Një punonjës i Policisë së Qarkullimit Rrugor është arrestuar paraditen e sotme në Lezhë, pasi i ka marrë ryshfet një drejtuesi mjeti.
Punonjësi Ylli Ulaj u arrestua rreth orës 11:30 për veprën penale të “Korrupsionit pasiv të punonjësve që ushtrojnë funksione publike”, neni 259 i Kodit Penal.
Ai dyshohet se i ka marrë ryshfet 50 euro një shtetasi nga Kosova me incialet S.D në aksin rrugor Milot – Lezhë.
Shtetasi nga Kosova po udhëtonte me automjetin e tij kur u ndalua për tejkalim të normave të shpejtësisë. Drejtuesi i mjetit ka kundërshtuar faktin se ishte në shkelje të rregullave të qarkullimit, por ka paguar sasinë e lekëve të kërkuar nga efektivi i qarkullimit, Ylli Ulaj.
Punonjësi i policisë ka marrë 50 eurot dhe nuk ka proceduar administrativisht shtetasin kosovar, për shkeljen e konstatuar.
Shtetasi S.D. ka bërë më pas denoncim në numrin falas 0800 90 90 të Shërbimit për Çështjet e Brendshme dhe Ankesat, në Ministrinë e Punëve të Brendshme.
Menjëherë nisën hetimet dhe u arrestua në flagrancë punonjësi i policisë Inspektor Ylli Ulaj, dhe u sekuestruan në cilësinë e provës materiale 50 eurot e dhëna nga shtetasi kosovar.
Materialet hetimore iu referuan Prokurorisë pranë Shkallës së Parë të Rrethit Gjyqësor Lezhë. /Shekulli Online/