Xhamia 600 vjeçare është objekti i parë monumental i kulturës islame në Prizren dhe është ndërtuar në vitin 1455, ndërsa xhami të këtij lloji gjenden vetëm 4 në Ballkan.
Parku i Xhamisë së Namazgjahut është pothuajse i shkatërruar. Ulëset dhe shportat e mbeturinave janë të dëmtuara, shumë nga llambat ndriçuese nuk janë funksionale e reflektorët janë vjedhur para disa vjetësh, raporton KTV.
Banorët dhe vizitorët shprehen të pakënaqur me gjendjen e këtij objekti dhe hapësirës përreth.
Drejtori i Qendrës Rajonale për Trashëgimi Kulturore në Prizren, Jusuf Xhibo, ka thënë se në këtë monument nuk është investuar që nga viti 2006 dhe tash e sa kohë, u është premtuar investim i plotë nga TIKA.
Edhe pse në këtë gjendje, Xhamia 600-vjeçare e Namazgjahut i sjell Prizrenit turistë nga e gjithë bota.