Universiteti “Ukshin Hoti” në Prizren ka shpallur konkursin për pranimin e 180 studentëve të rinj në gjuhët mësimore boshnjake dhe turke, në 3 programe të ndryshme, të cilat nuk ishin akredituar më parë, por që me një Udhëzim të ri administrativ të Ministrisë së Arsimit janë legjitimuar nga Këshilli Shtetëror i Cilësisë që vepron në kuadër të Agjencisë së Kosovës për Akreditimin.
Kështu autoritetet qendrore UPZ-së i kanë lejuar që të ofrojë programet e studimit: fillor, parafillor dhe teknologji informative dhe telekomunikim në gjuhët turke dhe boshnjake, shkruan KD.
Në bazë të konkursit të shpallur pak ditë më parë UPZ-ja ka bërë të ditur se do të pranohen 180 studentë, në kuadër të Fakultetit të Edukimit në programet fillor dhe parafillor si edhe në Fakultetin e Shkencave Kompjuterike në programin e teknologjisë informative, përkatësisht nga 30 studentë në secilin program, të ndarë sipas gjuhëve përkatëse.