Ish presidenti i Kosovës dhe ish kryetari i LDK-së, Fatmir Sejdiu ka thënë se ratifikimi i marrëveshjes me Serbinë në Kuvendin e Kosovës ka mundur të bëhet pasi të ishin pjekur mirë kushtet, mirëpo e ka mbështetur një ratifikim të tillë.

Duke folur për reagimet që përcollën ratifikimin e marrëveshjes nga Lëvizja Vetëvendosje, Sejdiu në emisionin Target te gazetarit Donat Syla, ka thënë se kundërshtimet duhet të jenë të argumentuara, por ato të përshfaqen brenda institucioneve.

“Nuk preferoj rrugë tjera që institucionet do t’i vendosnin jashtë funksionit. Mendoj se ka qenë një tabllo jo fort e këndshme ajo që kemi parë”, ka thënë Sejdiu.

Sipas tij, fuqia politike është ajo që determinon zgjidhje të caktuara. “Nuk duhet të përsëritet ajo që ka ndodhur”. “Secili subjekt ka përgjegjësinë e vet se si sillet, pa marrë parasysh se cilat janë ambiciet e tyte”, ka shtuar ai.

Duke folur për qëndrimin e LDK-së në këtë proces, ish udhëheqësi i saj ka thënë kjo parti nuk ishte konsekuente në qëndrimet e saj duke krijuar amulli të përgjithshme te qytetarët.

“Qytetarët nuk e dinin se cili ishte qëndrimi i LDK-së, sepse lidershipi i saj nuk ishte unik në vendime”, ka theksuar ai.

Duke folur për projektligjin për amnistinë i cili pritet të risillet në Kuvend të enjten me disa ndryshime nga ai paraprak, ish presidenti i vendit ka thënë se deputetët duhet të studiojnë mirë atë që do ta votojnë.

“Ta analizojnë cdo fjali. Ajo që është prezantuar deri me tash ka krijuar një situatë që mban peng procesin. Analiza do të sjellë edhe vendime të mira. Të shikohet mirë se kush dhe çka do të amnistohet. Këtu nuk ka amnisti ndaj kryesve të krimeve të luftës dhe krimeve tjera ndaj njerëzimit. Amnistia e përgjithshme nuk duhet të ndodh. Partitë është dashur t’u sqarojnë qytetarëve përmbajtjen e projekt ligjit”, ka shtuar ai,trasmeton Orainfo.

Sa i përket zgjedhjeve lokale të 3 nëntorit, Sejdiu thotë se zgjedhjet në vjeshtën e vonë gjithnjë kanë prodhuar probleme të theksuara dhe mundësi që të abuzohet me votën e qytetarëve.

“Data më e hershme do të ishte më e përshtatshme”.

Sa i përket LDK-së dhe zgjedhjeve të 3 nëntorit, Sejdiu ka thënë se kjo parti duhet të bëjë më shumë nëse do fitoren dhe se ai është i gatshëm të kontribuoj në këtë aspekt.

Sa i përket kandidatëve të kësaj partie për kryetar të komunave, Sejdiu ka theksuar se nuk e di nëse para përzgjedhjes së tyre ka pasur studime dhe analiza.

“Unë e kam takuar dy herë kryetarin Mustafa, mirëpo nuk jam konsultuar rreth kandidatëve edhe pse e njoh mirë strukturën e anëtarësisë së LDK-së”, ka thënë ai, duke shtuar se ai i ka dhënë edhe një ofertë Mustafës, por pa sqaruar më shumë se cila ishte ajo.

Sejdiu nuk i ka fshehur ambiciet për, siç ka thënë ai, rol të përgjegjshëm në LDK, por ka hezituar të thotë se pretendon të rikthehet në postin e kryetarit të partisë.

Deputetja e Lëvizjes Vetëvendosje, Alma Lama, e cila ka dhënë dorëheqje nga kjo parti, ju ka kthyer me të njëjtin tonë ish – koleges së saj, Albulena Haxhiut, e cila mbrëmë tha se Alma Lama është parë të rrijë me njerëz të SHIK-ut.

Vetë Lama ka deklaruar se deputetja Haxhiu, mund të jetë njëra prej anëtarëve të Shërbimeve informative.

Ajo në emisionin Zona B, e Baton Haxhiut, ka folur shumë për daljen e saj nga kjo parti.
Lama ka thënë se edhe Vetëvendosja ka një Kamish, duke aluduar në ish – kolegen e saj, Albulena Haxhiu.

Po ashtu, Lama ka thënë se deputetja Haxhiu, e ka terrorizuar disa herë atë dhe familjen e saj.
Lama ka shtuar ndër të tjera se nuk e ka lëshuar Vetëvendosjen për ndonjë parti, transmeton orainfo.

“Unë nuk jam dalë për të bërë pazare politike. Jam zhgënjyer nga Albin Kurti. Ata më kanë borxh profesionin dhe karrierën politike”, ka thënë Lama.

Kryetari i Rahovecit, Smajl Latifi, ka vazhduar debatin me qytetarët e fshatit Zoqishtë. Latifi informoi banorët e këtij fshati rreth investimeve në komunën e Rahovecit. Ai tha se investimet në komunë janë shpërndarë në të gjitha zonat, ku nuk ka mbetur prapa as fshati Zoqishtë.

“Rregullimi i rrugës dhe pastrimi i rrjedhës së lumit këtu janë ndër aktivitetet qendrore dhe tashmë mund të themi se ka zhvillime pozitive në këtë fshat”, tha LatifiAi tha se tashmë kanë nisur punimet për rregullimin e rrugës fushore Apterushë-Zoqishtë, kurse në plan është edhe mirëmbajtja e dy rrugëve lokale në fshat.

Nuredin Gashi, banor i fshatit tha se zgjerimi i ndriçimit publik dhe shtrirja edhe në disa zona të fshatit do të ishte investim i qëlluar, ndërsa ndërhyrja për rregullimin e disa llambave është e nevojshme. “Po ashtu rregullimi i trotuarit rrit sigurinë e fëmijëve në komunikacion”, tha Gashi.
Avni Shala, kërkoi që projekti i lumit në Zoqishtë që do të futet në shtrat të jetë në përputhje me gjendjen në terren, kurse ndërtimi i një pishine të vogël ku do të freskoheshin fëmijët e fshatit, mbase do të ishte një investim i arsyeshëm./PrizrenPress.com/

Partia Demokratike e Kosovës (PDK) në Prizren ende nuk ka emëruar kandidatin për kryetar të Prizrenit. Deputeti i PDK-së, Nait Hasani tha se është në konsultime me liderin e partisë, Hashim Thaçin, dhe se shumë shpejtë do të dihet emri i kandidatit. “Jemi në konsultime me kryetarin e partisë dhe do të vendosim shumë shpejt”, ka thënë Hasani.

Dega e AAK-së dhe ajo e LDD-së, ndërkaq  në zgjedhjet e 3 nëntorit do të garojnë në koalicion.Këto dy subjekte politike  ende nuk janë përcaktuar për kandidatin që do të garojë në zgjedhje. Emri i vetëm që është lakuar deri më tash nga  këto dy subjekte politike ka qenë ai i Lulëzim Kabashit. Zyrtarizimi i Kabashit pritete të bëhet në ditët e ardhshme.

Kryetari i Lëvizjes  “Vetvendosje”, Arbër Rexhaj, ndërkaq  tha se në ditët në vijim do ta përcaktohet një afat kur ata që janë të interesuar do t’i paraqesin kandidaturat për kryetar  të Prizrenit. “Përzgjedhja  do të bëhet nga anëtarësia e Vetëvendosjes”, tha rexhaj.

Edhe Partia Konservatore(PK), ka paralajmëruar se së shpejti do të dal me kandidatin e saj për kryetar të Komunës së Prizrenit.

Lidhja Demokratike e Kosovës(LDK) dhe Bashkimi Demokratik, deri më tash janë  subjektet e vetëme politike që kanë emëruar kandidatët për kryetar të Prizrenit.LDK-ja do të kandidojë me Eqrem Kryeziun, ndrësa  BD-ja me Zafir Berishën./PrizrenPress.com/

Është i bindur se AAK-ja gjatë këtyre zgjedhjeve lokale do të fitojë komuna edhe jashtë rajonit të Dukagjinit. Kryetari i AAK-së, Ramush Haradinaj ka thënë për Telegrafin se gjatë gjithë kohës është në terren dhe po e vëren rritjen e partisë së tij. Thotë se disa prej kundërshtarëve politikë po e vërejnë këtë dhe po bëjnë akuza, ndërsa përmend akuzën e Lëvizjes Vetëvendosje se AAK-ja është “parti e haraçit”.

“Lëvizja Vetëvendosje e bëri këtë akuzë në momentin kur ata e humbën orientimin, kur e humbën busullën. Ka pasur edhe zëra tjerë që na kanë nxjerrë epitetin e haraçit. Kështu mendojnë të gjithë ata që ndihen të rrezikuar prej forcimit të AAK-së. Ata do të mundohen të na gjejnë diçka, e kanë gjetur këtë epitetin e haraçit, që është rrenë e pastër e tyre”, ka thënë Haradinaj, ndërsa ka vlerësuar se nëse ka informata duhet ta identifikojnë njeriun që qet haraç dhe biznesit që i ka ndodhur, për t’i bërë publike.

Haradinaj ka thënë se i vjen keq për qytetarët jashtë Dukagjinit, sepse vendasit e dinë se çfarë respekti ka AAK ndaj sektorit privat. “Ata janë heronjtë tanë të rinj, ata që hapin vende të punës. Ata që krijojnë vlerë, kuptohet që kemi partneritet të afërt me ta”, ka theksuar Haradinaj.

Sipas tij, edhe kur ka ndodhur që dikush ka mundur të fshihet ose të shfrytëzojë përkatësinë partiake ose diçka të ngjashme, atëherë AAK është distancuar në mënyrën më të pastër dhe më të prerë.

“Ka plotë njerëz të Vetëvendosjes që na kanë thënë se nuk pajtohen me etiketimet se janë njerëz të haraçit. Këta janë njerëz që janë ‘dikushi’ në Vetëvendosje”, ka thënë Haradinaj, duke theksuar se një partneritet formal për bashkëqeverisje me Vetëvendosjen është pothuajse i pamundur, për shkak se ata kanë marrë një drejtim që është duke i sjellë dëme vendit.

Duke komentuar marrëveshjen e arritur në Bruksel, Haradinaj ka thënë se nuk mund të vlerësojë se sa është marrëveshja e mirë, por është për marrëveshjen për faktin që gjendja në veri nuk është e mirë edhe për faktin se po jepet mundësia për ta ndryshuar gjendjen atje.

“Unë mendoj se një pjesë e subjekteve politike, për agjendat e veta të imta janë kthyer në profiterë të imtë, përfshirë edhe njerëz në shoqërinë civile. Kjo për shkak se nëse e sheh që një gjendje për 13 vjet në veri ka mbetur e tillë, e sot nëse jepet mundësia për ta ndryshuar dhe nuk e ndryshon, nuk e kuptoj se kujt i shërbejnë”, ka thënë Haradinaj.

Ai ka vlerësuar se në institucionet e sigurisë, jo vetëm në veri, mund të kalojnë edhe persona me të kaluar të dyshimtë. Por, sipas Haradinajt, në momentin kur vërtetohet se nuk i plotësojnë parametrat për të mbetur në ndonjë institucion të sigurisë, kuptohet që vetvetiu ndërmerren masa ndaj tyre.

“Një gjë duhet ta dinë qytetarët e Kosovës, edhe komandanti i policisë në veri, Nenad Djuric, i ka kaluar disa filtra. Me siguri Djuric ka qenë bashkëpunëtor i Veselinovicit, por nuk dihet se kujt i shërbejnë bashkëpunëtorët më shumë. Mund të ketë qenë më bashkëpunëtor i mirë për të tjerët”, ka thënë Haradinaj.

Sipas tij, çështja e sigurisë ende mbetet përgjegjësi e përbashkët e Kosovës, EULEX-it dhe e KFOR-it, prandaj nëse dikush kalon në litrat e tyre, kosovarët nuk duhet që të shqetësohen,shkruan Telegrafi.

Duke folur për zgjedhjet e ardhshme lokale, Haradinaj ka thënë se një pjesë e medieve AAK-në e trajtojnë ende në matematikat e vitit 2010. “Por, AAK-ja po rritet. Në shumë komuna, përpos atyre që i udhëheqim, sipas parametrave do t’i fitojmë në raundin e parë. Do të jemi fitues edhe në disa komuna të tjera, që janë goxha shumë. E kam problem t’i përmend se nuk dua të bëj diskriminim, por nuk janë më në Dukagjin”, ka thënë Haradinaj.

Ai ka shpjeguar se përveç koalicionit me LDD-në, kanë disa raste koalicion me grupe të organizuara të qytetarëve. “Mund të jenë intelektualët e qytetit, mund të jenë ose grupe të njerëzve që për arsye të ndryshme kanë vendosur të na përkrahin. Këta zakonisht nuk kërkojnë poste dhe privilegje, por vlerësojnë se ne jemi më të mirët”, ka theksuar lideri i AAK-së.

Haradinaj ka thënë se me anë të ofertës që i kishte bërë PDK-së për ta udhëhequr Qeverinë kishte vlerësuar se kualiteti qeverisës nuk mjafton.

Ai ka thënë se AAK është në politikë që nga viti 2000, dhe ka kaluar një situatë jo të lehtë politike për faktin që ai ka munguar gjysmën e kohës.

Kryetari i Forumit Rinor të LDK-së, Enver Sopaj, është shprehur i bindur se kandidati Eqrem Kryeziu do t’i fitojë zgjedhjet në Prizren. Ai tha se të rinjtë e LDK-së, presin një fitore të Eqrem Kryeziut.

“ Eqrem Kryeziu reflekton një qeverisje dinjitoze dhe të pa korruptuar, dhe për atë do ta fitojë Prizrenin”, tha Sopaj.

Sipas tij, Forumi Rinor i Lidhjes Demokratike të Kosovës në Prizren, vlerëson se  Kryesia në Prishtinë, ka marrë vendim të qëlluar që ka emëruar Eqrem Kryeziun për kryetar të Prizrenit.

“Kryeziu padyshim që ka mbështetjen e plotë dhe pa rezervë nga struktura e forumit rinor.Kryeziu reflekton besim në respektimin e ligjit për të qeverisur në mënyrë të drejtë dhe dinjitoze dhe pa korrupsion”, tha Sopaj./PrizrenPress.com/

Në takimin e djeshëm mes Kryeministri të Kosovës, Hashim Thaçi dhe Ivica Daçiq nuk është arritur pajtimi për energjinë dhe telekomunikacionin. Megjithatë, kryeministri Thaçi ka thënë sot se janë afruar maksimalisht gjërat, ndonëse nuk është arritur marrëveshje.

Kryeministri Thaçi, gjatë mbledhjes së qeverisë, ka shtuar se dje në Bruksel është zhvilluar takimi tjetër i radhës, në mes të tij dhe kryeministrit të Serbisë, Ivica Daçiq dhe se nga takimi i djeshëm ka pasur përafrim qëndrimesh për sa i përket temave të cilat janë trajtuar.

“Mund të them lirisht se gjërat e diskutuara dje janë përafruar maksimalisht. Kanë mbetur që disa elemente në të dy tekstet të marrëveshjeve të plotësohen, apo diçka edhe të evitohet. Sot baronesha Ashton do ta vizitojë Beogradin dhe nesër paradite Prishtinën, dhe shpresoj se në ditët e ardhshme do të kemi dakordimin e të dy qeverive sa i përket marrëveshjes së telekomunikacionit dhe energjisë”, ka thënë kryeministri Thaçi.

Presidentja e Republikës së Kosovës, Atifete Jahjaga ka përshëndetur vendimin e Aleancës ushtarake Veri-Atlantike për deklarimin e arritjes së kapaciteteve të plota operacionale të Forcës së Sigurisë së Kosovës.

Në deklaratën e Presidentes thuhet:

Vendimi i NATO-s për të deklaruar arritjet e kapaciteteve të plotë operacionale të Forcës së Sigurisë së Kosovës shënon një sukses të ri të kësaj force dhe për përpjekjet e gjithmbarshme të qytetarëve dhe institucioneve të Kosovës për të ndërtuar një shtet prosperues dhe për të përmbushur vizionin e një force të qëndrueshme me një të ardhme të qartë.

Forca e Sigurisë së Kosovës ngërthen në vete synimin tonë për të krijuar infrastrukturë të plotë të sigurisë, në përputhje me nevojat e Republikës së Kosovës dhe e përgjegjshme për t’iu dalë në ndihmë dhe për t’i shërbyer të gjithë qytetarëve të saj pa dallim. Përkushtimi i palëkundur ndaj misionit të saj për një Kosovë demokratike dhe paqësore e ka renditur FSK-në në mesin e institucioneve më të besueshme të Republikës së Kosovës, sukses ky që u kurorëzua sot me vendimin e NATO-s.

Në këtë ditë të rëndësishme për FSK dhe Republikën e Kosovës, dua të falënderoj posaçërisht për punën e tyre të palodhshme oficerët e FSK-së, NATO-n dhe forcën e saj paqeruajtëse në Kosovë si dhe Gardën Kombëtare Amerikane për mbikëqyrjen dhe përkrahjen konkrete që i kanë ofruar Forcës së Sigurisë së Kosovës, për të kryer të gjitha detyrat që i ngarkohen asaj. Në një të ardhme të afërt presim që Republika e Kosovës të bëhet pjesë e Partneritetit për Paqe dhe anëtare me të drejta të plota e NATO-s.

Në integrimin tonë euroatlantik, FSK-ja do të jetë mekanizëm i rëndësishëm i zbatimit të politikave të emergjencave dhe të sigurisë së vendit tonë dhe i angazhimit dhe kontributit të Republikës së Kosovës në misionet e përbashkëta me partnerët tanë strategjikë ndërkombëtarë.

Eqrem Kryeziu më në fund u është bindur lutjeve të elektoratit dhe të Kryesisë së Lidhjes Demokratike të Kosovës. Ai do t’i hyjë garës për kryetar të Komunës së Prizrenit, edhe pse në 2007-n ishte mundur nga Ramadan Muja. Kryeziu në këtë intervistë për “Epokën e re” ka thënë se nuk ka mundur të prishet me LDK-në.
“Unë nuk e kam projektuar veten për këtë kandidaturë, edhe për qëndrimin që e kam mbajtur publikisht, por pasi ishte një insistim, dhe pse nuk jam i dashuruar fare në pushtet, megjithatë tash që jam në përfundim të karrierës politike nuk munda të prishem me dashnoren – LDK-në”, ka thënë Kryeziu.

Qysh në ditën e parë që është konfirmuar për kandidat për kryetar të Komunës së Prizrenit, Kryeziu ka shprehur optimizëm se mund të fitojë. “Pse mund të besoj unë se do të fitoj. Me të thënë të drejtën unë e kam me borxh t’u tregoj njerëzve se në qoftë se i ka marrë malli për sundim të ligjit dhe për antikurrupsion, unë jam ai i vjetri. Por, tash a më zgjedhin mua a jo, me të thënë të drejtën unë fort nuk mërzitem. Nuk kam nevojë për ta dëshmuar me parullë se kush jam sepse kam dëshmuar para shtatë vjetësh. Por, nëse njerëzit janë përmalluar për atë atmosferë, le të më votojnë mua”, ka thënë ai, per Epoka e re.

Kryeziu e quan veten më të mirin për ta drejtuar Komunën e Prizrenit, duke bërë me dije se nuk është më ai partizani primitiv dhe as që i shkon mendja ta përjashtojë PDK-në e as të tjerët nga “familja e përbashkët”. “Për ta përparuar Prizrenin, unë them se jam më i miri. Si një zot shtëpie burrë. Unë them se këtë shtëpi të përbashkët po ma merr mendja se e përparoj unë më mirë, se jo, jo si përjashtoj fare nga familja as PDK-në e as të tjerët”, është shprehur Kryeziu.