Prokuroria në Prizren ka autorizuar hetuesit e njësisë së krimeve ekonomike të Policisë që të nisin grumbullimin e provave rreth dyshimeve për realizimin e projektit të riparimit të stadiumit të qytetit “Përparim Thaçi”.

Kryeprokurori i Prizrenit, Sylë Hoxha, tha se tashmë hetimet rreth këtij rasti kanë filluar. Ai nuk ka dhënë shumë hollësi rreth hetimit të rastit në fjalë,duke u shprehur se “së shpejti në bazë të volumit të hetimeve do të informojë më gjerësisht rreth kësaj çështje”.

Burimet e TV Prizrenit, bëjnë të ditur se dyshohet se në këtë rast bëhet fjalë për shpërdorim të detyrës zyrtare dhe shkeljes së Ligjit të Prokurimit, pasi që punimet në stadiumin e qytetit “Përparim Thaçi” janë pranuar nga organet kompetente edhe pse ato nuk janë kryer sipas projektit.

Dyshimet kanë të bëjnë me dy projekte konkrete, ku njëra është financuar nga Ministria e Kulturës, Rinisë dhe Sporteve dhe tjetra nga Komuna e Prizrenit.

Sipas zyrtarëve të Drejtorisë Komunale për Rini,Kulturë dhe sport,ministria e kulturës ka investuar rreth 100 mije euro,ndërsa komuna e Prizrenit 194 mije euro.

Ministria ka financuar projektin e rregullimit të rrethojave,ndërsa komuna ka mbështetur projektin për vendosjen e barit artificial dhe të zhveshtorës. Hetuesit tashmë janë autorizuar nga Prokuroria që të grumbullojnë provat në këtë drejtim.

Qeveria e Kosovës dhe ajo e Shqipërisë sot në Prizren do ta mbajnë mbledhjen e parë të përbashkët.

Adem Demaçi, edhe pse e ka vlerësuar të vonuar këtë veprim, ka thënë se mbledhja e përbashkët e dy qeverive është një hap i shkëlqyer drejt forcimit të dy shteteve.

Meritor sipas Demaçit, për këtë mbledhje ndërqeveritare është Edi Rama.

Në kontekst, ai ka thënë se kjo mbledhje ka elemente edhe të bashkimit kombëtar.

“Ky është një lloj bashkimi kombëtar, duke pasur parasysh kohën dhe hapësirën në të cilën jetojmë si dhe trendet ndërkombëtarë në të cilët jemi duke shkuar”, ka deklaruar Demaçi për Epokën e re.

Tri ditë pas nisjes së vitit të shtatë të qeverisjes, Hashim Thaçi do të jetë nikoqir i “mbledhjes kombëtare”. Dhe, ende pa u mbledhur në Prizren ministrat e Kosovës dhe Shqipërisë, ai tashmë ia ka dhënë kësaj ngjarjeje epitetin historik. Me gjithë peshën që ka një takim i tillë, analistët politikë shprehin doza dyshimi rreth mundësisë së përmirësimit të imazhit të qeverisë aktuale,shkruan Tribuna

Qeveria Thaçi, sipas tyre, për gjashtë vjet është mbushur me aq shumë dështime e skandale saqë tash në muajt e fundit të mandatit të dytë, është vështirë ta krijojë një perceptim pozitiv te qytetarët. Analisti Donik Sallova ka shprehur bindjen se Thaçi si politikan i zhytur në afera, synon që përmes Edi Ramës, të ngrisë disponueshmërinë e qytetarëve në raport me të. Por, e gjitha sipas tij, do të përfundojë si një spektakël.

“Konsideroj që mbledhja e dy qeverive është një lloj spektakli i një kryeministri që startin e qeverisjes e kishte me plot skandale dhe i një kryeministri që fundin e qeverisjes e ka me po aq skandale. Thjeshtë, Thaçi e Rama vetëm kanë për t’i bërë favore politike njeri-tjetrit”, ka thënë Sallova për Tribunën

“Amanet fëmijët, kaq paskam pas ymër, tash po takohem me Allahun” ishte mesazhi i fundit që e mori gruaja e F.S. (42 vjeç) nga Prishtina , i vrarë ditë më parë në Siri. Ky mesazh asaj i erdhi të hënen rreth orës 16:00.

Familja i ka hapur të pamën në një shtëpi maje “Taslixhes” në kryeqytet. Ata po presin ngushëllimet për djalin e tyre të rënë në Siri edhe pse trupi i tij nuk dihet ku është.

Konfirmimin për vdekjen e tij familjarët thonë se e kanë marrë “përmes do lidhjesh”, nga të tjerë që ishin me të në qytetin Alepo të Sirisë ku edhe ishte vrarë. F.S. ka lënë në Kosovë gruan dhe dy fëmijët e tij, vajzën 9 vjeçe dhe djalin 7 vjeç, të cilët vijojnë shkollën në Prishtinë. Sipas familjarëve, babait, vëllait dhe të afërmve tjerë, ai kishte qenë edhe më herët në Siri, shkruan gazeta “Zëri”.

Ishte kthyer, por kishte shkuar prapë, sepse nuk i qetësohej shpirti në këtë dhe. Herën e parë kishte qëndruar në Siri katër muaj, ku fillimisht i kishte kryer disa trajnime ushtarake atje, pastaj ishte futur në luftë.
Ai pas katër muajsh ishte kthyer në Kosovë .Kishte falur edhe një pjesë të shtëpisë së tij dhe tre ari truall që të ndërtohej një xhami për të cilën dëshmonin shtyllat e betonit pasi ndërtimi u ndalua nga inspeksioni ndërtimor.

Në familje kishte qëndruar rreth një muaj por, nuk ishte ndjerë i qetë duke parë vazhdimisht masakrimet e grave dhe fëmijëve që po ndodhnin në Siri. /Zëri/

Anëtari i kryesisë i Lidhjes Demokratike të Kosovës, Lutfi Haziri, deklaroi se takimi i përbashkët i dy qeverive, asaj të Kosovës dhe të Shqipërisë në Prizren, nuk ka asnjë përmbajtje.

Sipas Hazirit një takim i tillë që është vetëm simbolik, po bëhet për marketing politik të dy palëve.

“Definitivisht po bëhet për marketing për agjendë politike. Arsyeja është se dështoi takimi i Vlorës, dështoi 28 nëntori si takim. Kjo po ndodh në janar në Prizren në një simbolikë krejt tjetër. Them ishalla do të gjejnë vend se krijohet qeveria më e madhe në Evropë me ata ministra e zëvendësministra që i kanë”, theksoi anëtari i kryesisë i LDK-së, transmeton Klan Kosova.

Një ditë para takimit në Prizren, Haziri tha se nuk po sheh asgjë serioze në agjendën e shpalosur.

“Do të doja të shoh një format të ri të bashkëpunimit. Jam njëri nga ata që i besojnë bashkimit kombëtar. Nuk po shoh këtu asgjë serioze, sepse po vazhdon agjendat e qeverive që kudo që ndërrohen thonë se nga ne po fillon historia e gjithçka tjetër. Kjo nuk është e vërtetë”, nënvizoi ai

Haziri tha se kjo nuk është agjendë e Kosovës, por e Edi Ramës që e paralajmëroi kur zhvilloi fjalimin në Kuvend.

“Agjenda e këtij takimi është e Shqipërisë. Edi Rama u soll këtu sikur të ishte kryeministër i shqiptarëve”, tha anëtari i kryesisë së LDK-së

Haziri theksoi se ndërmjet Prishtinës dhe Tiranës ka patur shumë marrëveshje, por ato nuk janë zbatuar.

“Nuk ka ministri, nuk ka sektor, nuk ka marrëveshje të nënshkruar nga ndërmarrje që nuk kanë marrëveshje ndërshtetërore të nënshkruar. Energjia, posta, telekomi, rinia, kryeministrat, ministrat kanë ujdi. Ato nuk janë realizuar kanë mbetur të vdekura”, tha Haziri që la të kuptohet se qeveria e re e Kosovës e cila do të udhëhiqej nga LDK nuk do ta përfillte këtë takim.

“Kemi dy qeveri në pyetje, njëra e re, tjetra në ikje. A garanton dikush se qeveria e re e Kosovës do t’i zbatojë ato marrëveshje?”, përfundoi Haziri.