Policia e Kosovës gjatë 24 orëve të fundit ka shqiptuar 1,256 gjoba për kundërvajtësit në trafik.
Në raportin e saj, Policia njofton se gjatë 24 orëve të fundit kanë ndodhur 23 aksidente me të lënduar, 31 me dëme materiale dhe një aksident ka përfunduar me fatalitet.
Një person ka humbur jetën në një aksident që ka ndodhur në autostradën “Ibrahim Rugova”, në segmentin Duhël-Malishevë.
Lidhur me këtë aksident Policia njofton se është arrestuar shoferi që dyshohet se e ka shkaktuar aksidentin.
Sipas Policisë, viktima kishte ndalur veturën e tij në shiritin e emergjencës dhe kishte dalë nga vetura.
Në një moment ai ishte goditur nga i dyshuari dhe ka vdekur në vendin e ngjarjes.
Me vendim të prokurorit, i dyshuari është dërguar në mbajtje, ndërsa trupi i pajetë i viktimës është dërguar në Institutin e Mjekësisë Ligjore për obduksion.