Vendimi i Gjykatës Kushtetuese në fakt e ka përmbysur Republikën Parlamentare dhe ka shndërruar Kosovën në shtet monist me të drejtë ekskluzive të një partie, ngjashëm në ish-sistemin”, ka thënë Abazi
Drejtori për Ballkanin Perëndimor i Fondacionit “Rockfeller Brother”, Haki Abazi, në një intervistë për gazetën Tribuna, ka thënë se vendimi i Gjykatës Kushtetuese nuk ka lënë hapësirë për strategji dhe ka mbyllur çdo hapësirë dhe mundësi të funksionalizimit të institucioneve. Kjo, sipas tij, ka konfirmuar përshtypjen vendore dhe atë ndërkombëtare se kryetari dhe vartësit e tij në Gjykatën Kushtetuese janë të anshëm dhe përkrahin PDK-në. Vendimi i Gjykatës Kushtetuese sipas, Abazit e ka përmbysur Republikën Parlamentare dhe e ka shndërruar Kosovën në shtet monist.
Tribuna: Z. Abazi, a mendoni se LAN-i ka strategji se si të veprojë pas vendimit të Gjykatës Kushtetuese?
Abazi: Vendimi i Gjykatës Kushtetuese përveç vendimit të gjykatësit amerikan, nuk ka lënë hapësirë për strategji, në fakt e ka mbyllur çdo hapësirë dhe mundësi të funksionalizimit të institucioneve, duke konfirmuar përshtypjen edhe vendore edhe ndërkombëtare se kryetari dhe vartësit e tij në Gjykatën Kushtetuese janë të anshëm dhe përkrahin PDK-në. Tani strategjitë që LAN-i mund t’i ketë, janë çështje të vullnetit politik por jo domosdoshmërisht mund ta respektojnë vendimin e Gjykatës Kushtetuese. Vendimi i Gjykatës Kushtetuese në fakt e ka përmbysur republikën parlamentare dhe ka shndërruar Kosovën në shtet monist me të drejtë ekskluzive të një partie, ngjashëm në ish-sistemin.
Tribuna: A mendoni se mund të thirret seancë e jashtëzakonshme?
Abazi: Unë mendoj që askush nuk mund të ju ndalojë 40 deputetëve të thërrasin seancë të jashtëzakonshme dhe të procedohet me formimin e institucioneve. Burimi i mandatit të deputetit vjen nga vota e qytetarit dhe në demokraci parlamentare shumica vendos. Nuk ka interpretim tjetër të kësaj të drejte dhe as autoritet më të madh se sa vota e cila është vërtetuar dhe konfirmuar nga KQZ.
Tribuna: A duhet shqyrtuar mundësia që LAN-i ta bëjë qeverinë edhe në rrethanën kur kryeparlamentari i takon PDK-së?
Abazi: Kjo përveç që është e pamundur, është dhe një trik i radhës sikurse marrëveshja që PDK kishte nënshkruar me LDK-në dhe AKR-në, për presidenten që nuk e respektoi. Kush mund ta detyrojë LDK-në që edhe njëherë të besojë se nuk do t’i ndodhë e njëjta gjë. Do të ishte vetëvrasje politike për udhëheqësinë e LAN-it, sikur të hyjnë në një aventurë të tillë dhe të dalë i lagur nga një proces që kryekëput është jodemokratik dhe joinstitucional. Parlamenti është ai që vendos dhe jo marrëveshjet jashtë institucionale të odave. Përndryshe, prodhohen efekte Jahjaga.
Tribuna: Në cilësinë e njohësit të zhvillimeve politike, çfarë ka sjellë deri te ky fragmentarizm i skenës politike?
Abazi: Politika është arti i zgjidhjes së problemit dhe jo art i forcës. Parlamenti nuk është ring boksi apo vend për muskujt apo platformë mashtrimi e manipulimi. Të gjitha kanë ndodhur në dy mandatet e papërfunduara të udhëheqjes së PDK-së. Deri aq larg është shkuar që janë quajtur parti antievropiane e antiamerikane përderisa kanë privatizuar asetet e shtetit për kompani aziatike siç është rasti i distribucionit të energjisë elektrike. Gjithashtu të gjitha partitë janë vendosur nën presion pa diskutim të brendshëm dhe është margjinalizuar plotësisht përbërja e parlamentit të kaluar. Rezultati i këtyre veprimeve është fusnota, mosliberalizim i vizave, një MSA gjysmake, zvogëlim i investimeve, rritje e shkallës së korrupsionit, më shumë refugjatë kosovarë në BE dhe me ekonomi më pak të zhvilluar. Dyshoj që ndokush që ka bërë analizë dhe ka ide për të vepruar ndryshe, do të donte për partner një grup politik të udhëhequr nga një mendësi e tillë.
Tribuna: Z. Abazi, kur prisni të krijohet qeveria e re?
Abazi: Në këtë situatë është e vështirë të jepet afat kohor, por sigurisht që Presidenca apo vetë LAN-i, duhet të jenë më të përcaktuar në hapat e mëtutjeshëm. Ky autorizim vjen nga Kushtetuta dhe votat e qytetarit.
Tribuna: A i duhet Kosovës qeverisje e përkohshme siç mund të ishte një teknike?
Abazi: Qeverisja teknike është e pamundur tani pa Parlament, por mund të ketë një qeveri “caretaker”, që është neutrale dhe ka për detyrë që të mbajë administratën dhe sektorët vitalë të shtetit funksional dhe të mbështesë KQZ që të përgatisë zgjedhje të reja, fer nga një nivel i barabartë i të gjitha partive dhe koalicioneve të mundshme.