Kreatorja kosovare, Krenare Rugova, ka prezantuar mbrëmë kreacionet e fundit të saj me fustanet që i takojnë koleksionit pranverë-verë 2014, të titulluar “Cinematique”. Ajo është ndarë e kënaqur me publikun, sikurse edhe publiku me punën e saj
Fustane të kombinuara me ngjyra dhe materiale të ndryshme, me një dozë të klasikes të inkorporuar tek modernia, janë prezantuar të shtunën mbrëma, si kreacioni i fundit i kreatores Krenare Rugova.
Në këtë revy të modës, që i takon koleksionit pranverë-verë 2014 fustanet i kanë prezantuar dhjetëra modele, ndërsa hapësira në katin e dytë të Muzeut të Kosovës ka qenë e vogël për t’i zënë të interesuarit, pjesa dërmuese e të cilëve kanë qenë femra.
Kreacionet e Rugoves, të cilat nuk janë të panjohura për ndjekësit e modeleve të fundit të gardërobës në Kosovë, janë pritur jashtëzakonisht mirë nga publiku.
Vetë kreatorja, gjatë një bisede për Kultplus ka thënë se mbi të gjitha është ndarë e kënaqur nga numri i madh i mysafirëve që e kanë ndjekur revynë e saj të fundit.
“Prania e publikut ishte fantastike, kjo është pjesa më e mirë. Unë prapa skenës nuk e di çfarë ndodhë përpara, por në momentin që dalë unë edhe e shohë sallën krejtësisht të mbushur, atëherë kjo është pjesa më e mirë e prezantimit”, ka thënë Krenare Rugova.