Grupi i Grave Deputete (GGD), ka reaguar pas disa raportimeve se kuota gjinore prej 30%, kategori kjo e rregulluar me ligj, duhet të bëhet nëpërmjet ndryshimeve kushtetuese. GGD konsideron se një tendencë e tillë po bëhet për të hapur kushtetutën për qëllime të tjera politike që nuk kanë të bëjnë me çështje gjinore.

“Shfrytëzimi i grave për të hapur Kushtetutën është i padrejtë dhe i papranueshëm. Kuota gjinore prej 30% është e rregulluar me ligj, ndërkaq neni 71 i Kushtetutës, tashmë parasheh barazinë gjinore në përfaqësimin në Kuvend. Ky parim kushtetues është përkthyer në masa konkrete të përfaqësimit, duke miratuar kështu kuotën në ligjet që kanë të bëjnë me zgjedhjet e përgjithshme dhe zgjedhjet lokale. Prandaj, tashmë nuk ka nevojë të preket Kushtetuta, për ta rregulluar këtë çështje, që tashmë është e drejtë e fituar. Për më tepër, Kushtetuta parasheh se masat afirmative të cilat kanë për qëllim arritjen e barazisë së grupeve më pak të përfaqësuara nuk konsiderohet diskriminim”, thuhet në reagimin e GGD.

Ato vlerësojnë se kuota është një nga masat afirmative që ka prodhuar rezultate jashtëzakonisht pozitive për pjesëmarrjen e gruas në politikë, që prej mandatit kur ka filluar të aplikohet. Megjithatë, ato në reagimin e tyre thonë se edhe me aplikimin e kësaj kuote, barazia gjinore nuk është arritur, meqë gratë paraqesin 50% të popullatës.

“Prandaj, gratë janë kundër betonimit të 30% në Kushtetutë, e cila pastaj nuk do të mund të ndryshohej pa votim të shumicës së dyfishtë”, thuhet në reagimin e Grupit të Grave Deputete.

Është përuruar objekti i Gjykatës Themelore të Prishtinës-Dega në Gllogoc, i cili është rinovuar nga Qeveria e SHBA-ve dhe ajo e Norvegjisë.

Ky renovim i cili është mbështetur përmes programit për sundimin efektiv të ligjit të USAID-it, është objekti i 20-ë i cili është rinovuar në kuadër të këtij projekti dhe është cilësuar lartë për nga transparenca efikasitet dhe qasja e qytetarëve në të.

Ambasadorja e SHBA-së në Kosovë, Tracy Jacobson, e ka quajtur këtë një hap të madh për sistemin e drejtësisë në vend dhe për shtetin e Kosovës.

“Dëshiroj që të theksoj se përveç se është një prioritet i madh i krejt Institucioneve të Kosovës për krejt punën që bënë USAID-i për renovimin e ndërtesave të gjykatave, ne kemi edhe kolegët nga departamenti i drejtësisë të cilët punojnë me çështje të gjyqësorit dhe sundimit të ligjit si për shembull kontributi i tyre për procedurë penale dhe kodin penal, si dhe trajnimi për teknikat e reja për të zvogëluar rastet e mbetura siç është edhe pranimi i fajësisë. Besoj se sot është e rëndësishme që të flasim edhe për zgjedhjet e lira dhe të qeta në Kosovë dhe dëshiroj t’i përgëzoj të gjithë në sistemin gjyqësor dhe sundimin e ligjit se zgjedhjet që janë mbajtur gjatë muajve kanë qenë të suksesshme”, ka thënë ajo.

Jacobson ka shtuar se provimi final i këtij sistemi do të jetë në zgjedhjet e përgjithshme të cilat pritet të mbahen së shpejti.

Kurse, kryesuesi i Këshillit Gjyqësor të Kosovës, Enver Peci, tha se është një kënaqësi e veçantë pjesëmarrja në renovimin e kaq shumë objekteve të gjykatave në mbarë Kosovën, duke shtuar se gjyqësorit në vend i mbetet që ta kryej punën me nder dhe ta kthej besimin e qytetarëve të cilët siç tha ai, kanë nevojë që t’i besojnë gjyqësorit.

“Në drejtim të asaj që e tha edhe Ambasadorja edhe të gjithë ndoshta është një përshtypje e veçantë që me të vërtetë gjyqësori dhe organet e ndjekjes në këtë radhë e kanë dhënë provimin ta quaj ashtu sa i përket zgjedhjeve ë lira dhe demokratike, ka qenë një koordinim ta quaj ashtu ndërinstitucional i gjithanshëm, një vetëdijesim i qytetarëve dhe një promovim i asaj që me të vërtetë organet e ndjekjesdhe gjyqësori do të veproj në rast se keqpërdoret vota e qytetarit dhe unë po shpresoj se me të vërtetë ajo i dha rezultatet e veta”, theksoi ai.

Kurse, kryetari i Gjykatës Themelore të Prishtinës, Hamdi Ibrahimi, i ka falënderuar të gjithë kontribuuesit në ndërtimin e këtyre objekteve dhe përmirësimin e funksionimit të sistemit gjyqësor.

“Gjithashtu dua të falënderoj edhe Këshillin Gjyqësor të Kosovës në kontributin e tyre në avancimin e drejtësisë në vendin tonë. Sot do të bisedojmë për rolin që e kanë gjykatat në përkrahjen e zgjedhjeve të lira e demokratike dhe se si një gjyqësor i fuqishëm përforcon këto vlera demokratike duke zbatuar procedurat standarde të gjykimit të rasteve që kanë të bëjnë me zgjedhjet në mënyrë që procesi zgjedhor të jetë më i lehtë dhe më efikas”, ka thënë ai.

Kurse, Betim Musliu nga Instituti i Kosovës për Drejtësi, ka thënë se është mirë që këto kushte që janë duke u ndërtuar, që janë duke u mbështetur nga Qeveria Amerikane dhe donatorët tjerë pasi kjo është pjesa më e rëndësishme, për pjesën e pavarësisë së sistemit gjyqësor.

“Mua më vjen shumë mirë që edhe i nderuari Ibrahimi edhe i nderuari Peci tashmë veç e kanë kuptuar secilin problem që ka ekzistuar në të kaluan dhe po e shihni që po i pranojnë ato pjesë të gabimeve që kanë ekzistuar në të kaluarën dhe që kanë punuar për ta ndërruar atë trendin i cili përfill në rastin e trajtimit të lëndëve të zgjedhjeve në 2010 ka qenë vërtetë jomeritor dhe kjo ndikoi edhe në publik sepse dënimet që janë shqiptuar fillimisht nga ana e gjykatave komunale kanë qenë dënime kryesisht me gjobë dhe me kusht dhe dënimet këto të cilat assesi nuk kanë arrit ta mbërrijnë qëllimin e dënimit. Dihet se çka është qëllimi i dënimit, qëllimi i dënimit është që jo vetëm me kuptua pra edhe me vuajt krimin të cilin e ka bërë kryesi por edhe të ndikoj tek të tjetër të arrihet një sensibilizim në lidhje me atë”, ka thënë ai.

Në takim, të pranishmit kanë debatuar kryesisht rreth raportimit dhe intervenimit të gjyqësorit në raportimet e parregullsive në zgjedhjet e 3 nëntorit dhe 1 dhjetorit në Kosovë.

Zëvendëskryeministrja e Kosovës, njëherësh udhëheqëse e dialogut teknik me Serbinë në Bruksel, Edita Tahiri, ka thënë se Serbisë nuk i ka takuar shpërblimi nga Bashkimi Evropian për nisjen e negociatave për anëtarësim.
Sipas saj Serbia nuk e ka zbatuar pjesën esenciale të marrëveshjes së Brukselit, e cila është arritur në kuadër të dialogut ndërmjet Kosovës dhe Serbisë.“Mendoj se Serbia nuk i ka plotësuar kushtet për të qenë e shpërblyer për sa u takon obligimeve për zbatimin e marrëveshjes së Brukselit. Prandaj, pasi nuk i ka plotësuar kushtet zbatuese, nuk i ka takuar ky shpërblim. Serbia nuk e ka zbatuar pjesën esenciale të marrëveshjes së Brukselit, prandaj edhe nuk i ka takuar të marrë këtë shpërblim nga ana e Bashkimit Evropian”, ka thënë Tahiri për “Epokën e re”.

Në këtë kontekst, Tahiri ka thënë se vlerësimi i Bashkimit Evropian për shkallën e zbatimit të marrëveshjes nuk përputhet me realitetin në terren.

“Për sa iu takon kushteve që Serbia ka pasur t’i plotësojë lidhur me marrëveshjen e Brukselit në pjesën esenciale të marrëveshjes, ajo ka dështuar t’i plotësojë këto kushte. Mendoj se vlerësimet që kanë ardhur nga raporti i baroneshës Ashton kanë qenë vlerësime që nuk përkojnë me realitetin, sepse ka vetëm një progres të kufizuar në zbatimin e marrëveshjes nga ana e Serbisë, e cila ka dështuar ta plotësojë pjesën esenciale të marrëveshjes së Brukselit. Prandaj, BE-ja është dashur të jetë më objektive në raportin e vet. Është dashur të bëjë një raport, i cili me të vërtetë është në përputhje me situatën në terren”, ka deklaruar zëvendëskryeministrja Tahiri, duke shtuar se ende nuk ka progres substancial të marrëveshjes së Brukselit.

Po në këtë kontekst Tahiri ka thënë se në raport me dialogun e Brukselit mbetet shumë për t’u bërë nga ana e Serbisë.

“Mund t’ju them me përgjegjësi si kryenegociatore se për zbatimin e marrëveshjes së Brukselit që nuk ka ende një progres substancial të kësaj marrëveshje dhe për këtë përgjegjëse është Serbia me zvarritje, vonesa dhe shmangieje nga zbatimi. Prandaj, mendoj se ky është edhe një mesazh për takimin e nivelit të lartë që mbahet më 20 dhjetor në Bashkimin Evropian, që shefat e shteteve duhet të kenë parasysh se në raport me dialogun e Brukselit mbetet shumë për t’u bërë nga ana e Serbisë”, është shprehur Tahiri.

Ajo ka thënë se duhet të pritet konstituimi i organeve komunale në veri për të parë nëse do të ketë zbatim të marrëveshjes së Brukselit dhe ligjeve të Republikës së Kosovës. “Ende nuk janë zhbërë strukturat paramilitare të ashtuquajtura mbrojtje civile, çështja e gjykatave dhe çështja e zhbërjes së strukturave të drejtësisë dhe integrim të individëve në institucionet e Kosovës ende nuk ka pasur. Pra, është dashur të pritet konstituimi i organeve të reja komunale të dala nga zgjedhjet lokale të 3 nëntorit dhe 1 dhjetorit për të parë se sa do të zbatohet marrëveshja e Brukselit dhe ligjet e Kosovës në katër komunat e pjesës veriore të vendit tonë”, ka theksuar Tahiri.

Të martën Këshilli i Ministrave të Bashkimit Evropian ka shpërblyer Serbinë për progresin e shënuar në kuadër të dialogut. Ministrat e punëve të jashtme të vendeve anëtare të BE-së kanë vendosur që bisedimet me Serbinë të nisin në janar, mirëpo nuk kanë precizuar datën e saktë.

Prej dje pasdite e deri me tani, në Aeroportin Ndërkombëtar të Prishtinës nuk është kryer asnjë aterim apo fluturim për shkak të mjegullës së madhe e cila ka rënë në atë pjesë.

Valentina Gara, zyrtare për informim në ANP, ka thënë për Indeksonline se, për momentin nuk ka fluturime, për shkak të mjegullës dhe dukshmërisë së ulët.
Ajo ka thënë se, sipas Departamentit të Meteorologëve të ANP-së, rreth mesditës pritet të largohet mjegulla për t’u rikthyer përsëri pasdite.
Ndonëse nuk ka fluturime, Gara ka thënë se në aeroport nuk është krijuar ndonjë tollovi e madhe.

Deputeti Rexhep Selimi në deklarimin jashtë rendit të ditës në seancën plenare të Kuvendit të Kosovës tha se lëvizja Vetëvendosje ka paralajmëruar se bisedimet në Bruksel janë një proces që e afrojnë Kosovën me afër Serbisë dhe Serbinë më afër Evropës.

Selimi tha se si rezultat i negociatave dhe i marrëveshjeve Thaçi-Dacic Serbia mori datën e fillimit te negociatave për anëtarësim në BE, ndërsa MUP-i dhe institucionet e Serbisë po legalizohen në Kosovë.
“Ju deputetet, nga cilido grup parlamentar që i keni mbështetur këto negociata me votën tuaj, të vetëdijshëm apo jo, jeni ata që falë mbështetjes suaj kryeministri negocioi me Daçiqin dhe falë këtyre negociatave Serbia mori shpërblimin. Bashkimi Evropian ka mbivlerësuar përparimet që Serbia ka bërë në dialogun me Kosovën, duke i ofruar si shpërblim nisjen e negociatave për anëtarësim. Kështu ju, ia dhatë amnistinë Serbisë, asaj që mbi kurriz mban barrën e krimeve më të rënda kundër njerëzimit, e gjenocidit dhe spastrimit etnik në Kosovë”, u shpreh Selimi.

Ai tha se në negociata u propagandua shumë se negociatorët e Kosovës do të bisedonin patjetër edhe për të pagjeturit shqiptarë qe u vranë dhe u zhdukën nga forcat e Serbisë në luftë.

“Por siç jemi dëshmitarë askush s’i përmendi kurrë në asnjë tryezë në Bruksel. Ditëve të fundit, zbulimin e varrezave të pretenduara në varrezat masive diku në Serbi, familjaret e të humburve e priten me ankth dhe me shpresë se do të mund t’i gjejnë së paku eshtrat e më të dashurve të tyre. Por, ata nuk e dinin se edhe kësaj radhe trupat e të vrarëve nuk e gjeten rrugën e kthimit në atdhe. Familjaret shpresuan por nuk e ditën se me trupat e shqiptarëve Serbia po bënte një pazar. Pesë trupa të shqiptarëve të vrarë Serbia i dha si kapar për diçka që edhe në të vërtetë e mori paraprakisht”, tha ai.

Sipas tij, rastësisht apo jo, asfalti dhe objekti mbi trupat e shqiptarëve në Serbi i përkiste një ndërmarrje që quhej “Kosmet-Put” që në shqip do të thotë “Rruga e Kosmet”, apo “Rruga Kosova”.

“E pra, e di apo nuk e di BE-ja se nëpër çfarë rruge po i afrohet Serbia asaj, Kosmet-Put quhet rruga e Serbisë drejt Evropës, rrugë e cila kalon mbi eshtrat e shqiptarëve të vrarë e të fshehur. Kryeministri i Kosovës bisedon me Kryeministrin e Serbisë, jo për kthimin e trupave të të vrarëve e të zhdukur por për kthimin e atyre që vranë. Ai nuk flet me Daçiqin për t’i kthyer trupat dhe eshtrat e shqiptareve por për kthimin e policëve serbe të MUP-it ne Policinë e Kosovës. Në vend që ta kërkonte nga Brukseli hapjen e Kosovës e cila është kthyer në një vend të izoluar në mes të Evropës, ai me marrëveshjet me Daçiqin ia hapi dyert Serbisë drejt integrimit. Në vend që të kërkonte drejtësi për të gjitha krimet, vrasjet dhe spastrimin etnik ndaj shqiptarëve edhe pas luftës në pjesën veriore të Kosovës, pikërisht këtë drejtësi ia la në dorë atyre që i shkaktuan këto krime”, tha ndër të tjera, deputeti Selimi.

Edhe deputeti tjetër i kësaj lëvizjeje, Glauk Konjufca i bëri thirrje kryeministrit Thaçi “Ndërprisni negociatat me Serbinë, t’i kthehemi vetes dhe projektit kombëtar”.

Para dy ditësh në Bruksel u morën qëndrime të rëndësishme për disa vendet të cilat aspirojnë integrimet evropiane. Aty u konkludua se Serbia i ka plotësuar të gjithë kushtet për fillimin e negociatave të anëtarësimit. Kushtet e mëhershme të Gjermanisë ndaj Serbisë nuk u përmendën më dhe kërkesat plotësisht legjitime të tërheqjes nga veriu i Kosovës nuk i zuri në gojë askush.

Secili në këtë rajon, madje dhe më gjerë, e ka të qartë se në thelb nuk ka ndërruar asgjë sa i përket politikës hegjemoniste të Serbisë. Për gjithë këtë përmbysje të paparamenduar, me ç’rast Serbia po i fillon negociatat e anëtarësimit kurse Shqipëria e Kosova ndodhen ende larg, përgjegjëse pa dyshim që është edhe Qeveria jonë, e cila ndoqi politikën e rehabilitimit të Serbisë, duke e lozur rolin e një fqinji të mirë e të dëgjueshëm që nuk ka asnjë problem serioz me Serbinë.

Në këto tri vite ne ndoqëm me vëmendje dhe me shqetësim çdo hap që bëri Qeveria jonë në raport me Serbinë. Dhe tani në finish e kemi këtë bilanc:

a. ka barrikada që nga mesi i Mitrovicës deri sipër në kufijtë veriorë,

b. ka kryetarë komunash nga lista e Daçiqit që nuk e njohin Kosovën dhe nuk kanë ndërmend t’i binden shtetit tonë,

c.k a ish kriminelë gati për t’u futur në Policinë e Kosovës,

d. ka vijë kufitare me Serbinë pa demarkacion,

e. e kemi footnotën që dobëson ndërkombëtarisht njohjen legjitime të pavarësisë sonë,

f. e kemi bllokimin e njohjeve nga vendet e BE-së,

g. e kemi një gjyqësi dhe prokurori në veri si në kohën e aparteidit, ku gjyqtari shqiptar s’mund të gjykojë qytetarin e Kosovës që është serb.

Më 21 janar 2014 Serbia po ia nis negociatave të anëtarësimit në BE, kurse ne po mbesim me të gjitha këto probleme të mëdha. Duhet ta themi hapur, se është koha e fundit për t’ju kthyer vetes, për t’i ndërprerë negociatat dhe për t’u drejtuar kah projekti politik kombëtar, duke u forcuar politikisht, ekonomikisht dhe ushtarakisht në mënyrë që t’i japim vetes fuqinë për të pasur politikë të jashtme në interes të vendit, e jo në kurrizin tonë, tha Konjufca.