Lidhja Demokratike e Kosovës(LDK) në Prizren, kërkon nga kryetari i Komunës, Mytaher Haskuka që të anulojë konkursin e drejtorëve të rinj të shkollave.
“Duke marrë parasysh se ka raportime për favorizime politike e shkelje tjera kërkojmë të anulohet tërë konkursi duke e rifilluar një proces të ri të përzgjedhjes së drejtorëve të shkollave”, thuhet në reagimin e LDK-së në Prizren, shkruan “PrizrenPress”
Drejtoria e Arsimit në Prizren, ka publikuar listën me emra të drejtorëve të rinj të shkollave.
Kjo listë është kundërshtuar nga disa kuvendarë të LDK-së dhe VV-së.
Këshilltari i LDK-së në Prizren, Haziz Hodaj dhe Petrit Hoxhaj kanë shprehur zhgënjimin e tyre, ndaj drejtorit të Arsimit , Skënder Susuri.
E zhgënjyer është shprehur edhe kuvendarja e VV-së, Mimoza Bushrani.
VV, LDK dhe Nisma bashkëqeverisin në Prizren.
Përfaqësuesit e shoqërisë civile, në raportin e tyre, kanë treguar ndërkaq se procesi i zgjedhjes së drejtorëve të rinj është përcjellë me mungesë të transparencës.
Drejtori i Arsimit në Prizren, Skënder Susuri tha se “zërat kundërshtues, nuk po ofrojnë argumente”.
“Ata që po flasin e kanë hallin që të afrimit e tyre nuk janë zgjedhur”, ka thënë Susuri.
Ndërkaq, LDK kërkon që që përmes mekanizmave legal të rishikohet tërë procesin e përzgjedhjes së drejtorëve.
“Lidhja Demokratike e Kosovës dega në Prizren ,ka përcjell me interesim zhvillimet rreth konkursit e fundit për drejtorë të shkollave”.
“Lidhja Demokratike edhe si opozitë në vazhdimësi ka denoncuar shkeljet , keqpërdorimet, nepotizimin por dhe politizimin e arsimit nga ana udhëheqësve të arsimit gjatë qeverisjes së PDK-së në Prizren, të cilët të vetmin kriter për drejtor të shkollave kanë pasur kriterin e përkatësisë politike”.
“Në kohën kur keqpërdorimet e korrupsioni lulëzuan nën udhëheqjen e PDK-së ishte LDK që përmes reagimit politik e qytetar , përmes kumtesave, konferencave të shtypit, debateve e edhe protestave u vu në ballë të kundërshtimit të pasurisë sonë më të madhe kombetare siq është arsimi cilësor. Prandaj edhe sot, edhe pse pjesë e koalicionit e Qeverisë komunale marrim me shqetësim të madh çdo raportim të shoqërisë civile e mediave për proces jo të rregullt gjatë përzgjedhjes së drejtorëve”.
“ Po ashtu raportimet për favorizim të disa kandidatëve me orientim politik i konsiderojmë të papranueshme që nuk i kontribuojnë përmirësimin e cilësisë në udhëheqje”. /PrizrenPress.com/