Joe Sanders bën më të mirën e mundshme që në mënyrë të vazhdueshme të jetë kreativ me secilën notë që luan. Nuk i pëlqen të jetë strikt, prandaj edhe nga klasikja ka kaluar në jazz.
Njihet si muzikant i cili asnjëherë nuk e ndjek të njëjtën rrugë, por më shumë eksploron me ritmin, melodinë dhe mëton të dëshmojë mundësitë e pafundme që ofron muzika. Liria në skenë për të është shumë e rëndësishme, shkruan Koha Ditore.
Mundësia për të improvizuar mbi një bazë të cilën e krijon paraprakisht është si një lloj kornize, por që brenda saj mundësitë për të marrë drejtime të tjera nuk kanë limit. Sanders, i cili cilësohet si një prej kontrabasistëve më të mirë të gjeneratës së re në Amerikë, e vizitoi Kosovën.
Ai u bë pjesë e edicionit të parë të “Prishtina Winter Jazz Week”. Prezantoi projektin e tij “Infinity”. Në skenë u ngjit me Philip Dizack në trumbetë, Gregory Hutchinson në bateri dhe Marko Çrnçec në piano. Titulli i projektit në fakt zbërthen qasjen e tij ndaj muzikës: ai është muzikanti që dëshmon pafundësinë e tingujve.
Eksplorimi i kufijve
Në historinë e jazzit, Joe Sanders është emër i njohur. I pari, Joseph L. “Joe” Sanders, ishte jazz-pianisti vokalist i cili jetoi prej vitit 1896 deri më 1965. Emri i tij dhe krijimtaria artistike vazhdojnë tash me një tjetër Joe Sanders. Edhe ky i fundit tashmë ka krijuar karrierë të veten..