Në 35-vjetorin e vdekjes, sot u përkujtua veprimtari i çështjes kombëtare dhe heroi i Kosovës, Fadil Vata. Familjarë, bashkëveprimtarë, qytetarë dhe përfaqësues të institucioneve të ndryshme bënë homazhe pranë varrit të tij në fshatin Sallagrazhdë dhe para shtatores në qytetin e Suharekës, raporton PrizrenPress.
Në këtë ngjarje ishte i pranishëm edhe kryetari i Suharekës, Bali Muharremaj, i cili theksoi se Fadil Vata ishte shembull i dashurisë dhe sakrificës për atdheun.
“Sot kujtojmë Heroin Fadil Vata nga Sallagrazhda. Ai ishte ideologu dhe intelektuali që dha gjithçka për lirinë e vendit. Ndër breza u frymëzuam nga veprat e tij dhe natyrisht të njëjtën ua kujtojmë edhe atyre që do të vijnë, si shembullin e dashurisë dhe sakrificës për atdheun”, theksoi Muharremaj./PrizrenPress.com
