Kabineti i kryetarit të Komunës së Prizrenit, Ramadan Muja, ka reaguar ndaj akuzave të LDK-së.

“Komuna e Prizrenit, njofton opinionin e respektuar qytetar, publik e politik se kryetari i Komunës, prof.dr. Ramadan Muja dhe të gjithë drejtorët e drejtorive komunale janë duke përmbushur të gjitha detyrimet e tyre ligjore dhe janë duke kryer të gjitha angazhimet politike dhe administrative në komunë”, thuhet në komunikatë.

“Komuna e Prizrenit dhe kryetari prof.dr. Ramadan Muja është duke realizuar të gjitha projektet e votuara nga Kuvendi i Komunës dhe vazhdimisht kërkon nga të gjitha drejtoritë që cilësisht dhe më përformancë të lartë e efikasitet komuna jonë të ofrojë shërbime dhe përmes projekteve të ndihmojë në përmirësimin e vazhdueshëm të cilësisë së jetesës për qytetaret tanë në qytet dhe në fshat”

Paraqitja e kryetarit të komunës prof. Dr. Ramadan Muja, në seancat gjyqësore është treguesi më i mirë se ne respektojmë institucionet e shtetit të Kosovës, siç është gjykata dhe jemi të gatshëm për të bashkëpunuar gjithherë kur është e nevojshme.

“LDK-ja duhet të ndihët e fyer nga pretenca e komunikatës së saj që të injorojë institucionet relevante të shtetit dhe përmes kësaj komunikatë është duke u treguar qartë se ende nuk është e gatshme të kuptoj interesin publik dhe të respektojë kërkesat institucionale. Më këtë qasje LDK-ë, po tregon së dëshiron që të jetë opozitë politike në Prizren edhe për shumë vite, ngase kapacitetet e politikave institucionale ende nuk i ka të qarta”

“Në respektim të qytetarëve të komunës sonë, ju njoftojmë së administrata komunale dhe të gjitha drejtoritë janë duke kryer me ndershmëri të gjitha kërkesat e qytetareve dhe duke u kujdesur vëmendshëm për të gjithë qytetarët.Komuna jonë është e hapur dhe e gatshme që të vërtetojë me dokumente së LDK-ë, po gënjen edhe rreth shpenzimeve për dreka dhe telefona”.

“Komuna e Prizrenit dhe kryetari, prof dr. Ramadan Muja, vazhdon që të respektojë qytetarët dhe kërkesat ligjore dhe jemi të gatshëm që së bashku më të gjithë qytetarët të hartojmë politika publike përmes konsultave dhe sugjerimeve më të vetmin qëllim që vendimmarrja në komunën tonë të jetë sa më gjithëpërfshirëse, transparente dhe demokratike.

Komuna e Prizrenit, gjegjësisht drejtoria e arsimit më kohë ka zhvilluar politikat e tenderimit për ngrohjen e shkollave të komunës sonë dhe deklarojmë së asnjë shkollë në komunën tonë nuk është pa ngrohje.

Kryetari i komunës së Prizrenit, prof.dr. Ramadan Muja vazhdon që të përmbushë deklarimin e tij publik së do të jetë kryetar i të gjithë qytetarëve dhe do të respektojë edhe alternativat tjera në ide dhe propozime në dobi të të gjithëve”/PrizrenPress.com/

Lidhja Demokratike e Kosovës (LDK) në Prizren, ka akuzuar pushtetin lokal për lënien pa lëndë djegëse të shkollave.

Zëdhënësi i LDK-së, Nderim Gashi tha se Drejtoria e Arsimit e ka pasur për obligim që përgatitjet për stinën e dimrit t’i bëjë muajin e kaluar.

“Në fushatë PDK-ja po premtohen qindra miliona euro, ndërsa nxënësit në shkollat e Komunës së Prizrenit, po mërdhihen nga të ftohtit”, tha Gashi.

“Drejtoria e Arsimit ka qenë e obliguar që përgatitjet për stinën e dimrit t’i bëjë deri më 15.10 .2013, ndërsa sot jemi me 19.11. 2013 dhe shkollat në Prizren nuk kanë lëndë djegëse për ngrohje”.

Sipas tij, në qeverinë lokale në Prizren, po mbretëron anarkia. “Drejtorët të cilët gjithashtu janë në procese gjyqësore nuk i kryejnë as detyrat elementare”, tha Gashi. /PrizrenPress.com/

Kandidati për kryetar të komunës së Rahovecit nga Aleanca për Ardhmërinë e Kosovës (AAK), njëherësh kryetari aktual, Smajl Latifi, ka thënë të hënën se edhe pas 1 dhjetorit do ta qeverisë këtë komunë.

Në këtë intervistë për “Epokën e re”, ai ka thënë se në balotazh qytetarët do ta vlerësojnë punën e qeverisjes së deritanishme dhe do ta konfirmojnë fitoren e AAK-së.

“Kemi punuar shumë gjatë periudhës trevjeçare të qeverisjes. Mendojmë se qytetarët do ta vlerësojnë punën tonë dhe do të na japin edhe një mundësi që në katër vjetët e ardhshëm të punojmë edhe më shumë për interesat e qytetarëve, për zhvillimin e Rahovecit, për përparimin e komunës sonë si dhe për forcimin e pozicionit të komunës sonë. Për realizimin e këtyre ne e kemi gatishmërinë, energjinë, vullnetin dhe vizionin. Prandaj, fitorja do të na konfirmohet në raundin e dytë të zgjedhjeve më 1 dhjetor. AAK-ja dhe unë do ta vazhdojmë qeverisjen në Rahovec”, ka deklaruar Latifi.

Ai ka thënë se projekti i AAK-së do të jetë projekti fitues i raundit të dytë të zgjedhjeve.

“Jemi të bindur se do të fitojmë sepse alternativa të cilën e kemi dëshmuar deri më tani, të cilën e kemi përgatitur për qytetarët e komunës së Rahovecit për katër vjetët e ardhshëm, është alternativë serioze, një alternativë e pasur me argumente që do t’u mundësojë qytetarëve të komunës sonë të jetojnë më mirë dhe të përjetojnë ndryshime të vazhdueshme pozitive për të cilat ata kanë nevojë çdo ditë”, ka theksuar Latifi.

Duke folur për arritjen e rezultatit të PDK-së më 3 nëntor, ka thënë se ka ndikuar përdorimi i makinerisë shtetërore nga ky subjekt politik.

“Janë evidente ardhjet e shumta në mënyrë të organizuar dhe përdorimi i makinës shtetërore në komunën e Rahovecit. Në ditët e fundit ka pasur ndërhyrje të nivelit qendror nëpërmjet dhënies së subvencioneve për vreshtarët. Tekefundit, mirë që i kanë dhënë këto subvencione, por dihet pse i kanë dhënë. Prandaj rezultati duhet të shihet nga ky këndvështrim”, është shprehur Latifi.

Kanë mbetur edhe dhjetë ditë kur në 25 komunat e Kosovës do të zhvillohet balotazhi për kryetarë të komunave. Në planin operacional, që në parim e ka miratuar Komisioni Qendror i Zgjedhjeve, fushata zgjedhore është e paraparë nga 25 deri më 29 nëntor. Megjithatë, kjo nuk është vendimtare.

Vetë kryetarja dhe anëtarët e KQZ-së kanë dilema se sa duhet të jetë fushata para balotazhit.

Për partitë politike dhe kandidatët që janë në balotazh nga zgjedhjet e 3 nëntorit, duket se nuk ka pasur fare pushim të fushatës zgjedhore pas raundit të parë. Këtë e ka vënë re edhe kryetarja e Komisionit Qendror të Zgjedhjeve, Valdete Daka.

“Fushata zgjedhore s’është ndërprerë hiç dhe është në vazhdim e sipër”, ka thënë Daka të shtunën në mbledhjen e KQZ-së.

Driton Selmanaj nga Instituti Demokratik i Kosovës kritikon këtë qasje të subjekteve politike. “Mendoj se kjo qasje deri sot e subjekteve politike, po e shfrytëzojnë vakumin juridik në Kosovë dhe po bëjnë çmos që qytetarët e Kosovës gjithmonë të jenë nën presionin e tyre që ata të jenë në qendër të vëmendjes në mënyrë që të ndikohen për të marrë votat për zgjedhjet e balotazhit”, tha Selmanaj për Radio Kosovën.

Legjislacioni i aplikueshëm në Kosovë, nuk i sanksionon subjektet politike që fillojnë fushatën para kohës. Prandaj, Selmanaj thotë se duhet të vendosen masa sanksionuese për ato subjekte politike në mënyrë që ato të jenë shembull i respektimit të ligjit në Kosovë.

Ndryshe, KQZ-ja në mbledhjen e së shtunës ka miratuar në parim planin operacional të Sekretariatit të KQZ-së, ku është e përfshirë edhe periudha e fushatës nga 25 deri më 29 nëntor, mirëpo kjo çështje ka mbetur e hapur.

Zëdhënësi i KQZ-së Valmir Elezi tha se shumë shpejt do të dihet sa do të zgjas fushata. “Komisioni Qendror i Zgjedhjeve do të marrë vendim për kohëzgjatjen e fushatës së balotazhit. Zakonisht kjo periudhë është më e shkurtër”, tha Elezi për Radio Kosovën.

Sipas ligjit, kohëzgjatja e fushatës për raundin e dytë të zgjedhjeve për kryetarë të komunave, caktohet me vendim të veçantë të KQZ-së.

Ambasadori i Republikës së Kosovës në Republikën e Sllovenisë, Nexhmi Rexhepi, në një ceremoni zyrtare në Pallatin Presidencial në Lubjanë, ia ka dorëzuar letrat kredenciale presidentit të Republikës së Sllovenisë, Borut Pahor.Pas ceremonisë së dorëzimit të letrave kredenciale, presidenti Pahor dhe ambasadori Rexhepi, kanë zhvilluar një bisedë miqësore, me ç’rast presidenti Pahor i ka uruar mirëseardhje në Republikën e Sllovenisë ambasadorit Rexhepi, si dhe ka shprehur kënaqësinë e tij për marrëdhëniet e shkëlqyeshme bilaterale ndërmjet Sllovenisë dhe Kosovës.

Ambasadori Rexhepi, e ka falënderuar presidentin Pahor për mikpritjen dhe akreditimin e tij, si dhe i ka përcjell përshëndetjet e përzemërta të presidentes dhe të Qeverisë së Republikës së Kosovës. Po ashtu, ambasadori Rexhepi e ka njoftuar presidentin Pahor për proceset nëpër të cilat po kalon vendi.

Presidenti Pahor ka ritheksuar mbështetjen e tij të plotë për forcimin e fuqizimin e vazhdueshëm të marrëdhënieve ndërmjet dy vendeve në rrafshin politik dhe ekonomik, si dhe po ashtu ka nënvizuar se Sllovenia do të vazhdojë të mbështesë Kosovën në rrugën e saj të integrimeve evropiane.

Ambasadori Rexhepi, është ambasadori i tretë i Kosovës në Slloveni. Para këtij mandati, ai ka shërbyer si ambasador i Kosovës në Mbretërinë e Holandës.