Ish-Kryetari i Kuvendit Jakup Krasniqi thotë se për zgjidhjen e situatës së krijuar në Kuvendin e Kosovës mund të ndihmoj vetëm Kryeministri Isa Mustafa. Sipas Krasniqit, Kryeministri i ka dy rrugë: Ose të tërheq nënshkrimin nga marrëveshja e 25 gushtit ose të lërë postin e Kryeministrit.
Kryetari i Këshillit Kombëtar i NISMA për Kosovën, Jakup Krasniqi thotë se një dorëheqje e mundshme e Kadri Veselit nga posti i Kryetarit të Kuvendit, nuk do të ndihmonte në zgjidhjen e situatës së krijuar në vend.
“Mendoj se dorëheqja e Kryetarit në asnjë variant nuk i ndihmon zgjidhjes së problemit”, tha Krasniqi për televizionin Rrokum.
Thotë se dorëheqja e Mustafës nëse ky i fundit nuk tërheq nënshkrimin do të mundësonte krijimin e një Qeverie teknike, e cila do të mundësonte zgjedhjet e reja, kësisoj edhe zgjidhjen për këtë çështje.
“Zgjidhjes së problemit në rend të parë i ndihmon Kryeministri i cili duhet ta hjek nënshkrimin ose zotimin nga marrëveshja e 25 gushtit 2015, ose Kryeministri duhet të japë dorëheqje dhe të krijohet mundësia e krijimit të një Qeverie Teknike që do ta qonte vendin drejt zgjedhjeve. Nëse duhet dikush të jap dorëheqje ai duhet të jetë Kryeministri”, tha Krasniqi.