti, sa i përket anës sime, unë jam i bindur që ka pasur edhe yshtje politike, mirëpo unë nuk dua të merrem me atë. Secili do të përgjigjet për veprat e veta. Një gjë e di, se po të ishte, nëse kisha qenë prezent në një rast të tillë unë e kisha liruar politikën. Unë nuk dua që Kosova për cilindo veprim dhe cilëndo fazë të jetës sime të bëhet peng i sundimit të rendit dhe ligjit. Këtu jam i pastër. Ndërsa te çështja e Fatmirit, edhe këtu mendoj se nëse do të ishte një sistem i mirë i drejtësisë dhe të kishte drejtësi, kjo lëndë është dashur të kryhet para dy viteve ose është dashur të mbyllet. Kemi katër vjet dhe kjo lëndë fillimisht ka filluar me çështjet e Ministrisë së Transportit, për t’u gjuajtur më pastaj në rastin e Kleçkës. Pra ky ka qenë qëllimi i kësaj ndjekjeje. Mirëpo, megjithatë, Fatmir Limaj ka thënë se në çdo kohë është i gatshëm t’i përgjigjet ligjit, drejtësisë dhe gjyqësorit. Në këtë rrafsh ne mendojmë se asnjëherë nuk ia kemi mohuar të drejtën gjyqit për të marrë vendim mbi bazën e fakteve.

Tribuna: Nuk ndiheni të handikepuar tash para zgjedhjeve parlamentare, duke pasur parasysh se proceset për ju të dy, janë të hapura?
Krasniqi: Ne jemi të bindur se ka pak politikë, megjithatë jemi të bindur se gjyqësori do ta japë verdiktin e vet. Mirëpo, e thashë edhe më herët se po të ishim në rregull me kodin Penal të Kosovës, brenda dy viteve është dashur të përfundojë. Prilli është viti i katërt që ka filluar kjo dhe po të kishte pasur diçka të vërtetë gjatë gjithë këtyre viteve, kjo lëndë do të duhej të ishte kryer kohë më parë. Ne e respektojmë çdo vendim të gjyqësorit dhe drejtësisë, jemi për t’u përgjigjur në çdo kohë, sepse po kërkojmë shtet ligjor dhe pa të ne nuk mund të ecim përpara.

Nisma, pa vija të kuqe

Tribuna: Si subjekt politik jeni orientuar nga e majta. Me cilën parti do ta kishit më lehtë të bashkëpunonit, apo ta krijonit ndonjë koalicion parazgjedhor apo edhe paszgjedhor?

Krasniqi: Unë nuk mendoj se koalicione parazgjedhore do të ndodhin në Kosovë, për faktin se nuk po shoh ndonjë gatishmëri. Secili subjekt e sheh veten më të madh sesa është realisht. Po ashtu edhe ne pasi që jemi në fillim dëshirojmë ta masim vullnetin e qytetarëve sepse fuqia jonë do të varet nga vullneti dhe besimi i qytetarëve që kanë në ne. E më pastaj ju e dini që në Kosovë nuk është lehtë të formohen koalicione, për arsye se janë 20 vende të garantuara që vijnë pa një votë të qytetarëve dhe nuk janë pak. Pastaj, parcializimi i shumicës shqiptare do të jetë bukur i mirë, kështu që është shumë vështirë që në këtë fazë të flitet për koalicionet. Megjithatë, ne do të përpiqemi në maksimum që t’i ruajmë raportet me të gjitha subjektet politike që do të jenë në garë në zgjedhjet e ardhshme.

Tribuna: Disa prej subjekteve qysh tani kanë filluar t’i bëjnë ato linjat e kuqe se me cilën parti dhe cilën jo mund të bashkëqeverisin. Në atë kontekst edhe ua parashtruam pyetjen?
Krasniqi: Jo, ne dy-tri gjëra që i bëjnë partitë tjera, nuk do t’i bëjmë. Në radhë të parë nuk do të vëmë vija të kuqe për askënd. Vija të kuqe nuk u bëjmë qytetarëve të cilët votojnë partitë politike, nuk do të dalim se ky apo ai është kandidat për kryeministër për faktin se duhet të flasin qytetarët që ne më pastaj ta caktojmë se kush duhet të jetë kryeministër. Është vendimi i qytetarëve që përcakton se kush do të jetë. Një gjë dua ta bëjë të qartë edhe për opinionin se Kosovës nuk i duhet kryeministër i fortë, as mashtrues. Kosovës i duhet një kryeministër që thotë se ‘unë do të qeveris këtë vend me ligje dhe ligjet do të jenë ato në bazën e të cilit do t’i marr vendimet’. Nëse në një shtet dhe në një vend ligji nuk është i fortë, por individi, aty kurrë s’do të ketë as zhvillim demokratik e as shtet ligjor.

Tribuna: Doni të thoni se kryeministri Thaçi ka qenë i fortë si individë por i dobët në zbatim të ligjit?

Krasniqi: Unë po flas për të gjithë ata që mendojnë se me fortësi duhet të bëhet një kryeministër. Kryeministri duhet të thotë se ligji është para meje dhe se mbi ligjin nuk vë asgjë. Pra një qeverisje e tillë i duhet këtij vendi.

Krasniqi: Qeveria e mëhershme apo kjo që tash është në fund të mandatit, a ka qenë e tillë?
Krasniqi: Atë, mendoj se janë qytetarët që do ta vlerësojnë. Mirëpo në shumë rrethana, edhe të jashtme edhe të brendshme, tregojnë se nuk kemi pasur një qeverisje të bazuar në ligj dhe në planifikim. Shumë veprime të çojnë në atë drejtim dhe mendoj se në Kosovë duhet të pushojë logjika që unë e kam marrë besimin e qytetarëve dhe të sundoj me këtë vend, të sundoj me gjithçka. Një praktikë e tillë duhet të hiqet nëse ne duhet të bëhemi pjesë integruese e Bashkimit Evropian.

Tribuna: Pavarësisht kësaj, ju vijën e kuqe për PDK-në nuk po e vëni?

Krasniqi: Vijën e kuqe ne nuk do ta vëmë. Atë do ta vënë qytetarët dhe ne e respektojmë atë vijë që do ta vendosin qytetarët.

Tribuna: Në fakt disa zyrtarë të PDK-së kanë thënë se dyert e Nismës janë të hapura për bashkëpunim me PDK-në. Ta zëmë se PDK-ja del partia e parë dhe ju bën ofertë. Cila do të ishte përgjigjja juaj?
Krasniqi: Unë nuk dua të përgjigjem për atë çka mendoj unë, për faktin se do të jenë organet e Nismës që do ta përcaktojnë se me kë do të hyjnë në koalicion dhe me kë nuk do të hyjnë. Sigurisht që edhe këtu do të zhvillohet një debat dhe nuk do t’ia lejoj vetes atë komoditet që unë ta përcaktoj vendimin që do ta marrin organet përkatëse të Nismës.

Ideja e papërkrahur për qeveri teknike

Tribuna: Pse nuk po largoheni zyrtarisht nga grupi parlamentar i PDK-së?
Krasniqi: Ne jemi në një fazë të fundit të funksionimit të Kuvendit. Nuk kemi dashur as nuk kemi mundur të formojmë një grup parlamentar por nuk e kemi parë gatishmërinë edhe të opozitës për të marrë veprime të nevojshme për vendin. Para disa muajsh unë e kam shtruar mundësinë të krijimit të një çështjeje për raporte më të mira në Kosovë me një qeveri teknike të të gjithëve, mirëpo të gjitha partitë edhe ato opozitare ishin kundër këtij propozimi. Mendoj se kanë bërë gabimin më të madh të mundshëm. Kjo është njëra prej arsyeve. Arsyeja e dytë është që unë e kam vullnetin t’ia liroj vendin që ka dalë më i madh në zgjedhje dhe u kam thënë, urdhëroni propozoni kandidatin, unë jap dorëheqje. Pse e kam thënë këtë. E gjitha për shkak se nëse krijohet një krizë institucionale, nuk dua ta marrë përgjegjësinë.

Tribuna: Por së paku nga grupi parlamentar keni pasur mundësi të tërhiqeni?

Krasniqi: Vetë fakti që ne kemi formuar një subjekt të ri dhe ua kam bërë kërkesat për ta propozuar kandidatin, para kësaj nuk kam qenë pjesë e grupit parlamentarë të PDK-së, e lëre më pas kësaj.

Tribuna: Por është antikushtetuese bartja e një pozite të tillë?
Krasniqi: Unë ua kam thënë që ata kanë të drejtë ta propozojnë dikë dhe unë jam i gatshëm që në çdo moment ta dorëzoj. Bile – bile është duke më penguar.

Tribuna: Nuk po ndiheni komod në këtë pozitë?
Krasniqi: Nuk jam duke u ndier komod. Në fakt, është duke më penguar në punën që jam duke e bërë.

Tribuna: Po kthehemi në disa çështje tjera. Kryeministri, së voni e mori vendimin për rritjen e pagave. Ju si Nismë si e shihni këtë vendim si fushatë parazgjedhore apo si vendim të domosdoshëm?

Krasniqi: Rritja e pagave është e domosdoshme që të bëhet për çdo vit për shkak të ngritjes së shpenzimeve jetësore të qytetarëve. Por çdo rritje e pagave natyrisht se bëhet me rritjen e buxhetit. Ne çdo vit e miratojmë një ligj për buxhetin dhe e kemi votuar atë ligj. Në atë ligj nuk është e paraparë që të ketë rritje. Pra rritja po bëhet për fushatë dhe rritja nuk po bëhet në interes të atyre që më së shumti kanë nevojë. Rritja lineare u jep më shumë atyre që kanë të ardhura më të mira dhe i dëmton ata që kanë të ardhura më të vogla. Është dashur të bëhet një rritje por për të qenë në shërbim të atyre që kanë më së shumti nevojë për një jetë më të dinjitetshme. Mirëpo edhe kjo bëhet mbi bazën e rritjes ekonomikë dhe mbi bazën e mundësive për shpërndarje të mjeteve siç janë paraparë me ligjin për buxhetin e Kosovës për vitin 2014.

Tribuna: E kemi edhe çështjen e Forcave të Armatosura të Kosovës (FAK). Po shihet një lloj tendence për të hyrë në një kompromis të radhës me komunitetet. Për ta shndërruar apo transformuar FSK në fakt po kërkohet të tejkalohet edhe Pakoja e Ahtisarit. Personalisht, a shihni ndonjë dalje nga situata pa pasur nevojë për zgjatje të ulëseve të rezervuara?

Krasniqi: Sigurisht se ka zgjidhje sepse kërkesa është e padrejtë nga minoritetet. Duhet ta sqaroj. E para, është e padrejtë sepse Kushtetuta ua ka dhënë dy mandate me vende të rezervuara. I kanë shfrytëzuar. Tani është koha për mandate të garantuara. Në asnjë vend të botës e as të rajonit nuk i ka vendet e garantuara për komunitetet pakicë. Mendoj se ne kemi vepruar me zemërgjerësi, që ndoshta jo gjithherë është në shërbim të funksionimit demokratik. Psh. institucioni ynë ka pasur 120 deputetë dhe ka qeverisur me 65 deputetë, ndërsa tash as ata nuk i ka. Në fakt ka qeverisur me një shumicë parlamentare por me një pakicë qytetare. Mendoj që nuk është mirë që edhe në të ardhmen të ndodhë, që parlamenti të funksionojë vetëm me një shumicë parlamentare por pa shumicën qytetare. Në këtë rast po dëmtohet demokracia. Demokracia është sundim i shumicës e në këtë rast po sundon pakica. Kështu që në këtë rrafsh mendoj se nuk kanë të drejtë ta bëjnë një kërkesë të tillë. Edhe me Kushtetutë por edhe me ligj ata kanë të drejtë me votimin e dyfishtë, por vetëm për çështje ku preken interesat e tyre, e në këtë rast nuk preken interesat e tyre dhe nuk mund ta bllokojnë.

Tribuna: Megjithatë, situata ka ardhur në pikën kur komunitetet tashmë e kanë vënë kushtin?
Krasniqi: Ata mund ta vënë kushtin, por një gjë e di që Parlamenti i Kosovës nuk do të lejojë më vende të rezervuara sepse nuk është një veprim demokratik.

Tribuna: Atëherë a mund të presim që FSK-ja mund të transformohet në legjislaturën e ardhshme në rast se Lista Serbe futet në Kuvendin e Kosovës. A do të pranojë ajo të hyjë në kompromise të çfarëdo lloj natyre?
Krasniqi: Unë thashë se me dokumentet e Ahtisarit ata kanë të drejtë me votim të dyfishtë por vetëm për çështjet që preken interesat e tyre drejtpërsëdrejti. Kjo çështje nuk i prek interesat e tyre dhe nuk ka nevojë të hyjë në kompromise.

Tribuna: E ndryshimi kushtetues si do të bëhet?
Krasniqi: Do të bëhet me dy të tretat pa votim të dyfishtë.

Tribuna: Sa i përket bisedimeve, cili është qëndrimi juaj i fundit si Nismë?
Krasniqi: Tash është pak vështirë për vazhdimin e tyre. I gjithë zhvillimi deri tani ka qenë me defekte të shumta për palën Kosovare dhe nuk është lehtë. Por sigurisht cilido që ta marrë përgjegjësinë duhet të bisedojë. Por bisedimet duhet të jenë me qëllimin për përmirësimin e raporteve ndërmjet Kosovës dhe Serbisë, pa lëshime. Pra kanë qenë edhe bisedimet ato që nuk jemi pajtuar. Unë e kam thënë edhe publikisht qëndrimin tim se kanë qenë të papërgatitur. Në fakt ne nuk kemi asnjë realizim të atyre marrëveshjeve dhe Serbia nuk e ka treguar asnjëherë gatishmërinë për t’i realizuar ato marrëveshje që janë arritur në Bruksel. Kështu që unë jam shumë skeptik që edhe në të ardhmen Serbia do ta ketë gatishmërinë për t’i qëndruar atyre marrëveshjeve.

Tribuna: E kemi edhe ligjin e ri për zgjedhjet në amendamentim. Cili është qëndrimi juaj rreth çështjes së bartësit të listës. Tashmë është futur si amendament që lideri i subjektit të mos jetë në regjistrin e anëtarëve për votim, por vota e partisë t’i atribuohet drejtpërdrejt!

Krasniqi: Kjo është përdorur edhe në nivelin komunal. Kjo duhet të kihet parasysh se nëse një ligj shkon në Gjykatë Kushtetuese, më pastaj edhe nëse miratohet i duhet kohë që gjykata ta kthen mendimin e vet. Nuk di se a është lëndë për Gjykatën Kushtetuese, por një gjë e di që nuk është demokratike. Secili kandidat që renditet në listë duhet t’i nënshtrohet vullnetit të qytetarëve dhe për mua është jodemokratike. Megjithatë, janë shumica që vendosin dhe nuk kam qenë pjesë e hartimit të ligjit. Ne kemi pasur qëndrimet tona për reformën dhe kemi kërkuar që të bëhet reformë zgjedhore dhe nuk është bërë. Janë disa ndryshime teknike të ligjit, bile ato nuk i kanë prekur problemet kryesore për të cilat është filluar reforma. Problemi kryesor që është shkaktuar në të gjitha partitë politike, që votimi me shumë kandidatë jep mundësi të keqpërdorimeve të brendshme në subjektet politike dhe nuk do të thotë që vota e qytetarit do të shkojë aty ku është adresuar. Edhe qytetari ynë, e pamë së fundi që do të votonte edhe për partinë edhe për kandidatët, patë rreth 100 mijë fletëvotime të pavlefshme. Kjo tregon se nuk e kemi atë nivel dhe i ngatërron. Nga kjo krijohen shumë fletëvotime të pavlefshme. Në anën tjetër mendoj se nëse ky ligj nuk e zgjedh një çështje që numërimi të bëhet në qendrat komunale zgjedhore me një vëzhgim edhe të shoqërisë, të medieve, por edhe me mjete elektronike, mendoj se përsëri nuk kemi bërë zgjedhje që i duhen këtij vendi. Zgjedhjet janë një parametër kryesor që vendi ynë është përgatitur për ndërtimin e një shoqërie demokratike.

Tribuna: A i frikësoheni manipulimit nëse thoni se shkohet me një ndryshim kozmetik të ligjit?

Krasniqi: Realisht janë të mundshme manipulimet dhe keqpërdorimet e ndryshme. Unë mendoj se pa një reformë të thellë jo vetëm të ligjit, por edhe pa një ndryshim edhe të qendrës së votimit të Komisionit Qendror Zgjedhor, po ashtu pa ndryshuar dhe pa e bërë një reformë edhe në Komisionet Zgjedhore edhe nëpër komuna të cilat kanë qenë përgjegjës për shumë parregullsi që kanë ndodhur më herët, është vështirë të kesh besueshmëri në procesin zgjedhor.

Tribuna: Personalisht kur prisni që do të hyjmë në zgjedhje të parakohshme?
Krasniqi: Kjo nuk varet prej neve dhe unë e kam të vështirë ta them sepse nuk jemi pjesë e bisedimeve. Pjesë janë partitë politike dhe kanë thënë se në qershor. Mendoj se ky muaj është më i përshtatshmi dhe më i miri për të gjithë dhe rregullsinë e zgjedhjeve.

Tribuna: Cilat janë pretendimet e Nismës dhe ku e shihni Nismën pas zgjedhjeve?
Krasniqi: Nuk është lehtë ta renditim sidomos tani në këtë fazë që nuk është zgjeruar në të gjitha qytetet e Kosovës. Ndoshta nga fundi mund ta kemi një mendim, mirëpo nuk dua të flas tani. Por do të jenë qytetarët ata që do t’ia caktojnë vendin secilit subjekt politik.

Tribuna: A i druheni pragut të lartë zgjedhor. Ka parti të vogla që qysh tash kanë filluar të ankohen për pragun?

Krasniqi: Unë mendoj se pragu nuk është i lartë. Pa marrë parasysh se si do të jetë gjendja, ne duhet të jemi për një sistem zgjedhor që garanton një qëndrueshmëri më të madhe. Ulja e pragut zgjedhor do të parcializonte shumë skenën politike. Pesë përqindëshi nuk është shumë pasi Kosova është një zonë. Nëse do të ndahej Kosova në disa rajone, ndoshta do të ishte e arsyeshme zbritja e pragut. Nëse secili subjekt politik nuk do ta arrijë pesë përqindëshin, atëherë nuk ka se çka lyp në skenën politike.

Tribuna: Nesër do të mbahet një seancë gjyqësore për Fatmir Limaj, a druani se do të ketë një kërkesë për paraburgim?
Krasniqi: Atë nuk mund ta parashohim, mirëpo një gjë e di se Nisma nuk do të ndalet as me Fatmir Limajn as me Jakup Krasniqin. Hendikep do të ishte, mirëpo e di që Nisma nuk do të ndalet.