I mbijetuari i masakrës së Suharekës, Gramos Berisha ka postuar në rrjetin social në përvjetorin e masakrës së Suharekës.

Ai tha se ndihet krenar se gjenerata e babait të tij e solli lirinë e këtij vendi.

Berisha theksoi se secili prej nesh duhet të punojë çdo ditë, të tejkalojë veten dhe të bëjë të pamundurën që e vërteta jonë të mos kontestohet.

“Nuk ka mekanizëm, institucion apo lob që do të mund ta shfajësojë Serbinë. Sepse na vranë vetëm pse ishim shqiptarë. Nuk ishin individë, ishte shteti. Një shtet kundër grave, burrave dhe fëmijëve”, tha ai në postimin e tij.

Presidentja e Kosovës, Vjosa Osmani, ka përkujtuar sot 25-vjetorin e masakrës tragjike që ndodhi në Suharekë, ku më 26 mars 1999, 48 anëtarë të familjes Berisha u masakruan nga regjimi gjenocidal serb. Ajo theksoi se ky krim ishte një akt i pastër gjenocidi, ku burra, gra dhe fëmijë u shënjestruan vetëm për shkak të etnisë së tyre shqiptare.

Në përkujtimin e saj, Osmani ka shprehur dhimbjen për viktimat, duke përmendur fëmijët që humbën jetën në atë natë të tmerrshme: “Në atë natë të tmerrit, u vranë mizorisht edhe 19 fëmijë. Çanta e Altinit, këpucët e Redonit dhe biçikleta e Kushtrimit, janë kujtimet e fundit të fëmijëve të pafajshëm që u shuan dhunshëm”.

Vetëm tre anëtarë të familjes arritën të mbijetojnë nga kjo tragjedi: Vjollca Berisha, i biri i saj Gramoz dhe Shyhretja. Ata shpëtuan duke u hedhur nga një kamion në lëvizje, i cili po transportonte trupat drejt Prizrenit. Sipas rrëfimeve të Vjollca Berishës, në atë kamion ishin edhe të tjerë të plagosur rëndë, por që ende ishin gjallë.

Presidentja Osmani theksoi se të mbijetuarit janë dëshmi e gjallë e krimit dhe e pritjes për drejtësi: “Të mbijetuarit janë dëshmi e krimit dhe e pritjes për drejtësi, prandaj dhimbja nuk do të shuhet kurrë, e as zëri ynë nuk do të heshtë”, tha ajo.

Në fund, Osmani nënvizoi se “nuk mund të ketë paqe të qëndrueshme pa drejtësi,” duke bërë thirrje për të siguruar që krimet e kryera nga regjimi serb të dënohen dhe të mos harrohen kurrë.