Në Bruksel, ka vazhduar rundi i pestë i bisedimeve për zbatimin e marrëveshjes për normalizimin e marrëdhënieve ndërshtetërore, ku në agjendë janë çështjet e drejtësisë, sigurisë dhe energjetikës.

Në një njoftimin shtypi të Qeverisë theksohet se më 1 dhe 2 korrik pritet të mbahet një takim bilateral me përfaqësues të BE-së për çështjet e “Telekomit”, ku zëvendëskryeministrja, Edita Tahiri, dhe shefi i ART-së, Ekrem Hoxha, do të zhvillojnë një takim me ndërmjetësuesin e Bashkimit Evropian, Pierre Mirel.

“Marrëveshja për “Telekomin” ende nuk është arritur, por ka pasur përparime në aspekte të caktuara, ku përparimi kryesor, ka qenë pajtimi që Kosova ta marrë kodin shtetëror telefonik nga ITU-ja, pajtim ky i cili është arritur në rundin e bisedimeve, të mbajtur më 17 maj 2013”, thuhet në njoftim.

Ministri i Forcës së Sigurisë së Kosovës(MFSK), Agim Çeku dhe Ministri i Mbrojtjes të Republikës së Shqipërisë, Arben Imami, në një akt solemn nënshkruan marrëveshjen SOFA. Më rastin e nënshkrimit ishin të pranishëm edhe zëvendësministrat e FSK-së, Shemsi Veseli dhe Bejtush Gashi si dhe komandanti i Forcës së Sigurisë së Sigurisë, gjenerallejtënant Kadri Kastrati dhe shefit të Ushtrisë shqiptare, gjeneral major Xhemal Gjunkshi. Marrëveshja ndërmjet dy vendeve u nënshkrua në kazermën e FSK-së, në Prizren.

Ministri i FSK-së Agim Çeku tha se gjatë këtyre viteve të bashkëpunimit me Ministrinë e mbrojtjes të Republikës së Shqipërisë, kemi realizuar një varg aktivitetesh dhe bashkëpunimi ka qenë jashtëzakonisht i frytshëm. Këtij bashkëpunimi po i shtojmë edhe një dokument që i rregullon marrëdhëniet tona edhe më fuqishëm dhe kjo po bëhet mbi bazën e standardeve të NATO-s.

Ministri Çeku me këtë rast në emër të Ministrisë për FSK, dhe në emër të FSK-së i dorëzoj ministrit Arben Imami, medalje për “Shërbim të merituar”, në shenjë respekti për punën, kontributin dhe ndihmën e pakursyer në mbështetje të FSK-së.

Ministri i Mbrojtjes të Republikës së Shqipërisë, Arben Imami me këtë rast tha se bashkëpunimi i frytshëm që ekziston ndërmjet të dy ministrive dhe Forcave, do të vazhdoj edhe më tutje dhe se kjo po fuqizohet edhe me nënshkrimin e Marrëveshjes Suplementare SOFA, dhe kjo është edhe me e fuqishme sepse po shkojmë drejt rrugës se integrimit në NATO.

Ministri Imami po ashtu, potencoj se kjo është vizita e fundit zyrtare e tij në këtë mandat që po i bëhet Kosovës dhe FSK-së, dhe se ndjehet i lumtur që pikërisht me FSK-në po e përfundon agjendën e tij si ministër sa i përket angazhimeve zyrtare në Kosovë.

Marrëveshja SOFA, rregullon procedurat e hyrjes/daljes, qëndrimit të përkohshëm dhe statusin e anëtarëve të Forcave të Armatosura të Republikës së Shqipërisë dhe anëtarëve të Forcës së Sigurisë së Kosovës në territorin e shtetit përkatës, si dhe përbërësve civil apo personave në varësi.

Ministri i Mbrojtjes të Republikës u prit me nderime të larta shtetërore nga Garda Ceremoniale e FSK-së, si edhe me antonimin e himnit të Republikës së Kosovës dhe atij të Republikës së Shqipërisë. /PrizrenPress.com/

Projektligji për amnisti, i cili veç tjerash ka ardhur si rezultat i marrëveshjes së arritur në Bruksel ndërmjet Kosovës dhe Serbisë, pritet që shumë shpejt të kalojë në shqyrtimin e parë nga legjislativi. Tashmë, për ketë çështje, komisioni për legjislacion ia ka dhenë dritën jeshile.

Me gjithë kundërshtimet dhe kritikat që i kanë pasur anëtaret e komisionit lidhur me përmbajtjen e projektligjit, ata kanë thënë se fillimisht ai duhet të dalë në leximin e parë para legjislativit.

Nënkryetari i komisionit Behar Selimi, i cili ka kryesuar mbledhjen, theksoi se veç tjerash duhet pranuar se ky ligj është edhe politik.

“Ky projektligj është ashtu siç është, dhe përveç atij karakterit human për një numër të qytetareve të përkatësisë kombëtare shqiptare që janë në vuajtje të dënimit, adresohet edhe në ata që u kanë takuar strukturave ilegale të cilët kanë drojë nga shpërbërja prej ndjekjes penale”.

“Në bisedime është marr një obligim dhe ky projektligj i përfshin edhe ata. Ne duhet të themi se ky projektligj ka karakter human, social, por, ka edhe karakter politik”, ka shpjeguar Selimi, dhe ka shtuar se projektligj në kuvend ka ardhur në mënyrë të përshpejtuar si vullnet i liderëve të tri subjekteve më të mëdha politike.

Nga ana tjetër, subjekti politik Vetëvendosje e ka kundërshtuar fuqishëm projektligjin duke thënë se nëpërmjet tij do të instalohet brenda strukturës së legjislacionit të Kosovës një mekanizëm i tmerrshëm i drejtësisë selektive.

Albulena Haxhiu, anëtare e komisionit nga Vetëvendosje tha se amnistia e vërtetë që po kërkohet këtu është për pjesëtarët e MUP-it, dhe e organeve tjera të aparatit represiv të shtetit të Serbisë të instaluara në territorin e Kosovës, të cilat i kanë kryer të gjitha krimet ndaj shtetit dhe ndaj popullatës së Kosovës.

“Po amnistohen serbet ende pa nisur procedura e hetimi, identifikimi i krimit, të kriminelit, dënimi i kriminelit e më pastaj amnistia pas një kohe të vuajtjes së dënimit. Pra, me këtë projektligj po amnistohen krimet që janë kryer ndaj Kosovës dhe rendit kushtetues. Po amnistohen ata të cilët tashmë janë duke u hetuar, e kam fjalën për strukturat ilegale të Serbisë. Tash po kërkohet që për interesat e Daqiçit që ata të amnistohen”, tha Haxhiu, transmeton REL.

Haxhiu tha po ashtu se këtë projektligj po synohet vendosja institucionale e padrejtësisë në Kosovë, e kjo padrejtësi, siç tha ajo, do të jetë në vazhdimësi.

“Po amnistohen ata që tashmë e kanë marrë denimin, jo vetëm kriminelet, por edhe ata të korruptuarit në momentin e shpalljes së dënimit do të kenë të drejtën që të aplikojnë për amnisti. Kur thotë zoti Kuçi që ky ligj ka të bëjë për të gjithë qytetarët e Kosovës dhe jo vetëm për një etni, sigurisht që e ka fjalën për kriminelët e korruptuar”, tha Haxhiu.

Ajo shtoi se mbledhja e caktuar për ditën e hënë ka ra ndesh me rregulloren e punës së Kuvendit, pasi që sipas saj, në nenin 64 paragrafi 4 të Rregullores së Punës, thuhet që anëtarët e komisionit njoftohen jo më vonë se katër ditë pune para se të mbahet mbledhja, e jo ashtu siç ka ndodhur.

Kurse ish-ministri i drejtësisë, tani anëtar i komisionit për legjislacion, Haki Demolli, nga Lidhja Demokratike e Kosovës, e kritikoi projektligjin dhe vlerësoi se me këtë projektligj kryesisht synohet të amnistohen kryesit e komunitetit serb.

“Nga dispozita e këtij projektligji shihet se ky ligj ka për qëllim të amnistojë kryerësit e komunitetit serb të cilët me vite të tëra, kanë rrezikuar dhe cenuar rendin kushtetues të Kosovës, kanë dëmtuar dhe rrezikuar pasurinë e qytetarëve të vendit tonë”.

“Kanë nxitur urrejtje dhe përqarje nacionale fetare dhe etnike, kanë cenuar rendin dhe sigurinë, kanë cenuar dhe rrezikuar ekonominë e vendit dhe kanë kryer vepra të tjera penale si në dëm të individëve, ashtu edhe në dëm të vendit tonë”, tha Demolli dhe shtoi se një gjë e tillë tentohet të kamuflohet me dispozita e nenit tre të projektligjit.

Nga sot nis regjimi i vizave për hyrje në Republikën e Kosovës për shtetasit e 87 vendeve të botës që nuk e kanë njohur shtetin e Kosovës, përjashtuar ato shtete të BE-së.

Regjimi i vizave për këto shtete vjen pas vendimit të Qeverisë së Kosovës, i cili a hyrë në fuqi dhe do të jetë i plotfuqishëm deri në fillim të vitit 2014.

Ndërkaq qytetarët e këtyre 87 shteteve do të mundë të pajisen me viza në Konsullatën e Përgjithshme të Republikës së Kosovës në Stamboll të Turqisë, ndërsa për vizat emergjente në Aeroportin Ndërkombëtar të Prishtinës, transmeton KTV..

Sipas vendimit, llojet e vizave dhe shumat që do të paguhen për to janë si në vijim: Viza hyrëse – 40 euro, Viza transite – 30 euro, Viza transite ajrore – 25 euro dhe Viza afatgjate – 50 euro.

Në këtë projekt, Qeveria e Republikës së Kosovës ka marrë mbështetje të fuqishme konkrete edhe nga Qeveria e Mbretërisë së Norvegjisë, ku përmes bashkëfinancimit ka filluar të bëhet implementimi i Qendrës së Vizave.

Komisionari për zgjerim i Bashkimit Evropian, Stefan Fuele, ka thënë se pranimi i Kroacisë në BE dëshmon se dyert e bllokut janë të hapura për të gjitha vendet e Ballkanit Perëndimor.

“Hyrja e Kroacisë është dëshmi e re e fuqisë transformuese të politikës së zgjerimit”, ka thënë Fuele në një videomesazh për vendet e Ballkanit Perëndimor.

Ai ka thënë se ky është mesazh i qartë se të gjitha vendet e rajonit kanë perspektivë evropiane me kusht që zbatojnë reformat në fushën e sundimit të ligjit, ndërtojnë parime demokratike dhe mbrojnë të drejtat e njeriut.

“Nuk ka rrugë të shkurtra dhe as formula magjike”, ka thënë Fuele, transmeton REL.

Nga sot, Kroacia është bërë anëtarja e 28-të e Bashkimit Evropian.