Qazim Thaçi i cili është gazetar në komunën e Prizrenit duke folur në emisionin “Info Magazine” në Klan Kosova ka thënë se përveç kandidatëve të zyrtarizuar nga PDK-ja, që është Shaqir Totaj, nga LDK-ja Anton Quni e Zafir Berisha nga NISMA, kandidatë tjerë të mundshëm mund të jenë Fatmir Kastrati nga AAK-ja dhe Mytaher Haskuka nga VV-ja.
Sipas Thaçit, partitë joshqiptare nuk garojnë me kandidatë për kryetar por që shumica e tyre e përkrahin një kandidat për kryetar.
Thaçi bënë të ditur se nga Lëvizja Vetëvendosje përveç Haskukës, janë përfolur edhe disa emra të tjerë si Drita Millaku e Haxhi Avdyli nga Lista GUXO e Agon Nimani.
“Me sa di unë LVV-ja e ka një formë të veçantë për ta zgjedhur kandidatin për të parin e komunës dhe ajo është se ata i takojnë pikat më pastaj brenda për brenda e bëjnë një garë se kush fiton nga qendra dhe më pas ai që fiton e dërgojnë deri në Prishtinë dhe aty sipas të gjitha gjasave vendos Albin Kurti”, është shprehur Thaçi, njofton Klankosova.tv.
Tutje, Thaçi thotë se fryma e zgjedhjeve qendrore mund të ndikojë edhe në zgjedhjet qendrore dhe se sipas tij, opozita e ka një panik se fryma e Lëvizjes Vetëvendosje mund të jetë vendimmarrëse edhe në zgjedhjet lokale, por që brenda partive tjera garuese ka një zë të fuqishëm për fitore.
“Brenda partive politike, bie fjala PDK-ja ka një zë të fuqishëm se do të jetë fituese kësaj radhe pasi që Shaqir Totaj po bënë takime të shumta me njerëz e njejtë si Totaj po bënë edhe Zafir Berisha. Ndërkaq LDK-ja edhe pse e ka kandidatin akoma nuk është aktiv shumë, por këta pritet të jenë katër kandidatët e që për mua pritet të jetë gara më e ashpër që nga paslufta”, ka thënë ai.