I akuzuari për vjedhje pylli, Mirush Gegaj është deklaruar i pafajshëm në shqyrtimin fillestar të mbajtur të martën, në Gjykatën Themelore në Gjakovë, dega në Malishevë.
I akuzuari Gegaj nuk e ka pranuar fajësinë për akuzën që i vihet në barrë, duke deklaruar se nuk pajtohet lidhur me sasinë e drunjëve të prerë, e cekur në aktakuzë, raporton “Betimi për Drejtësi”.
Gjykatësi i rastit, Lulzim Paqarizi e njoftoi të akuzuarin se mund të paraqesë kërkesë për hudhje të aktakuzës dhe kundërshtim të provave, para shqyrtimi të dytë i cili u caktua të mbahet më 11 dhjetor 2018, në ora 14:30.
Sipas aktakuzës së ngritur më 29 mars 2017, nga Prokuroria Themelore në Gjakovë, Mirush Gegaj akuzohet se ka kryer veprën penale “vjedhje pylli”, nga neni 358 i Kodit Penal të Republikës së Kosovës.
Sipas aktakuzës, më 22 nëntor 2016, rreth orës 14:30, në pyllin publik, Rajoni Ekonomik Pyjor “Bjeshka”, në vendin e quajtur “Te Curjeli”, me qëllim të përfitimit të kundërligjshëm, i akuzuari ka prerë 88 copë dru të llojit “Ahu”, me vëllim të përgjithshëm 2.64 metra kub.
Në aktakuzë thuhet se i akuzuari, Drejtorisë për Bujqësi e Pylltari dhe Zhvillim Rural-Njësia Pyjore në Malishevë, i është shkaktuar dëm në vlerë prej 504.90 euro. /Betimipërdrejtësi