Kryesia e Organizatës së Veteranëve të Luftës së Ushtrisë Çlirimtare të Kosovës (OVLUÇK), mbështet protestën me moton: “Në mbrojtje të vlerave të luftës” e organizuar nga studentët dhe rinia e Kosovës, e cila do të mbahet më 18 nëntor (të hënën).
Kryesia e OVLUÇK-së, ka bërë thirrje për pjesëmarrje sa më masive në këtë protestë. “Kryesia e Organizatës së Veteranëve të Luftës së Ushtrisë Çlirimtare të Kosovës në mbledhjen e mbajtur sot, diskutoi gjendjen aktuale të krijuar pas ngritjes së aktakuzës kundër bashkëluftëtarëve të ZO të Drenicës. Kryesia e OVL të UÇK-së, kundërshton njëzëri këtë aktakuzë, si të pabazë dhe tendencioze, që ka për qëllim njollosjen e figurave emblematike të UÇK-së dhe bashkëluftëtarëve të Komandantit Legjendar Adem Jashari. Kryesia gjithashtu, reagon lidhur me arrestimin e bashkëluftëtarit dhe gazetarit Milaim Zeka, duke e konsideruar ndërhyrje në punën e gazetarisë hulumtuese”, është bërë me dije në një komunikatë për medie, sipas së cilës: “Kryesia e OVLUÇK-së, po ashtu ka marrë vendim për organizimin e protestave në mbarë vendin, me ç’rast për datën, mënyrën dhe kohën e organizimit, bashkëluftëtarët dhe opinioni do të informohen me kohë”.