Ish-kryetari i Rahovecit, Smajl Latifi është intervistuar nga Policia e Kosovës, për akuzat që ka bërë në drejtim të kryeministrit të Kosovës, Hashim Thaçit për blerjen e votave në këtë qytet.

Zëdhënësi i Policisë në Prizren,Hazir Berisha tha se Latifi është intervistuar nga policia 30.12.2013.

“Intervistimi i Latifit është zhvilluar me autorizim të shkruar nga Prokuroria Themelore në Gjakovë”.

“Po ashtu me të njëjtin autorizim është kërkuar nga policia që të hetohen pretendimet e ankuesit dhe të mbledhen provat”.

“Në këtë faz policia është duke i kryer hetimet parapenale me autorizim të Prokurorisë”,tha Berisha.

Burimet e “PrizrenPress-it” bëjnë të ditur se ish-kryetari i Rahovecit,Smajl Latifi nuk ka dhënë dëshmi bindëse për akuzat që ka bërë në drejtim të kryeministrit të Kosovës, Hashim Thaçit dhe PDK-së.

“Nuk ka dhënë dëshmi bindëse”,tregon burimi brenda Policisë së Kosovës në Prizren.

Kryeprokurori i rajonit të Prizrenit, Sylë Hoxhaj,ndërkaq tha se  me rastin e ish-kryetarit të Rahovecit, Smajl Latifi është duke u marrë Prokuroria e Gjakovës.

Ish-kryetari i Rahovecit, Smajl Latifi, ka akuzuar kryeministrin e Kosovës, Hashim Thaçin dhe Ministrinë e Bujqësisë për blerjen e votave në Rahovec.

“Ka pasur blerje të votave me anë të subveciovene. Unë do të doja që ndonjë prokuror të më intervistonte dhe t’i tregoj faktet që kam”./PrizrenPress.com/

Përfaqësuesit e dy partive më të mëdha opozitare, LDK-së dhe Lëvizjes Vetëvendosje! nuk janë pajtuar me konstatimin e kryeministrit të Kosovës, Hashim Thaçit se për gjashtë vjet të qeverisjes së tij kanë ndodhur rezultate të prekshme dhe thelbësore.

Sekretari i Lidhjes Demokratike të Kosovës (LDK), Ismet Beqiri, ka thënë se gjatë periudhës gjashtëvjeçare të qeverisjes Thaçi është shënuar pak progres.

“Kur flasim për qeverisjen Thaçi, aq më shumë në këto vitet e fundit, mund të themi se është qeveri e dështuar, e cila nuk jep shpresë për qytetarët. Kjo qeveri është përcjell me një shkallë të lartë të papunësisë dhe të korrupsionit. Për këto gjashtë vjet ka pak progres. Kjo qeveri dhe ky kryeministër nuk mund të krenohen me atë që është bërë gjatë kësaj periudhe. Edhe ajo që është arritur është realizuar me një kosto shumë të lartë”, ka deklaruar Beqiri për “Epokën e re”.

Ai është shprehur i pakënaqur edhe me mandatin e parë të qeverisjes Thaçi, ku pjesë e kabinetit qeveritar ka qenë edhe LDK-ja.

“Jam i vetëdijshëm se në një periudhë kohore në këtë gjashtëvjeçar edhe LDK-ja ka qenë pjesë e qeverisë, por edhe atëherë brenda LDK-së ka pasur pakënaqësi për mënyrën e udhëheqjes së koalicionit PDK-LDK. Por, në fund u pa se si përfundoi ky koalicion, i cili u prish për shkak të pakënaqësive”, ka thënë Beqiri, duke shtuar se qeverisja Thaçi është përcjell me skandale.

Edhe deputeti i Lëvizjes Vetëvendosje!, Visar Ymeri, nuk ka pasur fjalë të mira për gjashtë vjet të qeverisjes Thaçi. Ai ka thënë se dy mandatet qeverisëse të Thaçit janë duke u përcjell me degradim politik e ekonomik.

“Të dyja qeveritë e udhëhequra nga Hashim Thaçi, të cilat bashkërisht po i bëjnë 7 vjet në pushtet, janë qeveri të thellimit të pabarazisë ekonomike, përqendrimit të të ardhurave kah të pasurit në dëm të shtresës së mesme dhe të varfër dhe nënshtrimit politik ndaj Serbisë, e zbatimit të koncesioneve të Ahtisaarit për të vazhduar me koncesione të reja në Bruksel”, ka thënë Ymeri për “Epokën e re”.

Ai ka treguar se i tërë ky degradim politik e ekonomik është përcjell me afera të mëdha të korrupsionit e krimit të organizuar që kanë rezultuar në rritje enorme të pasurisë për pushtetarët.

“Ky sundim i Thaçit e degradoi shtetin pa e ndërtuar një herë atë, e vazhdoi shpronësimin nëpërmjet privatizimit, ua uli tatimet të pasurve duke e rritur njëkohësisht (nëpërmjet uljes së tatimit në korporata e duke e rritur TVSh-në), ia dha mbi 850 milionë euro Bechtel Enkas për të vazhduar me kontratë të re, e fali Aeroportin Ndërkombëtar, e fali për pak para KEDS-in, si dhe e zhduki nëpërmjet vjedhjes dhomën e dëshmive në polici”, ka deklaruar Ymeri.

Partitë opozitare, LDK dhe PDK,  kanë braktisë sërish punimet e Kuvendit Komunal në Malishevë. Në mungesë të kuorumit Kuvendi  është detyruar t’i ndërpresë punimet, në të cilën ishte paraparë të zgjidhet Kryesuesi i Kuvendit.

Januz Kastrati nga LDK-ja tha se seanca është thirrur në kundërshtim me ligjin.

“Mbledhja është thirrë në kundërshtim me ligjin dhe tendenca është të vazhdohet edhe me ata 2 delegatë që nuk janë deklaruar nëse duan të jenë shërbyes civilë apo anëtarë të KK-së dhe këto se lejojnë vazhdimin e mbledhjes”.

Kastrati ka komentuar edhe deklaratën e kryetarit të Komunës, Ragip Begajt për mundësin e shkuarjes në zgjedhje të reja për asambleistë në Malishevë.
“Malisheva nuk e ka atë lluks që të shkoj çdo 2-3 muaj në zgjedhje. Kjo tregon se IQM nuk po e respekton vullnetin e qytetarëve”.

“Ne nuk po themi që kryetari s’ka të drejtë të formojë ekzekutivin por opozita nuk ka obligim me ia ba kuorumin partisë fituese e ajo me lujt si të dojë pastaj”.

Enver Hoti, përfaqësuesi kryesor dhe kandidati i IQM-së për kryesues të KK-së , i është kundërpërgjigjur Januz Kastrati i  LDK-së.

“Falemenderit Jonuz për ofertën për bashkqeverisje.Ishte interesante oferta e juaj por mbetet vetëm ofertë dhe ne nuk e pranojmë atë”, tha  Hoti.

“Sikur me ligj të parashihej nënshtrimi i vullnetit të votës së KK-së gjatë formimit të qeverisë do ta bënim këtë, por pasi kjo nuk parashihet kërkojë që të ia japim shancën kryetarit për formimin e qeverisë dhe në do të ua ofrojmë kushtet opizitës për monitorimin e punës së qeverisë”.

Adem Berisha nga PDK-ja  ka thënë se edhe subjakti i tij politik nuk e ndryshon qëndrimin e shperhur më herët.
“Për të menaxhuar me sukses është një metodë strategjike e cila kërkon formulë për zgjidhjen e problemeve dhe formula e strategjia është në dorën e subjektit shumicë”, tha Berisha. /PrizrenPress.com/

Policia ka konfiskuar monedha të falsifikuara në një supermarket të Suharekës.

Komandanti i PK-së në Suharekë, major Arsim Berisha,tha se në supermarket janë shënuar tri raste të monedhave false.

“Monedhat janë bankënota të 50 eurove dhe janë gjetur në njërin nga supermarketet në Suharekë”, tha Berisha.

Ndërkaq, gjatë javës së kaluar në komunën e Suharekës, Berisha tha se është shënuar edhe një dhunë familjare në fshatin Sopijë.
“Një prind ka ushtruar dhunë ndaj djalit dhe vajzës së tij. Përsoni që ka ushtruar dhunën është ndal në arrest”. /PrizrenPress.com/
.

Kryeministri i Kosovës, Hashim Thaçi me rastin e fillimit të 7 vjetorit të qeverisjes së tij, ka falënderuar të gjithë për bashkëpunimin, ndërsa këto vite të qeverisjes i ka quajtur si të suksesshme.
Ai i ka quajtur këto vite, vite të sukseseve të mëdha të shoqërisë kosovare.

“Sot filluam vitin e shtatë të qeverisjes. Bashkërisht shënuam suksese të mëdha, por u ballafaquam edhe me sfida jo të lehta. Jam krenar me të arriturat e përbashkëta të shoqërisë sonë dhe të shtetit tonë të ri. Ju falënderoj për mbështetjen dhe besimin tuaj. U jam mirënjohës edhe kritikëve të qeverisë. Së bashku, kemi bërë shumë. Bashkërisht, kam besim se mund të bëjmë edhe më shumë”, ka shkruar Thaçi.