Partitë politike ende nuk kanë përgjigje karshi pretendimeve të disa ish-kryetarëve të komunave për deputet në Kuvendin e Kosovës, e të cilët nuk u rikonfirmuan në pozitat e tyre në zgjedhjet lokale të 3 nëntorit.

Zëdhënësi i Partisë Demokratike të Kosovës (PDK), Blerand Stavilevci, theksoi për Telegrafin se ende është herët të thuhet se a do të jenë ish-kryetarët e komunave nga radhët e PDK-së, të cilët e kanë humbur garën për të parin e komunës, në listat e kandidatëve për deputet të PDK-së në zgjedhjet nacionale.

“Ende jemi herët, kjo do të diskutohet brenda partisë dhe pastaj do të vendoset për këtë gjë, po e theksoj prapë se është ende shumë herët. Sidoqoftë, ne prapë jemi partia e parë në nivel vendi, sipas rezultateve të dala nga zgjedhjet lokale të 3 nëntorit, me numër dukshëm më të madh të votave se partitë tjera”, ka thënë Stavilevci për Telegrafin.

Zëdhënësi i Aleancës për Ardhmërinë e Kosovës (AAK), Ernest Luma, u shpreh se ende është shumë herët që të flitet se kush do të jetë në listën e kandidatëve për deputet nga AAK-ja, sepse sipas tij, sapo kanë përfunduar zgjedhjet lokale.

Ai më tej ka shtuar se dëshira e ish-kryetarëve të komunave që të jenë pjesë e listave për deputet të AAK-së në Kuvendin e Kosovës është normale, “sepse ata pavarësisht se e kanë humbur një betejë, ata mbesin figura të respektuara nëpër komunat e tyre dhe brenda partisë tonë”.

Ndryshe, Qemajl Mustafa, Shukri Buja, Isni Kilaj, Ali Berisha, Smajl Latifi, Pal Lekaj, pas humbjes së garës për kryetar komune në zgjedhjet lokale, kanë shprehur gatishmërinë të jenë pjesë e garës zgjedhore të vitit të ardhshëm për karrigen e deputetit të Kuvendit të Kosovës.

Nga fondi i UNESKO-s riparohen katër kroje në Prizren në mesin e tyre edhe “Fontana” në Shatërvan. Investimet sipas zyrtarëve të Institutit për Mbrojtjen e Monumenteve Kulturore kapin shumën 10 mijë euro. Kroi në ”Shatërvan” sikurse edhe të tjerët përreth kanë pësuar dëmtime të madha nga faktori kohë.

”Fontana” në mes të ”Shatërvanit” të bukur ka marrë një pamje të re. Kjo fontanë ujin e së cilës e pijnë pothuajse të gjithë vizitorët ka ndryshuar edhe pamjen e sheshit të qytetit që është shëtitorja më e frekuentuar. Drejtori i IMMK, Hasan Hoti thotë se intervenimet janë bërë falë fondit të UNESCO-s prej dhjetë mijë eurosh. E përveç kroit në ‘Shatërvan’ intervenime janë bërë edhe në tre sosh tregon Hoti.

Hoti thekson se krojet janë dëmtuar nga faktori kohë, por në disa raste edhe dora e njeriut Ai thotë se për 60 vite kroi i ‘Shatërvanit’ që edhe e quan si simbol të Prizrenit nuk është prekur nga dora e njeriut për intervenime edhe pse ka qenë e nevojshme pasi që ka qenë me gypa prej asbesti të dëmshëm për shëndetin e njeriut,transmeton rtk

Instituti për MMK në Prizren, thotë drejtori Hoti është i përkushtuar që ta ruaj të kaluarën historike të qytetit, ndërsa intervenimet sipas tij janë bërë në përputhje me ligjin për qendrën historike të Prizrenit.

Asociacioni i Komunave Serbe mund të shndërrohet në një “Kali të Trojës” për Kosovën, pasi që do e rrezikoj sovranitetin e Kosovës. Kështu u tha në një tryezë të Organizuar nga Grupi për Studime Juridike dhe Politike, ku u diskutua për komunat serbe në Kosovë dhe reflektimin e tyre në sovranitetin e Kosovës pas zgjedhjeve lokale.

Ambasadori i Mbretërisë së Holandës, Robert Bosch tha se duhet të eliminohen dykuptimësitë e mundshme në Marrëveshjen e 19 prillit sepse nga këto dykuptimësi mund të ketë pasoja për vendin, transmeton KTV. Sipas tij, nëse çështjet nuk sqarohen si duhet, atëherë do të ketë dykuptimësi.

Ndërsa, në këtë tryezë është prezantuar edhe analiza e kryeredaktorit të “Kohës Ditore”, Agron Bajrami, me titull “Bashkësia e Komunave Serbe: Nga një mjet për integrim, drejt një dështimi në krijim”. Bajrami ka thënë se jo rastësisht lista “Srpska’, emërtohet kësisoj, duke aluduar në republikën Srpska të Bosnjës.

Analisti, Belul Beqaj ka thënë se Lista “Serbia” është listë që do t’i shërbej Serbisë në Kosovë. “Asociacioni i Komunave Serbe do të jetë një entitet i Serbisë në territorin e Kosovës e që do të sjellë më shumë probleme se sa që sjellë papunësia dhe varfëria” ka paralajmëruar Beqaj.

Blerim Kuçi për herë të parë ka komentuar humbjen e AAK-së në Suharekë. Ai thotë se përcaktues i fitores së  Sali Asllanajt të LDK-së në këtë qytet, ka qenë PDK-ja.  “ Në Suharekë  vendos partia e tretë për fituesin”,  thotë Kuçi për “PrizrenPress”. AAK-ja nuk ka pritur  se do të humbë në Suharekë.”Nuk kemi pritur se do të humbim edhe pse ishte krijuar një klimë e tillë”.

Kryetari në largim i Suharekës, Blerim Kuçi thotë se gjatë mandatit të tij është bërë një punë e madhe në këtë qytet . Sipas tij, janë realizuar shumë projekte,  të cilat ia kanë përmisuar jetën  qytetarëve.

“Kemi bërë shumë punë. Kemi investuar dhe realizuar të gjitha premtimet që i kemi dhënë”.

Kryetari i ardhshëm i Suharekës, Sali Asllanaj,ditë me parë  ka vlerësuar se gjendja në Komunën e Suharekës është shumë e keqe.

“Qeveria e AAK-së na ka lënë shumë borxhe ,sidomos ndaj biznesve”. Ai tregon se para këtër vitesh kur ia ka dorëzuar detyrën nuk i ka lënë asnjë borxh “Qeverisë së Kuçit”. Ne asnjë borxh nuk ua kemi lënë para 4 viteve. Asnjë problem me stafin nuk e kemi lënë”.

Kryetari në largim i Suharekës, Blerim Kuçi, ndërkaq  nuk pajtohet me këtë konstatim të Asllanajt. Ai thotë se Asllanaj nuk mund të dijë gjendjen në komunë ende pa e marrë detyrën e kryetarit. “ Ai ende nuk e ka marrë detyrën dhe nuk mund ta dijë se cila është gjendja. Ai ka filluar të ankohet ende pa e marrë detyrën. Investimet që i  kemi realizuar,  Asllanaj nuk do të ketë mundësi as me i pa ëndërr, e lërë më zhgëndërr”./PrizrenPress.com/