Lista zgjedhore e PDK-së në Prizren është ndryshuar në dy ditët e fundit. Disa emra të kandidatëve janë larguar nga lista dhe janë zëvendësuar me disa emra të tjerë. Ndryshimi i listës është bërë për shkak pakënaqësive të shumta që kanë pasur disa degë dhe nëndegë të PDK-së.

“Janë ndryshuar disa emra në listë. Janë larguar disa kandidatë dhe janë zëvendësuar me disa të tjerë ku është parë më e arsyeshme që të jenë”, tregon për “PrizrenPress”, burimi brenda PDK-së.

PDK-ja është partia e vetme në Prizren, që nuk ka publikuar emrat e kandidatëve për Asamblenë Komunale. Ajo ka shfrytëzuar kohën ligjore të KQZ-së për të “korrigjuar” listën zgjedhore. /PrizrenPress.com/

Këshilli i Bashkësisë Islame të Kosovës në Prizren, vizitoi Partinë Konservatore të Kosovës. Lutfi Ballëku së bashku me anëtarët tjerë të Këshillit diskutuan me Kryesinë e Partisë Konservatore të Kosovës për çështjet e përbashkëta që preokupojnë qytetarët e komunës së Prizrenit.

Gjatë një bisede të hapur dhe miqësore janë identifikuar sfidat kryesore të cilat duhen të adresohen nga qeveria e ardhshme komunale dhe institucionet vendore në mënyrë të sinqertë duke mundësuar lehtësimin e punës së Bashkësisë Islame në Prizren me një statut të qartë dhe me dinjitet.

“Ne nuk jemi të kënaqur se si trajtohen bashkësitë fetare në vend në përgjithësi. Bashkësia islame e Kosovës duhet të ketë vendin meritor në shoqëri si bashkësia më e madhe fetare në Kosovë. Liritë dhe barazitë fetare janë të garantuar me ligj dhe me kushtetutën e Republikës së Kosovës. Prandaj puna e bashkësive fetare nuk mund të instrumentalizohet apo të shfrytëzohet për interesa të caktuara politike. Ato duhet të ushtrojnë punën e tyre në mënyrë të pavarur”, tha Beni Kizolli, kandidat i Partisë Konservatore të Kosovës për Kryetar të Prizrenit.

Partia Konservatore e Kosovës shtjelloi edhe problemin e pronës së Bashkësisë Islame në Prizren e cila ende kontestohet pasi që është trashëguar ky problem nga sistemi i kaluar dhe vazhdon të mos trajtohet edhe sot e kësaj dite.

“Prona është e shenjtë dhe e drejtë absolute. Prona e uzurpuar duhet të kthehet trashëgimtarit të ligjshëm e ai trashëgimtar është bashkësia Islame e Kosovës në Prizren. Kjo do të mundësonte edhe kthimin e dinjitetit të Bashkësisë Islame dhe pavarësinë financiare duke mundësuar veprimtarinë e pavarur në edukimin fetar të qytetareve të Prizrenit në mënyre tradicionale dhe te duhur” tha Z. Munir Basha, kryetar i Partisë Konservatore të Kosovës.

Partia Konservatore e Kosovës konsideron se bashkësitë fetare duhen të kenë statusin e përfituesit dhe të lirohen apo lehtësohen nga disa obligime dhe pagesat e shërbimeve publike si për shembull të ujit e cila është një nevojë e domosdoshme për besimtarët islam gjatë riteve të tyre fetare para faljes së namazit nëpër xhamitë e komunës së Prizrenit. /PrizrenPress.com/

Kandidati i Lëvizjes Vetëvendosje! për kryetar të Malishevës Alban Krasniqi, po vazhdon vizitat nëpër fshatra të këtij qyteti për t’u njohur me problemet dhe sfidat që kanë qytetarët e kësaj komune.

Gjatë vizitës në Tërpezë të Ulët, Krasniqi ka bërë nderime në varrezat e mësuesve të martirizuar në luftën e fundit, Jashar Krasniqit dhe Rasim Krasniqit.

Ai po ashtu vizitoi një pjesë e rrugës së fshatit që është e paasfaltuar, vendin ku kishte shembje dheu, për të cilin Lëvizja Vetëvendosje! pat alarmuar për rrezikun që i kanosej disa familjeve të këtij fshati, rrezik i cili ende është evident, si dhe ambulancën shëndetësore të fshatit e cila nuk është funksionale.

Krasniqi gjatë kësaj vizite ka zhvilluar një takim me banorët e fshatit me të cilët ka diskutuar problemet dhe shqetësimet që qytetarët e kij fshati kanë.

Kandidati Alban Krasniqi ne takimin me banorët e fshatit, foli për mundësitë dhe nevojën që ka Malisheva për ndryshime.

Ai premtoi se në qeverisjen e Lëvizjes Vetëvendosje! do të ketë trajtim të barabartë për të gjithë pa asnjë lloj dallimi, dhe se të gjitha projektet do të realizohen në bashkëpunim dhe sipas prioritetit që kanë qytetarët.

Kandidati ishte i shoqëruar nga kandidatët për Kuvend Komunal Muhamet Bytyqi dhe Armend Krasniqi, banor i këtij fshati si dhe aktivistët Jetmir Avdiaj, Valon Kabashi dhe Arlind Krasniqi./PrizrenPress.com/

Kryetari i Shoqatës së të Burgosurve Politikë të Kosovës (ShBPK), Hydajet Hyseni, ka bërë me dije se 9 mijë e 110 ish të burgosur politikë kanë aplikuar që t’u njihen të drejtat të cilat u takojnë me ligj.Ai ka thënë se komisioni për njohjen e statusit për ish të burgosurit politikë të Kosovës brenda këtij muaji do ta paraqesë listën prioritare të përfituesve të parë të kësaj kategorie të qytetarëve.

“Besoj se brenda këtij muaji do të jemi të përgatitur ta paraqesim listën për këtë vit, kurse në muajt në vijim do ta përgatisim listën për vitin e ardhshëm. Po ashtu, jam optimist se brenda këtij viti do t’i përgatisim të gjitha listat”, ka thënë Hyseni në intervistën për “Epokën e re”, duke shtuar se për këtë vit Qeveria pritet t’i ndajë dy milionë euro për ish të burgosurit politikë.

Kryetari i Shoqatës së të Burgosurve Politikë të Kosovës, Hydajet Hyseni, ka thënë se ky komision do ta ketë parasysh t’i fusë në listën prioritare ish të burgosurit politikë, të cilët nuk janë në gjendje të mirë shëndetësore.