Në gjykimin për shpërthimin në Zhur, i akuzuari Arben Gashi ka vendosur të mbrohet në heshtje, ku së bashku me të akuzuarin Iran Badalli, po ngarkohen se kishin vendosur mjet eksplodues në shtëpinë e të akuzuarit Badalli në fshatin Zhur, me rastin e bastisjes nga Policia, mjeti kishte shpërthyer ndërsa kishte mbetur i vdekur polici, S.Th.

Këtë qëndrim i akuzuari Gashi e ka bërë të ditur të premten në Gjykatën Themelore në Prizren, ku tha se qëndron pranë deklaratës së dhënë në Prokurori dhe se dëshiron të mbrohet në heshtje, raporton “Betimi për Drejtësi”.

I akuzuari Gashi, të drejtën e mbrojtjes në heshtje, e ka shfrytëzuar para vazhdimit të marrjes në pyetje nga përfaqësuesi i të dëmtuarës Merita Qunaj, avokatit Blerim Mazreku. Ai ka shtuar se nuk dëshiron të përgjigjet më tutje në pyetjet e avokatit Mazreku, avokatit Besnik Berisha, avokatit Valdrin Gashi dhe të akuzuarit Badalli.

Sipas mbrojtësit të akuzuarit Gashi, avokatit Esat Gutaj i mbrojturi i tij bazuar në dispozita ligjore dëshiron që të përgjigjet vetëm në pyetjet e trupit gjykues.

Pas kësaj, kryetarja e trupit gjykues, gjykatësja Ajser Skenderi me kërkesën e palëve për përgatitje të fjalës përfundimtare këtë seancë e ka ndërprerë, kurse ajo e radhës është caktuar të mbahet më 29 qershor 2023.

Ndryshe, prezentë në këtë seancë nuk ishte i dëmtuari Artur Mrasori. Po ashtu prezentë nuk ishte përfaqësuesi i të dëmtuarit Mrasori, avokati Besnik Berisha, për të cilin avokati Mazreku tha se i njëjti nuk mund të jetë prezentë për arsye shëndetësore familjare.

Sipas aktakuzës, dy të pandehurit Iran Badalli dhe Arben Gashi, në fillim të muajit janar 2020, në Prizren janë furnizuar me mjet eksplodues nga i akuzuari Valbon Çollaku, e pastaj të njëjtin e kanë fshehur në krevatin e fëmijëve ne dhomën e katit të II të shtëpisë të të akuzuarit Iran Badalli në fshatin Zhur, Komuna e Prizrenit dhe pas një kontrolli të autorizuar të kësaj shtëpie nga Njësiti për Hetimin e Trafikimit me Narkotikë, më 28 janar 2020, rreth orës 20:00, në kontakt me këtë mjet, i njëjti ka eksploduar, ku ka gjetur vdekjen zyrtari policor S.Th, kurse policët tjerë të Njësitit gjegjës – të dëmtuarit Artur Mrasori, Jetmir Hasanaj dhe Arsim Byrtyqi si dhe fëmija S.B., kanë pësuar lëndime të rënda trupore.

Me këto veprime, sipas prokurorisë, të akuzuarit kanë kryer në bashkëkryerje veprën penale “Shkaktimi i rrezikut të përgjithshëm” nga neni 356, paragrafi 5, 4 dhe 1 lidhur me nenin 31 të Kodit Penal të Republikës së Kosovës.

Ndërsa, në dispozitivit II të aktakuzës, thuhet se në vend dhe kohë të njëjtë të përshkruar përafërsisht si në pikën I të dispozitivit të aktakuzës, në kundërshtim me ligjin e zbatueshëm mbi armët, përveç eksplozivit të lartcekur të shpërthyer, kanë pasur të fshehur edhe eksplozivin e mbetur TNT me peshë prej 809.1 gr dhe një detonator mekanik, në të cilin ishte i vendosur një fitil ngadalndezës në gjatësi 63 cm.

Me këtë, të akuzuarit në bashkëkryerje akuzohen se kanë kryer veprën penale “Mbajtja në pronësi, kontroll ose posedim të paautorizuar të armëve” nga neni 366, paragrafi 1 lidhur me nenin 31 të Kodit Penal. /BetimipërDrejtësi 

Kreu i Aleancës për Ardhmërinë e Kosovës, Ramush Haradinaj ka thënë se kryeministri i vendit, Albin Kurti është sinonim i “poshtërimit deri në pabesi”.

Haradinaj tha se si rezultat i mosbesimit të Kurtit po ndodhin ndëshkimet nga aleatët.

“Ky mosbesim i tij deri në pabesi sot po ndodh si kryeministër dhe rezultat i këtij mosbesimi të mbjellur  nga ky, e deri në pabesi po ndodhin ndëshkimet nga aleatët, për shkak të pabesive të kryeministrit të një vendi që është ndihmu me u shliru dhe janë garant i sigurisë sonë, mosbesim deri në pabesi” – deklaroi Haradinaj.

“Kryeministri Kurti sot është sinonim i poshtërimit deri në pabesi, ka poshtëru aparatin shtetëror, popullin e vetë, po vazhdon me i poshtëru të gjithë me i shtypë deri në poshtërim. Kurti po vazhdon me provu me i mashtru edhe aleatët e sigurisë, po vazhdon me provu me i mashtru edhe garantët tonë të sigurisë dhe mashtrimet e tij shkojnë në tradhti. Janë tradhti e llojit të vetë”- shtoi ai.

Kreu i AAK-së ka propozuar para deputetëve që të shkojnë në një mocion për të shkarkuar Qeverinë Kurti.

“Ju propozoj deputet të respektuar, pa ju nda në parti, të shkojmë në mocion dhe ta ndërprejmë mosbesimin deri në pabesi, poshtërimin deri në armiqësi dhe mashtrimin deri në tradhti. Pra ta shkarkojmë Qeverinë Kurti”- u shpreh Haradinaj.

Kuvendi i Kosovës po mban seancë të veçantë për situatën në veri të vendit dhe raportet e Kosovës me SHBA-në.

Nga e hëna serbët në veri janë duke protestuar për të kundërshtuar idenë që kryetarët e rinjë të ushtrojnë detyrat e tyre nga objektet komunale.

SHBA-të dhe BE vazhdimisht kanë kërkuar shtendosje të situatës në veri të Kosovës. Madje SHBA ka përjashtuar ushtrinë e Kosovës nga ushtrimi Defender 23 si pasojë për ‘mosdëgjimin’ që e ka bërë Qeveria e Kosovës.

SHBA po kërkojnë nga qeveria që kryetarët e ti të mos ushtrojnë detyrat e tyre nga objektet komunale dhe policia e Kosovës të largohet nga ato ndërtesa.

Për kryeministrin e Kosovës, Albin Kurti kryetarët duhet të ushtrojnë detyrat nga zyrat e tyre, sepse sipas tij ‘Kosovës nuk i duhet sistem paralel’.

Dje, Presidentja Osmani ka takuar presidentin e Francës, Emmanuel Macron dhe kancelarin e Gjermanisë, Olaf Scholz si dhe ka mbajtur një takim ‘joformal’ me presidentin serb Aleksandar Vuçiq.

Nga këto takime është propozuar ideja që në katër komunat veriore, Zveçan, Leposaviq, Zubin Potok e Mitrovicë të Veriut të përsëriten zgjedhjet edhe njëherë.