Kryetarit të Gjykatës Kushtetuese, Enver Hasani, i kanë mbetur më pak se dy javë deri në përfundimin e mandatit, gjatë të cilit ai është kritikuar shumë për vendime të padrejta e në favor të Partisë Demokratike të Kosovës.
Përveç Hasanit, më 26 qershor mandati i përfundon edhe gjyqtarit Kadri Kryeziu. Prandaj largimi i këtyre gjyqtarëve dhe ardhja e dy gjyqtarëve të rinj e të paanshëm, sipas përfaqësuesve të partive politike dhe analistëve mund të ndikojë pozitivisht në kthimin e imazhit dhe kredibilitetit te Gjykata Kushtetuese.
Për këto dy pozita si gjyqtarë në Gjykatën Kushtetuese, Komisioni për përzgjedhjen e kandidatëve për gjyqtarë të kësaj Gjykate ia ka propozuar Kuvendit për votim gjashtë kandidatë: Gresa Cakaj-Nimani, Remzije Istrefi-Peci, Selvete Gërxhaliu-Krasniqi, Hashim Çollaku, Safet Hoxha, Zef Prenrecaj. /Zëri/