Afrim Hoti, ka dhënë dorëheqje nga subjekti politik Aleanca Kosova e Re të Behgjet Pacolli.
Këtë njoftim, Hoti e ka bërë përmes një kumtese për media.
Ai i është drejtuar Këshillit Drejtues të AKR-së. Në zgjedhjet e fundit nacionale të mbajtura në qershor të vitit të kaluar, Afrim Hoti ishte kandidat në listën e AKR-së për deputet, por subjekti në të cilën garoi nuk kishe arritur të kalonte pragun ligjor prej 5 %.
Në vijim është deklarata e plotë e Profesor Afrim Hotit:
Të nderuar anëtarë të Këshillit Drejtues,
Duke pasur parasysh angazhimet e shtuara akademike dhe mungesën e kohës dhe me dëshirën që të hap rrugë dhe mundësi për të tjerë që do të mund të kontribuonin më shumë në ecjen dhe avancimin e AKR – së, ofroj DORËHEQJE TË PAREVOKUESHME, nga të gjitha funksionet dhe të qenit anëtar i partisë.
Ka qenë një eksperiencë e shkurtër dhe shumë interesante gara dhe angazhimi në këtë subjekt politik me ç’rast dua që sinqerisht të u falënderohem për bashkëpunimin dhe mbështetjen partiake dhe njëkohësisht besimin e qytetarëve në zgjedhjet e fundit parlamentare./RahovecPress.com/