Zëvendësministri i Integrimit Evropian, Gëzim Kasapolli ka thënë se brenda dy muajve do të kthehen të gjithë kosovarët që po mbahen në qendrat e ndalimit në Hungari. Në emisionin Interaktiv, ai ka bërë të ditur se institucionet e Kosovës janë në kontakt të vazhdueshëm me autoritet hungareze që kthimi të bëhet sa më shpejt.

“Besoj që brenda 2 muajve të ardhshëm do të përmbyllet kthimi i të gjithë atyre kosovarëve që janë në Hungari të paktën”, ka thënë Kasapolli, duke shtuar se trendi i njëjtë do të bëhet edhe me vendet tjera ku ka azilkërkues kosovarë.

Ai ka pranuar se një nga arsyet kryesore i këtij fluksi të azilkërkuesve janë edhe kushtet e vështira sociale por ka thënë se duhet të bëhet e qartë se meqenëse Kosova është pjesë e listës së bardhë ku gjendja ekonomike dhe politike është e mirë, atëherë vendet e BE-së nuk japin azil për kosovarët.

Një ditë më parë edhe shteti i Belgjikës i është shtuar vendeve që nuk do të japin azil për kosovarët. Ky shtet thotë se Kosova është në listën e vendeve të sigurta, andaj brenda 15 ditësh pothuajse të gjithë azilkërkuesve do t’u refuzohet kërkesa për qëndrim. Muajt e fundit dukuria e migrimit të qytetarëve të Kosovës është rritur dukshëm.

Udhëheqësi i Departamentit të Diasporës në AAK, Jahja Lluka, ka thënë të se institucionet e Kosovës duhet ta marrin më seriozisht çështjen e migrimit të qytetarëve. Ai ka thënë se kjo dukuri është shqetësuese për të ardhmen e rinisë dhe të shtetit të Kosovës.

“Trendi në rritje i migrimit legal dhe ilegal të qytetarëve të Kosovës për në vendet e ndryshme të botës duhet të jetë shumë shqetësues për institucionet e vendit, në veçanti për Qeverinë e Kosovës, e cila duhet të krijojë kushte më të mira për qytetarët dhe rininë tonë. Migrimi po ndodh për shkaqe ekonomike dhe ky është rrezik shumë i madh edhe për qytetarët që e marrin këtë rrugë. Mos të flas edhe për dëmin që po i shkaktohet Kosovës për liberalizimin e vizave”, ka thënë Lluka në intervistën për “Epokën e re”.

Ai e ka akuzuar Qeverinë e Kosovës se nuk ka bërë asgjë për ta parandaluar migrimin ilegal që nga tragjedia e lumit Tisa. Lluka i ka bërë thirrje Qeverisë që urgjentisht të merret me problemin e mërgimit ilegal, e cila, sipas tij, është rrugë pa kthim për qytetarët e Kosovës.

“Qeveria e Kosovës duhet ta marrë me shqetësim këtë punë e jo vetëm me fjalë sepse ka shumëçka që mund të bëhet në këtë drejtim. Ka mundësi nëpërmjet hapjeve të vendeve të reja të punës, më shumë në fshatra, apo edhe me subvencione nga Ministria e Bujqësisë”, ka theksuar Lluka.

Mosdeklarimi i financave dhe fshehja e donacioneve nga partitë politike në vend është konfirmuar edhe nga Auditori i Pavarur. Pas organizatave joqeveritare në vend dhe mediave lidhur me fshehjen e donacioneve dhe deklarimin e mjeteve vetëm nga Fondi për Demokraci, për partitë një përgjigje në këtë drejtim ka dhënë dhe auditori, duke verifikuar madje se partitë bëjnë manipulime dhe me fatura.
Përveç PDK-së, LDK-së, AAK-së që llogariten si partitë më të mëdha në vend dhe të tjerat parti nuk kanë treguar korrektësi lidhur me mjetet e shpenzuara financiare gjatë fushatave.

Në raportin e Auditimit, një kopje të së cilit posedon “Zëri” tek te gjeturat theksohet se Aleanca Kosova e Re (AKR) ka disa fatura të periudhës së vitit 2011 ku nuk është zbatuar parimi aktual, disashpenzime nuk janë mbuluar me faturë tatimore siç kërkohet nga ligjet në fuqi por vetëm me kuponë, disa fatura për shpenzimet e rrymës janë paguar në emër të personave që nuk ishin kontraktor për qera.

Më 17 shtator 2012 për AKR-në është bërë një pagesë nga jashtë me vlerë 7,221.00 euro- Ndrek Volkspar. Prandaj, kësaj partie i bëhet e ditur në raport se ndihma financiare nga jashtë është në kundërshtim me Ligjin për financimin e Partive Politike. “Nëse ndihma financiare nga jashtë bëhet për trajnime dhe seminare atëherë Subjekti Politik duhet të gjejë një formë që përmes OJQ-ve të kryhen këto trajnime dhe seminare.

Çdo shpenzim të ndodhur ta mbuloni me dokumentacion përkatës të plotë-fuqishëm siç janë faturat, kontratat… etj duke aplikuar Ligjin për TVSH-në”, i rekomandohet AKR-së, ku po ashtu i tërheq vërejtja që tek shpenzimet e rrymës, duhet t’i rregullojë faturat me qiradhënësin që faturat të faturohen në emër të Subjektit Politik ose të qiradhënësit të rregullohen me kontratë.

Ndërkaq, për Lidhjen Demokratike të Dardanisë (LDD) auditori ka gjetur se i mungon dokumentacioni lidhur me pagat, kontratat me të punësuarit, kalkulimet, pagesat, pagesat e tatimeve dhe kontributeve. “Nuk është prezantuar ndonjë raport i bankës apo i arkës, as faturat për shpenzimet e prezantuara”. LDD rekomandohet të respektojë parimin e aktualitetit që vetëm të hyrat dhe shpenzimet e periudhës raportuese të raportohen dhe t’i përmbahet Ligjit për Financimin e subjekteve politike, për përmbajtjen e dokumentacionit në raportin financiar vjetor.

Ndërsa tek Partia Demokristiane për Integrim (PDKI) auditori thekson se shpenzimet në pasqyrën e të hyrave dhe shpenzimeve janë prezantuar gabimisht në krahasim me pasqyrën e shpenzimeve analitike – 1,520.00 sipas pasqyrës dhe 10,630.00 sipas analitikes së shpenzimeve.

“Donacione nga persona që nuk janë banorë të Kosovës-adresa e vendbanimit jashtë Kosovës, të cilët kanë kontribuar me valute shkruan Fr. Nuk është dhënë data e saktë e dhënies së donacionit që të mund të verifikohet kursi i këmbimit të valutave. Shumica e shumave të paguara janë në Franka (francez apo zviceran nuk dihet) dhe disa (6) persona nga Kosova, por pa numër personal, në euro, ndërsa totali është në Euro. Ky subjekt politik rekomandohet të merr për bazë Ligjin për financimin e subjekteve politike me rastin e pranimit të kontributeve në të holla.

“Të hyrat dhe shpenzimet në pasqyra dhe në shpalosje duhet të jenë të harmonizuara”, thuhet në raport. Edhe për Partinë Liberale të Kosovës (PLK) auditori ka konstatuar tek të gjeturat se tek të hyrat (nga anëtarësia)prej 12,500.00 eurove mungon dokumentacioni dhe nuk është plotësuar formulari përkatës. “Ka dallim në mes të shpenzimeve në pasqyrën e të hyrave dhe shpenzimeve në krahasim me pasqyrën e shpenzimeve analitike. Shpenzimet e përgjithshme në pasqyrën e të hyrave dhe shpenzimeve janë prezantuar për të balancuar kontributin nga anëtarësia, por nuk janë prezantuar tek shpenzimet analitike”.
Auditori mes tjerash ka rekomanduar këtë parti se duhet t’i përmbahet formatit të formularëve të përcaktuar nga KQZ-ja si dhe të aplikoi ligjet e aplikueshme tatimore të Republikës së Kosovës sidomos për TMB, kontribute pensionale në të ardhura personale dhe tatimin në qira.

As partitë e komuniteteve nuk ndodhen në pozitë më të mirë sa i përket respektimit të Ligjit për Financimin e Subjekteve Politike. Disa parti si Srpska Socijal Demokratska Stranka, Srpska Kosovsko Metohijska Stranka , Stranka Demokratskih Promjena, Srpska Narodna Stranka , Social Demokratska Stranka Gore,…kanë dorëzuar formularët të paplotësuar me zero.

Ndërkaq, për Srpska Demokratska Stranka Kosova i Metohije (KIM) tek të gjeturat në raport thuhet se edhe në vitin 2012 (përveç dy pagesave për KRM pastrimi) të gjitha pagesat janë kryer me të gatshme, megjithëse SP e ka të hapur llogarinë bankare”. Për këtë parti auditori ka theksuar se artikujt e blerë nuk dihet çfarë artikuj janë, nuk përshkruhet kujt i është dhënë dokumentacioni, janë lëshuar fatura në emër të personit fizik dhe jo subjektit politik.

Po ashtu për këtë parti në raport thuhet se është vërejtur mos respektimi i parimit të aktualitetit-pagesa e shpenzimeve për vitin 2010, nuk janë paguar tatimet dhe kontributet në paga dhe tatimi në qira.
Nga KIM auditori ka kërkuar që me qëllim të respektimit të parimit të transparencës duhet të kryej pagesat nga llogaria bankare jo të kryej pagesa me para të gatshme, duhet të respektohet parimi i aktualitetit që vetëm të hyrat dhe shpenzimet e periudhës raportuese të raportohen, Subjekti politik duhet të përdor faturat tatimore sepse ka cilësinë e personit juridik e jo kuponët që janë vetëm për persona fizikë.

“Rekomandojmë subjektin politik që me qellim të respektimit të parimit të transparencës në shfrytëzimin e parave publike të zbatoj procedura dhe rregulla nga Ligji i Prokurimit publik në Kosovë”. Kurse, partia tjetër Samostalna Liberalna Stranka (SLS) tek të gjeturat ka dal se nuk i bart shënimet në Pasqyra Financiare nga viti paraprak (2011).

“Të dhënat për bilancin e gjendjes nuk janë prezantuar siç duhet sipas Bilancit të gjendjes nuk barazohet…. Detyrimet në fund vitin e kaluar sipas raportimit SP i ka paraqitur me vlerë zero ku e vërejmë se nuk është prezantuar drejt sepse patjetër duhet të ketë detyrime në fund të vitit siç është tatimi i muajit dhjetor”. Po ashtu auditori ka konstatuar se SP tek pasqyra e të hyrave dhe shpenzimeve nuk ka paraqitur hyrat nga buxheti i Kosovës – subvencion për partitë politike me vlerë : 266,000.00 euro. SP në këtë pasqyrë ka paraqitur te hyrat zero, ndërsa shpenzimet 128,324.03, të dhënat nuk janë prezantuar siç duhet.

Po ashtu kjo parti nuk paguan TMB për paga, kontributet pensionale si dhe për qira. “Subjekti Politik ka bërë tërheqje nga llogaria bankare. Nuk ka udhëhequr ditarin e arkës të arsyetojë me fatura këto shpenzime veç janë bërë tërheqjet”… Kësaj partie mes tjerash i rekomandohet që të zbatojë ligjet fiskale të aplikueshme në Kosovës

(E plotësuar) Ka përfunduar seanca e sotme gjyqësore për rastin “Kleçka”. Në fillim të kësaj seance, prokurori Maurizio Salustro ka hequr dorë nga kërkesa që të dëgjohen si dëshmitarë tre ekspertët e Psikiatrisë për dokumentacionin mjekësor të të ndjerit Agim Zogajt. Deklaratat e këtyre tre ekspertëve janë pranuar si të lexuara.

Prokurori Salustro ka kërkuar që të bëhet një ekspertizë shtesë psikiatrike për dokumentacionet mjekësore të të ndjerit Agim Zogaj, duke propozuar që të caktohet një ekspert tjetër nga prokuroria.

Kërkesën e prokurorit Salustro e ka kundërshtuar pala mbrojtëse.

Ndaj kërkesës së Salustros, ka reaguar edhe vetë Fatmir Limaj: “Mbrojtja nga fillimi deri më tash është munduar t’i kryej vetëm detyrat e saj në mënyrë që të shkohet më tutje. Ky rol konstruktiv i yni ka të bëjë me përmbylljen meritore të këtij procesi nga ana e gjykatës, por shpeshherë, fatkeqësisht konstruktiviteti ynë është përdorur nga prokurori për ta penguar këtë proces”, ka deklaruar Limaj, shkruan Epoka e re.

Limaj i ka thënë kryetarit të trupit gjykues se për çdo çështje për këtë proces, prokurori ka mundur të kërkojë sqarime shtesë. Sipas Limajt, prokurori po bënë përpjekje për ta zvarritur procesin, sa për t’i mbajtur ata në arrest shtëpiak.

Limaj ka kërkuar nga kryetari i trupit gjykues që mos të pësojnë për shkak të neglizhencës së prokurorit Salustro. “Ju jeni ai që vendosni për vlerësime. Kërkoj nga ju që për shkak të mos efiçiencës së prokurorisë të mos pësojmë ne. Po ashtu kërkoj që mos të pësojmë nga pakënaqësitë e prokurorit. I nderuari panel ju vini nga standardet e larta të drejtësisë. Ju lutëm mos i ulni këto standarde. Ne po kërkojmë drejtësi”, është shprehur Limaj.

Duke parë kundërshtimet e palës mbrojtëse, kryetari i trupit gjykues, Malkom Simons ka deklaruar se gjykata do ta caktojë një ekspert për t’i analizuar raportet mjekësore të të ndjerit Agim Zogaj. “Nesër do t’ju njoftoj me emrin e ekspertit. Nëse keni kundërshtime, për këtë ekspert, pres që këto kundërshtime të parashtrohen me shkrim. Po ashtu, pres që deri më 24 korrik në orën 12:00 t’i parashtroni pyetjet me shkrim për këtë ekspert”, ka thënë Simons.

Seanca e radhës për rastin “Kleçka” do të mbahet më 2 shtator, kur pritet të dëshmojë eksperti i propozuar nga Gjykata Apelit.

Sot vazhdon seanca për rastin “Kleçka”

Sot (e enjte) në Gjykatën e Apelit në Prishtinë, konkretisht në sallën e improvizuar në “Kinemanë ABC1”, do të vazhdojë seanca gjyqësore në rastin “Kleçka”, në të cilin janë të përfshirë Fatmir Limaj dhe nëntë ish-bashkëluftëtarët e tij.

Në këtë seancë do të vendoset nëse do të ftohen tre ekspertë psikiatër për të dëshmuar para trupit gjykues lidhur me dokumentacionin mjekësor të të ndjerit Agim Zogaj, i njohur si dëshmitari “X”.

“Sot (e enjte) do të vendoset se a do të ftohen tre ekspertë të psikiatrisë apo do të lexohen deklaratat e tyre në lidhje me gjendjen psikiatrike të dëshmitarit Agim Zogajt në kohën kur ai është trajtuar në Repartin e Psikiatrisë në Prizren dhe Prishtinë”, ka thënë Gashi për “Epokën e re”.

Kuvendi dhe Qeveria e Kosovës janë duke e shpërfillur Gjykatën Kushtetuese. Qeveria duke nxjerr projektligje që derivojnë nga Marrëveshja e parë Kosovë-Serbi, ndërsa Kuvendi duke i shqyrtuar e miratuar ato, pa e pritur verdiktin e Kushtetueses, nëse Marrëveshja Thaçi-Daçiq është në harmoni me Kushtetutën e vendit,shkruan Tribuna

Përgjigjen për këtë duhet ta japë Gjykata, pasi diçka e tillë i është kërkuar nga një grup deputetësh,shkruan Tribuna. Aktualisht, sipas burimeve të gazetës, Gjykata Kushtetuese ka kërkuar nga Kuvendi dhe Qeveria që të japin çdo lloj informate që ka të bëjë me ratifikimin e marrëveshjes së arritur në Bruksel, për sa kohë që e ka informuar edhe presidenten se ka filluar kompletimi i dosjes që ka të bëjë me këtë marrëveshje

Delegacioni i Kosovës dhe ai i Serbisë prej së martës në Bruksel janë përpjekur të gjejnë modalitetet e integrimit të strukturave ilegale të sigurisë në institucione të Kosovës.

Zëvendëskryeministrja Edita Tahiri ka thënë të mos jenë shënuar përparime konkrete në këto takime dhe problem në vete ka përmendur Mbrojtjen Civile, që refuzon të dorëzojë armët. E në MPB kanë konfirmuar se pjesë e policisë do të jenë edhe pjesëtare të këtij formacioni ilegal të Ministrisë së Mbrojtjes të Serbisë. Krahas Policisë, për ta do të hapin dyert edhe Forca e Sigurisë për Menaxhimin e Emergjencave.

Në Ministrinë e Punëve të Brendshme të Kosvës e kanë konfirmuar të dhënën se do të ndodhë rekrutimi në polici i pjesëtarëve të kësaj strukture, së cilës institucionet e Kosovës ia kanë faturuar përgjegjësinë për një numër të madh krimesh që kanë ndodhur në veri të Mitrovicës, si dhe në tri komunat veriore me shumisë serbe: Zveçan, Leposaviq e Zubin Potok.
Në ministri nuk kanë saktësuar numrin e pjesëtarëve të këtij formacioni që do të zënë vend në mekanizma të sigurisë së vendit. Kanë thënë se janë duke u definuar shifrat, shkruan Koha Ditore.

“Ne mund të kemi vlerësime të përafërta, sepse ende nuk e kemi të saktë numrin se sa policë nga Mbrojtja Civile do të integrohen në Policinë e Kosvës, kur të kemi të dhëna të sakta do të kemi edhe përgjigje të detajuar”, është përgjigjja e Zyrës për informim e MPB-së, e dhënë në kontekst të disa pyetjeve të gazetës që i referohen integrimit të strukturave ilegale serbe.
Burime të gazetës kanë thënë se brenda pak kohësh, MPB-ja do të shpallë konkurs për vende të lira në Policinë e Kosvës.

Zëdhënësi i Aleancës për Ardhmërinë e Kosovës Ernest Luma ka shkruar kundër analistit të njohur shqiptar Fatos Lubonja i cili kishte shkruar një opinion ku e kritikonte kryetarin e AAK-së Ramush Haradinaj.

“1) Njerëzit (analistët) si Fatos Lubonja ne k’nej i quajmë “Nona e viçit”, andej i quajnë “bir kurve”;

2) Unë kam “argumente” (ekuivalente më të Fatosit) se ai në pikë të natës e në pikë të ditës, atëherë kur nuk ishte autostrada e, edhe tash kur ajo është, e vë maskën në krye dhe del me “kallash” në Rrugën e Kombit – i plaçkitë turistët kosovarë;

3) Fatos Lubonja – ka mbiemrin që i aliteron (dhe bukurtingëllon) saktë me mbiemër shkau, dhe mos u çuditni sa çkë pjellë mendja e tij e çka pjerdhë goja e tij. Nën atë mjekërr qirilicë fshihet një shka që flet shqyp…”, ka shkruar Luma në rrjetin social Facebook.