Qeveria e Kosovës ka vazhduar me miratimin e pakos së projektligjeve që dalin nga Udhërrëfyesi për liberalizimin e vizave janë përfshirë komentet dhe sugjerimet e Komisionit Evropian dha janë një nga kushtet të cilat Qeveria e Kosovës duhet t’i plotësojë në kuadër të procesit të liberalizimit të vizave.

Në mbledhje janë miratuar këto projektligje:

– Projektligji për të huajt i cili rregullon kushtet e hyrjes, lëvizjes, qëndrimit dhe punësimit të të huajve në territorin e Republikës së Kosovës.

– Projektligji për azil i cili rregullon kushtet dhe procedurat për njohjen e statusit të refugjatit, mbrojtjes plotësuese, mbrojtjes së përkohshme, statusin, të drejtat dhe detyrimet e azilkërkuesve, personave me status refugjati, si dhe personave të cilëve iu është lejuar mbrojtja plotësuese dhe mbrojtja e përkohshme.

– Projektligji për shtetësinë e Kosovës, i cili përcaktohen mënyrat e fitimit, humbjes dhe rifitimit të shtetësisë së Republikës së Kosovës dhe rregullohen çështje të tjera të ndërlidhura me shtetësinë e Republikës së Kosovës.

– Projektligji për parandalimin dhe luftimin e trafikimit me njerëz dhe mbrojtjen e viktimave të trafikimit, i cili përcakton dispozitat juridike, përmes të cilave, autoriteteve kompetente vendore iu jepen të drejta, obligime dhe përgjegjësi, për:

-parandalimin dhe luftimin trafikimit me njerëz në të gjitha format e tij;
-mbrojtjen e viktimave të trafikuara, përfshirë sigurimin e të drejtave, si ndihmë juridike, ndihmë mjekësore, mbështetje psiko-sociale, sigurimi i kompensimit dhe të drejtave të tjera, për të gjithë personat që supozohen të jenë ose që identifikohen si të trafikuar, pavarësisht gjinisë, moshës, gjendjes martesore, gjuhës, paaftësisë fizike apo mendore, orientimit seksual, kombit, mendimit apo bindjes politike, religjionit apo besimit, përkatësisë etnike apo sociale racës, pronës, lindjes ose statuseve tjera, përmes një qasje te bazuar ne të drejtat e njeriut, në përputhje të plotë me instrumentet ndërkombëtare të të drejtave të njeriut dhe standardeve.
-bashkëpunimin kombëtar dhe ndërkombëtar me qëllim të parandalimit dhe luftimit të trafikimi më njerëz, dhe sigurimit të ndihmës dhe mbrojtjes së viktimave të trafikuara.

– Projektligji për bashkëpunim ndërmjet autoriteteve të përfshira në menaxhimin e integruar të kufirit.

Qëllimi i këtij ligji është rregullimi i bashkëpunimit ndërmjet të gjitha autoriteteve që janë të përfshira në Menaxhimin e Integruar të Kufirit dhe zbatimi i strategjive të përbashkëta të këtyre autoriteteve, në mënyrë që detyrat e parapara për këto autoritete dhe masat individuale që kanë të bëjnë me parandalimin, zbulimin dhe hetimin e aktiviteteve të kundërligjshme penale, kontrollin, monitorimin dhe bashkëpunimin përkatës ndërkombëtar, të përmbushen në mënyrë të duhur, efikase dhe efektive.

– Projektligji për ndryshimin dhe plotësimin e ligjit për kontrollin dhe mbikëqyrjen e kufirit shtetëror, si dhe Projekt ligji për plotësimin dhe ndryshimin e ligjit për financimin e subjekteve politike.

Kabineti qeveritar ka miratuar edhe vendimin për fillimin e procedurave për anëtarësimin e Republikës së Kosovës në organizatën “Open Government Partnership” (OGP).

Vendimi ngarkon Ministrinë e Integrimeve Evropiane që të krijoj një Grup Koordinues i punës për procesin e anëtarësimit në OGP.

Qeveria e Kosovës me anë të këtij vendimi obligohet që të zbatojë të gjitha obligimet që dalin gjatë procesit dhe pas anëtarësimit të Republikës së Kosovës në OGP, thuhet në njoftimin e Kabinetit të Qeverisë.

Në mënyrë që të reduktohet trafiku gjatë sezonit verore, në pikë kalimin kufitare Merdare, Dogana e Kosovës ka vendosur që të hap edhe dy pikë kalime kufitare plotësuese, një në Mutivodë (komuna e Prishtinës) dhe një në Muqibaba (Komuna e Gjilanit) të cilat do të shfrytëzohen vetëm për udhëtarë privat.

Pikë kalimi kufitare i Mutivodës do të jetë i hapur prej orës 08:00 deri në ora 20:00 për të gjitha automjetet jo komerciale, përderisa pikë kalimi kufitare Mucibaba do të funksionoj 24 orë në ditë dhe po ashtu do të jetë i hapur për të gjitha automjetet jo komerciale.

Këto pikë Kalime Kufitare nuk do të përdoren për ngarkesa me mallra komerciale gjate kësaj periudhe.

Drejtori i Përgjithshëm i Doganës së Kosovës z. Naim Huruglica thekson së gjate sezonit verore këto pike kalime kufitare janë shumë të ngarkuara, pasi që shumica e bashkatdhetarëve që e vizitojnë Kosovën gjatë pushimeve verore, kalojnë përmes Serbisë dhe për ketë shkak këto pika mbeten të ngarkuara.

Vite me parë në ketë Merdare për shkak të radhëve të gjata, pritjet kanë arritur deri në 14 ore. Drejtori i Përgjithshëm Huruglica theksoj se “Me hapjen e këtyre dy portave plotësuese ne shpresojmë në reduktimin e radhëve të gjata. I ftoj të gjithë bashkatdhetarët e mi që ta shpërndajnë ketë mesazh, tek miqtë dhe të familjarët e tyre që udhëtojnë nga jashtë. Duke shfrytëzuar këto pikë kalime kufitare mund të kurseni kohë në udhëtimin tuaj drejt dhe nga Kosove. Kjo është një informate shumë e rëndësishme për vizitoret tonë nga diaspora, të cilëve ne iu dëshirojmë mirëseardhje ne Kosovë.”

Hapja e këtyre dy pikave plotësuese per udhëtarët, është si rezultat I bisedimeve ndërmjet Prishtinës dhe Beogradit në dialogun për IBM në Bruksel. Përveç prezencës së Doganës se Kosovës në Mutivode dhe Mucibabe, po ashtu do të jetë edhe prezenca e Doganës së Serbisë në pikat kufitare në anën e tyre, thuhet në njoftim.

Këshilli për Siguri në Bashkësi në Rahovec, vlerësoi të marëtn se gjendja e sigurisë në këtë komunë është e qetë dhe stabile.

Kryetari i komunës Smajl Latifi, tha se në bazë të raporteve ditore që merr nga Policia e Kosovës, gjendja e përgjithshme e sigurisë në komunë është e qetë dhe stabile. “Gjatë kësaj periudhe kohore nuk është raportuar asnjë incident ndëretnik, por edhe rastet tjera të cenimit të rendit e të qetësisë publike, që do të ndikonte në sigurinë e qytetarëve”, tha Latifi.

Ai kërkoi që Policia e Kosovës të jetë më e angazhuar gjatë sezonit të pushimeve verore të bashkëvendësve tanë, të cilët kthehen për t’i kaluar pushimet në vendlindje.

Komandanti i Stacionit të Policisë në Rahovec, kapiten Fazli Morina, informoi se situata e sigurisë në Rahovec është e qetë dhe stabile. “Përjashtuar një rasti të zhdukjes së një personi nga fshati Ratkoc, i cili më pas është gjetur i vrarë në Samadraxhë të Suharekës, ndërsa i dyshuari për kete vrasje është arrestuar, nuk ka pasur ndonjë shqetësim për sigurinë në komunën e Rahovecit”, tha Morina.

Për të rritur sigurinë e qytetarëve dhe të bizneseve komandanti Morina, propozoi që në disa zona të qytetit të vendosen kamerat vëzhguese, pasi që vendosja e ndriçimit publik në qytetet e ka rritur mundësinë e mbikëqyrjes. Po ashtu ai kërkoi sqarime lidhur me miratimin e rregullores komunale për auto-bartësen, ku policia duhet të ketë rol kryesor për zbatimin e saj.

Beqir Hamza, shef i sektorit për Emergjenca në Rahovec njoftoi mbi gjendjen e intervenimeve të zjarrfikësve në terren. Ai tha se në krahasim me gjashtëmujorin e vitit të kaluar ka 50% më pak zjarre dhe aksidente rrugore.

“Ka pasur disa intervenime në rastet e vërshimeve në disa zona të komunës, por nuk ka pasur pasoja në njerëz. Njësia e Zjarrfikësve dhe Shpëtimit është në gjendje mobile për të përballuar zjarret eventuale në fusha dhe pyje”, tha Hamza.

Anëtar i KKSB-së, Ali Hoxha, propozoi që për arsye të rritjes së sigurisë së qytetarëve në disa zona të qytetit të vendosen disa llamba për ndriçim të rrugëve, pasi që rreziku nga qentë endacak në këto rrugica është i madh. /PrizrenPress.com/

Kryetari i Rahovecit, Smajl Latifi kërkoi të martën nga drejtorët e Ekzekutivit që të përgadisinë dhe publikojnë raportin finaciar në faqen zyrtare të Komunës. “Raporti financiar duhet të përmbajë edhe sqarimet adekuate, duke mos lënë hapësirë për komentime të ndryshme”, tha Latifi.

Drejtori i Financave dhe Buxhetit Afrim Limani, ka prezantuar gjendjen e kornizës afatmesme të buxhetit 2014-2016. Limani tregoi se edhe në periudhën në vazhdim, do të ketë përmirësim të infrastrukturës nëntokësore e mbitokësore, bujqësi,rregullimin e rrugëve fushore, kullimin e tokave në disa rajone, rregullimi i terreneve sportive, si dhe investime të tjera në të gjithë lëmenjtë e jetës.

Kryetari Latifi, ndërkaq kërkoi nga drejtorët e drejtorive që të japin kontributin e tyre në plotësimin dhe dhënien e vërejtjeve përkatëse lidhur me KAB-in.

Ai tha se duhet të merren në konsideratë edhe vërejtjet dhe kërkesat e qytetarëve të nxjerra nga debatet e zhvilluara me qytetarë. “Po ashtu duhet të figurojnë kodet për mirëmbajtje të ndriçimit publik, mirëmbajtje të rrugëve fushore, të shtohen fondet për pastrim të rrjedhave të përrenjve dhe rrjedhave ujore, kodi për shpronësime, ndërsa bashkëfinancimi i projekteve me qytetarët duhet të jetë në planifikimet tona”, tha Latifi. Sipas tij, versioni i KAB-it 2014-2016 duhet të jetë i gatshëm deri më 15 korrik.

Duke ju referuar kërkesave të ndryshme të qytetarëve dhe grupeve të OJQ-ve, Latifi kërkoi që përgjigjet të jenë të shpejta dhe në kuadër të mundësive buxhetore të mbështeten aktivitetet me shuma të caktuara. “Edhe drejtoria e kulturës duhet të shqyrtojë mundësitë për dhënien e mbështetjes për klubet sportive e artistike, si dhe për blerjen e një kontingjenti të caktuar librash për nevojat e bibliotekave në qytet dhe në fshatra”, tha ai.

Latifi kërkoi nga drejtorët që të intensifikojnë angazhimet dhe të merren me mbikëqyrjen e punimeve në disa projekte kapitale, duke u fokusuar në projektin përkujtimor “Maja e Shkodranit”, lumin “Rimnik”, në parkun në Polluzhë, si dhe në të gjitha projekte të tjera. /PrizrenPress.com/

Komisioni Qendror i Zgjedhjeve ndonëse ka filluar përgatitjet për zgjedhjet lokale, të cilat do të mbahen më 3 nëntor në 38 komunat e Kosovës, përfshirë edhe ato në veri të vendit, përgatitjet nuk kanë filluar për dy komunat e sapokrijuara, të Rogovës dhe Gjonajve.

Sipas kryetares së KQZ-së, Valdete Daka, pa u ndryshuar Ligji për Ndarjen Administrative të Komunave të Reja, KQZ-ja s’mund të organizojë zgjedhje në dy komunat e reja të Hasit. “KQZ-ja nuk mund të organizojë zgjedhje në asnjë komunë pa u miratuar Ligji për Kufijtë Administrativë”, ka thënë ajo.

Edhe zëvendësministri i Pushtetit Lokal, Basri Musmurati, ka thënë për “Zërin” se në këto dy komuna nuk do të ketë zgjedhje lokale.

“Themelimi i këtyre dy komunave bëhet në momentin që Kuvendi e miraton Ligjin për Ndarjet Administrative të Komunave. Ky ligj në kuvend nuk është bërë, është tërhequr. Prandaj derisa ligji nuk kalon, zgjedhje s’mund të ketë atje”, ka thënë Musmurati.

Sipas tij, meqenëse ligji nuk ka kaluar, atëherë banorët e këtyre komunave në themelim do të votojnë aty ku kanë votuar më parë. Ndërkaq, kryetari i Komisionit për Legjislacion nga LDK-ja, Arben Gashi, ka thënë se LDK-ja e ka kundërshtuar procedimin e këtij ligji për më tutje.

“Kjo është ndërhyrje arbitrare në procesin zgjedhor, prandaj LDK-ja ka qenë dhe mbetet që zgjedhjet të mbahen vetëm në komunat aktuale”, është shprehur Gashi.

Megjithatë, kryetarja e KQZ-së vlerëson se Grupet Punuese për pastrimin e listës zgjedhore deri më tash kanë hequr mbi 30 mijë persona nga listat e votuesve dhe se deri në ditën e votimit do të ketë azhurnim të listës nga Ministria e Punëve të Brendshme.

“Ne kemi punuar deri më tash në azhurnimin e listës, derisa janë shpallur zgjedhjet dhe azhurnimin e listës së votuesve tash e tutje e bën MPB-ja, pra KQZ-ja e merr vetëm ekstraktin”, ka thënë Daka.

Ajo ka pranuar se sfidë për këto zgjedhje do të mbetet pjesëmarrja e serbëve në komunat e veriut të Kosovës.

“Gjithmonë ka qenë sfidë pjesëmarrja e serbëve në votime atje. Mirëpo kësaj radhe do të jetë më ndryshe. Zgjedhjet në katër komunat veriore të Kosovës do t’i organizojë KQZ-ja, ndërsa do ta kemi përkrahjen e OSBE-së, e cila do të ketë rol lehtësues”, ka thënë Daka. Gjithashtu ajo ka thënë se marrëveshje me OSBE-në ende nuk kanë bërë lidhur me organizimin e zgjedhjeve atje.

“Këto ditë pritet ta bëjmë një marrëveshje me OSBE-në. Me gjasë kjo e fundit do të jetë ndërmjetësuese në këtë proces”, ka thënë Daka. Ajo ka bërë me dije se në KQZ tashmë është aprovuar një plan nacional për zgjedhjet për gjithë territorin e Kosovës. “Varësisht nga afatet tjera të nevojshme do të fillojmë me përgatitje të tjera siç parashihet në Ligjin për Zgjedhjet Lokale dhe të Përgjithshme”, ka thënë Daka.

Shefja e KQZ-së ka bërë me dije se të gjitha partitë serbe të cilat dëshirojnë të konkurrojnë në këto zgjedhje duhet t’i kryejnë procedurat, në mënyrë që ky institucion ta bëjë certifikimin për pjesëmarrje në zgjedhjet lokale. Gjithashtu, sipas saj, së shpejti do të fillojnë hartimin e planit të sigurisë me Policinë e Kosovës për ditën e zgjedhjeve.

Hulumtimi më i madh i opinionit në botë për korrupsion tregon se më se gjysma e të aketuarve besojnë se ai është përkeqësuar në vendet e tyre.

Por, monitorimi i kryer nga organizata Transparency International me seli në Berlin, thotë se afro 90% të të anketuarve janë të gatshëm ta luftojnë korrupsionin, duke nënshkruar peticione dhe duke protestuar.

Barometri Global i Korrupsionit 2013 është mbështetur në intervistat me 114 mijë njerëz në 107 vende.

Më tepër se një e katërta e të anketuarve në gjithë botën, kanë raportuar se kanë paguar ryshfet në vitin e fundit, përfshirë më se 40% në Afganistan dhe Kirgizi, më se 30% në Kazakistan dhe Ukrainë dhe më se 20% në Irak dhe Serbi.

15 – 19.9% të të anketuarve në Kosovë dhe Maqedoni kanë thënë se kanë paguar ryshfet gjatë vitit të fundit, në njërin nga sektorët e policisë, judikaturës, regjistrimit, pronësisë, mjekësisë, arsimit, tatimit dhe shërbimeve, transmeton REL.

Më pak se 5% kanë paguar ryshfet në Gjeorgji.

Partitë politike konsiderohen institucionet më të korruptuara në pjesën më të madhe të vendeve.