Për t’i dhënë lamtumirën e fundit Ahmet Spahiut, familjarë e kolegë të tij u ngjitën në skenën e Teatrit Kombëtar të Kosovës në ceremoninë komemorative.
Por në këtë skenë, Spahiu kishte shkelur për të fundit herë në vitin 2004, ani pse dëshira për t’u rikthyer kishte qenë gjithmonë e fuqishme.
Teatrin e krahasonte me fushë futbolli. Vetes i kishte ndarë pozicionin e mesfushorit që ndërton dhe e mban lojën deri në fund. E sulmues që shënonin gola i shihte kolegët e tij të gjeneratës – dy aktorët e ndjerë Istref Begolli e Shani Pallaska.
Aktori veteran Ahmet Spahiu – që kishte realizuar rreth 120 role në teatër dhe dhjetëra të tjera në televizion – ka vdekur në orët e hershme të së enjtes. Spahiu, ka ndërruar jetë pas një sëmundjeje të shkurtër. Ai ishte 83 vjeç.
Aktori i cili për të fundit herë u pa në ekran në rolin e Mixhës Bajram, në serialin televiziv “Familja moderne”, është varrosur në Prishtinë, në orët e pasdites. Homazhet për jetën e veprën e tij janë bërë në Teatrin Kombëtar të Kosovës.
Një dhomë e gardërobës së këtij institucioni, për më shumë se një vit kishte qenë vendbanim i aktorit të ndjerë, në vitet ’50, kur kishte lënë Pejën për të ardhur në Prishtinë. Për t’i dhënë lamtumirën e fundit Spahiut, familjarë e kolegë të tij u ngjitën në skenën e Teatrit Kombëtar të Kosovës në ceremoninë komemorative.
Por në këtë skenë, Spahiu kishte shkelur për të fundit herë në vitin 2004, ani pse dëshira për t’u rikthyer kishte qenë gjithmonë e fuqishme. Tubimi përkujtimor nisi dhe përfundoi me duartrokitje për jetën e veprën e tij. /KD/