Zgjedhjet lokale të këtij viti dëshmuan se partitë politike nuk mund të llogarisin më në të kaluarën e tyre të “lavdishme”, por duhet të punojnë në shërbim të qytetarëve, duke zgjedhur problemet e tyre ditore nëpër komuna.
Zgjedhjet lokale treguan një rënie të besimit te lidershipi aktual i Kosovës. Analistët pilitikë, luhatjen e madhe në vota e shohin si një sfidë serioze për mbijetesën e liderëve.

Kryetari i PDK-së dhe kryeministri i Kosovës, Hashim Thaçi, përkundër premtimit të investimeve milionëshe për kandidatët e tij në zgjedhjet e këtij viti, ka shënuar humbje serioze, e cila i paralajmërohet si sinjal i keq për zgjedhjet e vitit që vjen, shkruan Kosova sot. PDK-ja doli me disa komuna më pak, duke humbut kështu shtylla të rëndësishme si Gjilanin, Ferizajin, Mitrovicën, Lipjanin, Malishevën.

Humbës i madh në këto zgjedhje mbetet edhe kryetari i LDK-së, Isa Mustafa. Partia e tij humbi këtë herë bastionin kryesor, Prishtinën. Ndërsa, LDK-ja i është afruar PDK-së me marrjen e 9 komunave të Kosovës.

Lajm i keq ishin këto zgjedhje edhe për kreun e AAK-së, Ramush Haradinaj. Ai gati sa ka filluar të harrohet në bastionin e tij në rajonin e Dukagjinit, sepse humbi katër komuna të këtij rajoni: Pejën, Gjakovën, Rahovecin dhe Suharekën.
Me rezultatin e këtyre zgjedhjeve nuk mund të krenohet as Albin Kurti, lider i Lëvizjes “Vetëvendosje”. Një kombinatorikë interesante e votës së lirë qytetare arriti që ta nxjerrë fitues kandidatin e VV në komunën e Prishtinës, për të qeverisur një mandat të ri 4 vjecar. Por në nivel nacional lëvizja VV radhitet partia e katërt me vetëm 60 mijë e 966 vota.
AKR-ja e Behxhet Pacollit, sfidoi votuesin me fitoren e dy kandidatëve për kryetarë komunash, në Gjakove dhe në Mitrovicë, por kjo fitore e brishtë nuk i siguron shumë të rehatshëm kryetarit pacolli./Kosova sot/

Deputeti Fatmir Limaj ka thënë se Kosova gjatë vitit 2013 në aspektin e përgjithshëm është ballafaquar me sfida si në planin social, politik dhe atë ekonomik.

Ai ka thënë se në zgjedhjet lokale qytetarët me votën e tyre shprehën pakënaqësinë me gjendjen aktuale në Kosovë.

Limaj ka thënë se nuk është i kënaqur me jetën parlamentare në Republikën e Kosovës për faktin se partitë politike nuk kanë qenë shumë aktive. Ai ka shtuar se do ta vazhdojë aktivitetin e tij politik, duke paralajmëruar se mund ndodhin ndryshime pozitive në 2014-n.

Në intervistën e parë për mediet e shkruara dhënë gazetës “Epoka e re”, Limaj ka thënë se qeverisja aktuale më shumë ka shpenzuar energji me dialogun në Bruksel. Ai ka thënë se që në fillim ka qenë skeptik në kabinetin qeverisës të Thaçit.

Limaj ka folur edhe për procesin e tij gjyqësor në rastin “Kleçka”.

Kosova ende nuk ka helikopterë, të cilët do të ndihmonin në situata emergjente, kontroll kufitar e çështje të tjera të nevojshme.
Përfaqësues të institucioneve shtetërore, përgjegjëse për një situatë të tillë thonë se Kosova deri tani nuk ka pasur mundësi financiare, por që kanë krijuar bazën ligjore të nevojshme dhe infrastrukturën që kjo Njësi të ketë vendstacionimin.

Ata vlerësojnë se me asnjë mjet të menaxhimit të situatave emergjente nuk mund të reagohet sikur me helikopterë që mund të shpëtohen jetët e njerëzve, kontrollohet kufiri, kontrollohet komunikacioni, veprohet ditën dhe natën, dhe në kërkim-shpëtim të jetëve të njerëzve, të furnizohen njerëzit atje ku nuk ka asnjë lloj mënyre të furnizohen me medikamente dhe ushqim në rast se izolohen nga bora e madhe, vërshimet, rrëshqitjet, dëmtimi i rrugëve etj.

Në Ministrinë e Punëve të Brendshme thonë se për formimin e Njësisë së Helikopterëve në kuadër të Policisë së Kosovës janë 62 ekspertë të kësaj fushe që nga pilotët, teknikët, inxhinierët, dhe ekipe të tjera mbështetëse të nevojshme për të jetësuar këtë Njësi.

Inxhinieri i aviacionit, njëherit edhe zëvendësministri në Ministrinë e Punëve të Brendshme, Ismet Ibishi, thotë për Kosovapress, se para dy vjetëve ka nisur angazhimin për formimin e kësaj Njësie, duke punuar me ekspertë për procedurat paraprake, duke e cilësuar si jashtëzakonisht të nevojshme.
Ibishi deklaron se i ka dhënë shumë rëndësi kësaj çështje dhe shpreson që Qeveria e Kosovës të jetësoj Njësinë për helikopterë gjatë vitit të ardhshëm, duke e funksionalizuar në kuadër të Policisë së Kosovës.

Kjo Njësi do t’i ketë tre helikopterë, të cilët, sipas Ibishit, dy prej tyre duhet të jenë dy motorësh, duke treguar se është si kriter dhe nuk tolerohen më në vend të urbanizuar të operojnë helikopter tjerë, dhe një i mesëm për reagim në situata emergjente.

Ai shprehet i bindur se disa shtete donatore i kanëtreguar gatishmërinë për të dhënë donacion, dhe për të ndihmuar Kosovën sa i përket fushës së aviacionit.
Zëvendësministri Ibishi tregon se deri tash transporti i doganierëve në veri është bërë me helikopter të EULEX-it, kurse për situata emergjente nuk kanë pasë asnjë mbështetje, por që pret të nënshkruajnë një marrëveshje më Ministrinë e Punëve të Brendshme të Shqipërisë për menaxhim të situatës nga ajri me ndihmën e helikopterëve të Shqipërisë, si zgjidhje e përkohshme.

“Problemi mesa kuptoj unë është në buxhetin e konsoliduar të Kosovës, nuk shoh tjetër arsye ose problem të mundshëm. Po mendoj që, edhe shpresoj që Qeveria në krye me kryeministrin në vitin që vjen, jam i sigurt t’u ja ditë rëndësinë të gjithë, se sa do të thotë për Kosovën, sa është e rëndësishme kjo Njësi, besoj edhe jam i sigurt që Qeveria e din dhe shpresoj që vitin e ardhshëm të gjejë mënyrë për të jetësu këtë Njësi. Me donacione, me një pjesë të buxhetit, me mënyrat të cilat ekspertët, gjegjësisht njerëzit autoritativ që kanë të bëjnë me buxhetin, të gjejnë mënyrë që të jetësojnë këtë Njësi. Sepse, për shtetin, është mbi të gjitha prioritet dhe unë shpresoj që kjo të ndodhë vitin e ardhshëm”, thotë ai.Edhe komandanti i Forcës së Sigurisë së Kosovës, gjeneral-lejtnant Kadri Kastrati, vlerëson se Njësia e Helikopterëve, aktualisht, mund të funksionojë në kuadër të Policisë.

“Kosova, në përgjithësi, nuk i ka kapacitetet e aviacionit të ngritura. Ne si grup drejtues për rishikimin e sektorit të sigurisë, kemi aprovuar, si prioritet i kemi dhënë MPB-së dhe Policisë për arsye se ato kanë nevojë me tepër. Mirëpo, edhe ne, në të ardhmen, në strukturën e ardhshme e kemi në plan që duhet të ngritim kapacitetet e aviacionit apo helikopterëve, në rend të parë të kërkim-shpëtimit, që shumëherë është shfaqur nevoja për dislokim të shpejtë, qoftë ajo për borë apo vërshime, apo çështje tjera që kanë ndodhur”, thotë Kastrati për Kosovapress.

Sa i përket shëndetësisë në situatat kur është dashur të bëhet ndonjë ndërhyrje me helikopterë ju ka ardhur në ndihmë KFOR-i, thotë drejtori në Qendrën Emergjente në Qendrën Klinike Universitare të Kosovës, Basri Lenjani.
Që nga viti 2007 janë munduar t’i bindin institucionet relevante në nivel të shtetit për aero-ambulancë, por ende nuk kanë marrë përgjigje, dhe se duhet të krijohen kushtet për sigurimin e helikopterëve.

“Kosova duhet patjetër ta ketë një ose dy helikopterë për nevojat e Republikës së Kosovës, të cilën e parasheh Ligji për Shërbime Emergjente, që të paktën, domethënë, në qoftë se Qendrës Klinike Universitare i paraqitet nevoja për evakuim të shpejtë, e vetmja mënyrë me qëllim të shpëtimit të jetëve është sigurimi i një aero-ambulance”, thotë Lenjani për Kosovapress.

Në kuadër të Qendrës Klinike Universitare, Klinika Emergjente që nga viti 2007 ka rritë aktivitetet për avancimin dhe fuqizimin e shërbimeve emergjente, duke bërëplanin ideor, gjegjësisht për dizajnimin e ndërtesës së re për Klinikën Emergjente, dhe në kuadër të kësaj si aneks projekt kanë bërë propozimin për ambulancë ajrore.

Kryetari i PDK-së Hashim Thaçi është shprehur i sigurt se subjekti i tij politik, do të dalë fitues edhe një herë në zgjedhjet nacionale, që do të mbahen në vitin e ardhshëm.

“PDK-ja në zgjedhjet e 3 nëntorit ka dal partia e parë në Kosovë. Jam i sigurt se edhe në zgjedhjet e ardhshme do të dalim fitues, madje edhe më fuqishëm”, tha Thaçi.

Kryetari Thaçi të dielën ka marrë pjesë në 14 vjetorin e themelimit të Degës së PDK-së Prizren. Ai ka falënderuar drejtuesit e kësaj dege për sukseset që kanë arritur deri më tash në Prizren.

”Votuesit me 3 nëntor na nxorën fitues në nivel vendi, por edhe na dhanë një mesazh për ndryshim”.

Thaçi ka vlerësuar të suksesshëm vitin 2013-të. “Viti 2013-të ishte viti i sukseseve dhe sfidave për Kosovën ,por edhe për PDK-në”.

Kryetari i Komunës së Prizrenit, Ramadan Muja, ndërkaq ka uruar të gjithë për fitoren e arritur në zgjedhjet e fundit lokale në Prizren. “Fitorja jonë ishte fitore e merituar,prandaj iu falënderoj edhe një herë të gjithë qytetarët për besimin”, tha Muja. /PrizrenPress.com/

Kryeparlamentari Jakup Krasniqi, thotë se skena politike në Kosovë ka nevojë për një rirreshtim të ri. Ai thotë se struktura aktuale politike ka bërë atë çka ka mundur të bëjë dhe tani është koha për ndryshime. Ai paralajmëron themelimin e partisë së re bashkë me Fatmir Limajn.
Në një intervistë për Radio Kosovën, i pyetur a pasur krime lufte nga ana e shqiptarëve dhe a duhet të dalin para drejtësisë ato, Krasniqi thotë se lufta e UÇK-së nuk mund të cilësohet si luftë që i ka shkelur ligjet e luftës.

“Mund të them se është lufta më e pastër që ka mundur ta bëjë një popull për lirinë dhe vendin e vet”, thotë ai.

Krasniqi thotë se nuk është në strukturat e PDK-së dhe se nuk mund të jetë anëtar i thjesht i një partie.

“Unë kam qenë themelues, drejtues, organizator i një partie me të cilën kam vërejtjet të mëdha dhe tash për tash nuk shoh asnjë arsye të jem pjesë përbërëse e atij subjekti”, ka thënë Krasniqi, i cili përmend subjektin e ri politik.

“Konsideroj se në skenën politike në Kosovë duhet rirreshtim i ri. Kjo strukturë politike në Kosovë e ka bërë atë që ka mundur ta bëjë. Mendoj që nuk mund të shkojë përtej dhe duhet të ketë një ndryshim të thellë edhe në politikën në Kosovë, edhe në organogramin politik të Kosovës. Sigurisht që ka të interesuar nga të gjitha kategoritë shoqërore të qytetarëve të Kosovës për të parë një subjekt politik që mendon dhe do të qeverisë më ndryshe në vendin tonë”.

Vërejtjet e tij për dialogun me Serbinë janë se ka qenë i papërgatitur, pa kornizë të çështjeve që janë në interes dhe lehtësim për qytetarët e Kosovës.

“Është folur shumë se këto bisedime janë në shërbim të normalizimit të marrëdhënieve Kosovë-Serbi dhe e vërteta është se pas gjithë këtyre bisedimeve ne nuk e shohim një normalizim të marrëdhënieve ndërmjet dy vendeve tona. Dhe, çka është më kryesorja, nuk e shohim një gatishmëri të Serbisë për t’i marrë fajet dhe përgjegjësitë që ia ka shkaktuar këtij vendi dhe këtij populli, por e shohim një gatishmëri të saj për të penguar në të gjitha format dhe mundësitë që i janë dhënë”

Kryeministri Hashim Thaçi ka shkruar në Facebook se ndihet krenar me fillimin e kompensimit për të gjithë ish-të burgosurit politik, që nga pas Lufta e Dytë Botërore, deri te lirimi i të burgosurit të fundit politik.

“Kompensimi financiar do të jetë 16,70 euro për një ditë të mbajtur në burg. Kompensimi do të realizohet brenda 5 viteve”, ka shkruar Thaçi.

“Vuajtja e ish-te burgosurve politik dhe familjeve të tyre nga Jugosllavia dhe më vonë nga Serbia ishte jashtëzakonisht e rëndë. Sakrifica e tyre ishte burim i inspirimit për gjenerata të tëra për lirinë dhe pavarësinë e Kosovës. Shuma totale do të jetë 55 milion euro. Si mik dhe bashkëluftëtar juaji jam i vetëdijshëm që nuk ka para që mund të paguajë vuajtjen çnjerëzore, të ushtruar ndaj jush nga Beogradi. Kontributi dhe sakrifica juaj është vetë pavarësia e Kosovës”, ka shtuar ai.

Sipas tij, shteti i Kosovës i çmon sakrificën e të gjithë të burgosurve politik

“Ju kisha premtuar, dhe ndihem krenar që e realizuam premtimin. Ju uroj gjithë të mirat për ju dhe familjet tuaja. Shteti i Kosovës çmon dhe vlerëson sakrificën tuaj”.

Njëri prej dhjetë deputetëve më të votuar të LDK’së, Bahri Thaçi paralajmëron rikthimin e Fatmir Sejdiut në krye të LDK’së. Por ai thotë se kjo s’mund të ndodh para se të mbahet Kuvendi Zgjedhor i partisë. Sipas tij, LDK ka mundur të dalë edhe njëqind herë me e suksesshme në zgjedhjet e fundit.

Deputeti i LDK’së, Bahri Thaçi vlerëson se Fatmir Sejdiu duhet të kthehet në krye të LDK’së pas zgjedhjeve të brendshme partiake, të cilat do të mbahen vitin e ardhshëm.

Ai thotë se Fatmir Sejdiu i ka të gjitha potencialet për t’u rikthyer edhe një herë në udhëheqje të Partisë që e kishte themeluar Ibrahim Rugova.

“Unë besoj se pas zgjedhjeve të brendshme në LDK z. Sejdiu i ka shanset dhe potencialet i ka ai të jetë në krye të saj”, ka thënë Thaçi, në një intervistë për Gazetën Express.

“Unë jam për ata se kushdo që e ngritë LDK’në në nivelin më të lartë dhe e bën parti fitimtare. Politika e LDK’së i duhet Kosovës”, ka shtuar ai.

Deputeti që është renditur i dhjeti me më së shumti vota në zgjedhjet e fundit thotë se Sejdiu duhet të kthehet në krye të LDK’së në një proces zgjedhor dhe të marrë votat e strukturave të Partisë.

“LDK e ka Statutin dhe ka disa rregulla. Fatmir Sejdiu mund të kthehet në krye të LDK’së kur të mbahet Kuvendi Zgjedhor i LDK’së. Fatmir Sejdiu e ka shansin e mirë në Kuvendin e ardhshëm me bekimin elektoratit dhe strukturave të LDK’së me u kthye përsëri në krye të LDK’së, pse jo”, ka thënë deputeti llapjan, i cili në zgjedhjet e fundit ka marrë 10 mijë e 571 vota.

Por, cili është vlerësimi i deputetit Thaçi për rezultatin e LDK’së në zgjedhjet lokale?

Përgjigja e tij është se LDK do të mund të kishte edhe njëqind herë me e suksesshme po mos t’i kishte disa mangësi.

“Ka pasur njëfarë suksesi LDK’ja, por ka mundur të ketë sukses edhe 100 herë më të mirë. Shumë faktor kanë ndikuar dhe të gjitha ato mangësi që i kemi pasur në këtë mandat kemi marrë mësim dhe në zgjedhjet nacionale me i korrugju dhe me dalë partia e parë në Kosovë”, ka thënë ai.

Thaçi ka komentuar edhe humbjen e Isa Mustafës në garën për Kryetar të Prishtinës, duke thënë se kundërshtarët politikë kanë shfrytëzuar mangësitë e LDK’së në Kryeqytet.

“Kundërshtarët politikë të LDK’së në Prishtinë i kanë shfrytëzuar disa dobësi, të cilat s’do të duhej të ndodhin. Kur një parti është gjatë në pushte e krijon përshtypjen se gjithçka është e kryer. Mendoj se kjo na ka kushtuar sepse kemi qenë të sigurt se Prishtinën e fitojmë. Ka munguar në finale angazhimi dhe të gjitha partitë janë bërë bashkë dhe e kanë mundur LDK’në”, ka deklaruar Thaçi.

Sidoqoftë, ai thotë se pavarësisht rrethanave LDK duhet të ketë kujdes dhe të ruaj Fatmir Sejdiun dhe të mos veprojë sikur me disa figura tjera që ishin larguar nga kjo parti.

“Z. Sejdiu është një njeri që LDK s’guxon në asnjë mënyrë me humbë. As më herët s’është dashur të humbë shumë njerëz. Nga ajo që më përpara ka humbur shumë njerëz, tash duhet me nxjerr mësim dhe z. Sejdiu, LDK s’guxon me humbë”.