Në Turqi sot po mbahen zgjedhjet e para direkte presidenciale në historinë e këtij vendi. Prej se është formuar Republika e Turqisë, para më se 90 viteve, presidenti është zgjedhur nga parlamenti.
Kryeministri aktual, Recep Tayyip Erdogan, nga Partia për Drejtësi dhe Zhvillim, me rrënjë islamike, pritet të fitoj bindshëm në këto zgjedhje. Erdogan, që është kryeministër prej vitit 2003, thotë se nëse fiton, ai dëshiron ta ndryshojë kushtetutën në mënyrë që posti presidencial, i cili deri tash ishte në masë të madhe ceremonial, të shndërrohet në pozitë të fuqishme ekzekutive në Turqi, raporton REL
Rivalë të tij në këto zgjedhje janë: Ekmeleddin Ihsanoglu, kandidat i përbashkët i partive kryesore të opozitës në parlament, dhe Selahattin Demirtas, me kombësi kurde, që e udhëheq Partinë Demokratike Popullore të krahut të majtë.
Nëse asnjë kandidat nuk i fiton më shumë se 50% të votave, atëherë më 24 gusht mbahet rundi i dytë.