Opozita do t’i përgjigjet oligarkisë, ditë për ditë e orë për orë, pasi kush mbjell erën, korr furtunën, kush mbjell furtunën, korr cunamin. Kështu u shpreh sot kreu i opozitës Lulzim Basha gjatë fjalës së tij në mbledhjen e grupit të Partisë Demokratike duke paralajmëruar edhe nisjen e protestave.
“Sot starton një vit i ri politik, i dyti i legjislaturës në vazhdim që na ka vendosur në rolin e opozitës ndaj qeverisë më antidemokratike të 23 –viteve. Ata kanë ardhur në pushtet për të qeverisur si baballarët e tyre. Kjo politikë revanshiste, me gjithë dështimet dhe humbjet që ka pësuar, ia ka dalë për fat të keq dy arritje të zeza: të krijojë një oligarki, si një grusht sundimtarësh, tashmë një realitet. Oligarkia Edi Rama – Ilir Meta. Së dyti të godasë për vdekje, të asgjesojë bashkëjetesën me Partinë Demokratike, të asgjeosjë një kusht të domosdoshëm të shoqërisë së lirë.
Ne do t’i denoncojmë ata siç i kemi denoncuar, do t’i luftojmë orë për orë, do të vazhdojmë t’i përballim me standartet demokratike në forumet dhe demokracitë perëndimore, do të drejtojmë protesta popullore kundër përkeqësimit dhe varfërisë. Do t’iu kujtojmë shumë shpesh, Edi Ramës dhe Ilir Metës se kush mbjell erën, do të korrë furtunën, kush mbjell furtunën, do të korrë cunamin.” tha Basha disa orë para nisjes së sesionit të ri Parlamentar ku pritet që mazhoranca të hedhë poshtë dekretet e kthyera nga presidenti. /