Jakup Krasniqi e Fatmir Limaj nuk pritet ta shpallin partinë e re sivjet. Orientimisht këtë gjë, sipas burimeve të afërta me ta, do ta bëjnë kah fundi i janarit apo fillimi i shkurtit.

“Aktualisht, Krasniqi e Limaj janë duke zhvilluar biseda me qytetarë të fushave të ndryshme, të cilët po shprehin interesim për t’iu bashkuar në formacionin e tyre politik”, ka thënë një zyrtar i PDK-së, që vazhdon t’i ruajë kontaktet me pjesën e të pakënaqurve të partisë. Ai nuk e ka mohuar që në mesin e mbështetësve të idesë për themelim të partisë, ka edhe deputetë të Grupit parlamentar të PDK-së, ndonëse nuk i ka përmendur emrat e tyre.

“Esenca është se ka deputetë. Se cilët janë ata, do të dihen në kohë”, ka thënë ai. I njëjti e ka përjashtuar mundësinë që Krasniqi e Limaj të heqin dorë nga projekti i nisur, megjithëse për të parin ka folur me garanci të plotë. “Thaçi e di se Krasniqi nuk kthehet më në PDK, prandaj atij as nuk i çon njerëz për pajtim. Krejt shpresat i ka te Limaj”, ka thënë burimi i gazetës,shkruan Tribuna

Kreu i Kuvendit nuk ka parapëlqyer të japë shpjegime rreth zhvillimeve të fundit, me arsyetimin se pozicionin e tij e ka qartësuar tash e sa muaj. “Besoj se unë kam qenë i qartë në ato që i kam thënë deri tani. Nuk kthehem në PDK”, ka thënë ai. Faktikisht, Krasniqi ka refuzuar pozitën në Kryesi të PDK-së, të cilën, në mungesë të tij, ia kanë besuar bashkëpartiakut e deritashëm, në Kongresin e fundit zgjedhor

Kuvendi i Kosovës vazhdon edhe sot seancën ku do të shqyrtohet raporti i progresit për Kosovën për vitin 2013.
Kjo pikë e rendit të ditës ishte paraparë të shqyrtohet dje, megjithatë nga vet iniciuesit, deputetët e AAK-së, u kërkua që të shtyhet për ditën e sotme.
Ndryshe dje, deputetët e Kuvendit të Kosovës kanë shtyrë pikën e rendit të ditës ku parashihej debati parlamentar lidhur me ecurinë e procesit të negocimit të Marrëveshjes së Stabilizim Asociimit, por gjithashtu nuk kanë miratuar edhe raportin vjetor të Agjencisë Kosovare të Privatizimit (AKP), për vitin 2012./Kosovapress/

Qeveria e Kosovës nuk është e kënaqur me Bashkimin Evropian dhe rezultatet që po dalin nga dialogu me Serbinë. Pakënaqësitë i kanë shfaqur të dy udhëheqësit e delegacioneve kosovare në dy nivelet e dialogut me Serbinë.

Kryeministri Thaçi në cilësinë e udhëheqësit të delegacionit kosovar në dialogun politik dhe zëvendësja e tij Edita Tahiri, në cilësinë e udhëheqëses së delegacionit në nivelin teknik të dialogut, kanë adresuar të mërkurën dhe të enjten ankesa në nivele të ndryshme të BE-së.

E para ka qenë zv/kryeministrja Edita Tahiri. Ajo të mërkurën ia ka nisur një letër Brukselit ku është ankuar për veprimet e kryetarëve të rinj të zgjedhur në veri të Kosovës, gjegjësisht veprimin e kryetarit të Mitrovicës së veriut Krstimir Pantiq me ftesat për asamblistët e zgjedhur,shkruan Tribuna.

Shefi i Tahirit, kryeministri Hashim Thaçi, ka mbledhur të enjten ambasadorët në Kosovë të 28 shteteve anëtare dhe Përfaqësuesin Special të BE-së Samuel Zhbogar.

Ndonëse në publik ka dhënë mesazhe krejt tjera, burime brenda takimit i kanë thënë gazetës se Thaçi aty ka shprehur rezervat që ka për gatishmërinë e Serbisë dhe për vlerësimet që BE-ja i ka bërë Beogradit duke i dhënë datën e statusit të kandidatit

Shefja e politikës së jashtme të Bashkimit Evropian, Catherine Ashton ka përshëndetur përpjekjet për paqe të kryeministrit të Kosovës, Hashim Thaçi, dhe atij të Serbisë, Ivica Dacic, të cilat, sipas saj, mund të thellojnë stabilitetin rajonal.

“Ata kanë treguar gatishmëri për të punuar në çështje të rëndësishme dhe të vështira, ku secili ka respektuar vijat e veta të kuqe, porse ka qenë i vetëdijshëm edhe për vijat e kuqe të tjetrit”, i ka thënë Ashton një grupi të vogël të gazetarëve, transmeton AFP.

Ajo ka thënë se pas 200 orë bisedimesh, në 20 takime në zyrën e saj në Bruksel, puna e bërë nga dy kryeministrat jep siguri për të ardhmen në Ballkan.

“Për shkak të kohës së kaluar së bashku, dy kryeministrat tani e njohin mirë njëri-tjetrin. Kompetenca e tyre për të biseduar është rritur dhe rritur”, ka thënë Ashton.

Në muajn janar të vitit 2014, planifikohet të përfundojë procesi gjyqësor kundër kryetarit të Prizrenit, Ramadan Muja dhe pesë drejtorëve të tij. Trupi gjykues ka marrë vendim që procesi gjyqësor të vazhdojë me 27 janar 2014. Në këtë seancë gjyqësore është paraparë që Prokuroria të japë fjalën e saj përfundimtare rreth ngritjes së akuzës që ka bërë ndaj Mujës dhe drejtorëve të tij.

Avokati mbrojtës i kryetarit Muja, Ruzhdi Berisha, ndërkaq ka kërkuar nga trupi gjykues kohë për ta thënë fjalën përfundimtare. Ai preferon që fjalën e tij të nëjë varësisht nga ajo e Prokurorisë.

Berisha në cdo seancë gjyqësore ka hedhur poshtë të gjitha akuzat që Prokuroria e EULEX-it e ngarkon klientin e tij, Ramadan Mujën. Sipas tij, nuk ka elemente që veprimet e Mujës përbëjnë vepër penale.

Vetë kryetari Ramadan Muja, ndërkaq ka deklaruar se të gjitha vendimet që i ka marrë kanë pasur për bazë interesin e përgjithshëm të qytetarëve të Prizrenit.

Ish-drejtori i Drejtorisë së Gjeodezisë Kadastrës në Prizren, Kadri Ukimeri, ka mohuar të gjitha akuzat që Prokuroria e EULEX-it ka ngritur kundër tij ,për moszabtimin e aktgjykimit të Gjykatës Supreme të Kosovës.

Ai ka thënë se DGJK-ja vepron sipas kërkesave të palëve. “Kadastra vepron sipas kërkesave te palëve “. Ukimeri ka thënë se nuk ka pranuar asnjë kërkesë nga avokati i Komunës.

“Nuk kam pasur dijeni se për ekzistimin e këtij aktgjykimi, të cilin e kishte marrë me vonesë, gjegjësisht më 2011, pasi avokati i atëhershëm publik i Komunës pothuajse asnjëherë nuk e njoftonte Drejtorinë për Kadastër”. Ai mohoi të ketë pasur ndonjë presion nga Minir Krasniqi.

“S’mund te kem presion as nga Krasniqi e as nga kryetari Muja”, tha Ukimeri,

Ukimeri ishte i pandehuri i fundit, i cili të enjten ka dhënë dëshminë e tij për akuzat që ngarkohet nga Prokuroria e EULEX-it.

Në bazë të aktakuzës së Prokurorisë së EULEX-it, kryetari i Komunës Ramadan Muja dhe ish-drejtori i DGJK-së, Kadri Ukimeri, akuzohen për moszabtimin e aktgjykimit të Gjykatës Supreme të Kosovës të datës 26 maj 2006, që dyshohet se ka rezultuar me një përfitim të paktën për drejtorin e Administratës së Komunës, Minir Krasniqi, M.Q. dhe J.A., në formën e përdorimit dhe përfitimit nga toka komunale.

Kryetarit të Prizrenit, Ramadan Muja, i rëndon një aktakuzë 21 faqesh, me të cilën ai dhe Sadik Paçarizi (Drejtor i Urbanizmit dhe Planifikimit Hapësinor), Avni Ademaj (Ish-u.d. së Drejtorit të Gjeodezisë dhe Kadastrës), Kadri Ukimeri (Ish-drejtor i Gjeodezisë dhe Kadastrës, Abdullah Tejeci (Drejtor aktual i Gjeodezisë dhe Kadastrës dhe Minir Krasniqi (Drejtor i Administratës, akuzohen për shpërdorim të pozitës zyrtare në dhënien e disa pronave shoqërore në shfrytëzim për disa kompani, me qëllim të përfitimit persona./Prizrenpress/

Kryeprokurori i rajonit të Prizrenit, Sylë Hoxhaj, nuk është në dijeni për akuzat që ish-kryetari i Rahovecit,Smajl Latifi, ka bërë në drejtim të kryeministrit të Kosovës, Hashim Thaçit për blerjen e votave në këtë qytet.

Ai thotë se nëse akuzat e Latifit kanë bazë, Prokuroria do të fillojë hetimet. ” Të them të drejtën kam qenë shumë i zënë me punë dhe nuk kam pas kohë t’i përcjell sot gazetat dhe agjencitë e lajmeve në internet. Nuk e kam lexuar një deklaratë të tillë të Latifit, prandaj nuk mund edhe të flasë për këtë çështje”, tha Hoxhaj për “PrizrenPress” .

Ish-kryetari i Rahovecit, Smajl Latifi, ka akuzuar kryeministrin e Kosovës, Hashim Thaçin dhe Ministrinë e Bujqësisë për blerjen e votave në Rahovec. “Ka pasur blerje të votave me anë të subvecioneve”.

“Unë do të doja që ndonjë prokuror të më intervistonte dhe t’i tregoj faktet që kam”.

Kryeprokurori Sylë Hoxhaj thotë ndërkaq se nëse Smajl Latifi, ka fakte për blerje të votave Prokuroria do të nisë menjëherë hetimet për të zbardhur rastin. “Nëse ka bazë, ne do të nisim hetimet këtu s’ka pardon”, thotë Hoxhaj. /PrizrenPress.com/