Në Kosovë pritet të mbajë mot me diell dhe vranësira të shpërndara, të shtunën.

Instituti Hidrometeorologjik i Kosovës bën të ditur se vranësirat gjatë pjesës së dytë të ditës parashihen që vende-vende të shoqërohen me riga shiu.

“Temperaturat minimale do të variojnë nga 0°C deri në 3°C, ndërsa maksimalet do të arrijnë nga 17°C deri në 20°C”, thuhet në njoftim.

Sipas IHMK-së, era do të fryjë nga juglindjes me shpejtësi 1-6m/s.

Kryetari i Komunës së Malishevës, Ekrem Kastrati, ka njoftuar se puna në renovimin thuajse të plotë të objektit të vjetër të banimit social po ecën për së mbari.

Të gjitha familjet në nevojë që jetojnë në këtë objekt do të kenë kushte më të mira jetese, falë investimeve që janë duke u bërë në bashkëpunim me Fondin e Kosovës për Efiçiencë të Energjisë.

Sipas tij, masat që po implementohen në këtë objekt janë: izolimi i jashtëm, renovimi i koridoreve, izolimi i kulmit, ndërrimi i dyerve të brendshme, dritareve, si dhe vendosja e kondicionerëve për secilën familje që jeton në këtë objekt të banimit social.

Kastrati theksoi se Komuna do të vazhdojë me punë të mira dhe në përkrahje të të gjithëve pa dallim./PrizrenPress.com/

Në Prizren ka filluar ndërtimi i objektit administrativ për shoqatën “Esnaf”, një projekt i realizuar në bashkëpunim me Ministrinë e Zhvillimit Rajonal.

Ky investim synon të krijojë një mjedis më të përshtatshëm për zejtarët, duke u ofruar kushte moderne për zhvillimin e veprimtarisë së tyre.

Përmes këtij projekti, synohet forcimi i zejeve tradicionale dhe mbështetja e zhvillimit ekonomik lokal, duke e ruajtur trashëgiminë zejtarie si pjesë e identitetit kulturor të Prizrenit./PrizeenPress.com/

Të premten, në afërsi të Obeliskut të UÇK-së, në rrugën për fshatin Leskovec të Prizrenit, u mbollën disa fidane në kuadër të aktiviteteve për Ditën Ndërkombëtare të Pyjeve. Ky aktivitet u organizua nga Fakulteti i Shkencave Pyjore dhe Mjedisit i Universitetit “Ukshin Hoti” në Prizren, me pjesëmarrjen e profesorëve dhe studentëve të këtij fakulteti, si dhe përfaqësuesve të Agjencisë Pyjore të Kosovës dhe Parkut Nacional të Sharrit.

Prof. Dr. Faruk Bojaxhi theksoi se ky aksion simbolik kishte për qëllim bashkimin e institucioneve lokale dhe qendrore në promovimin e mbrojtjes së mjedisit. Ndërkohë, inxhinieri i pylltarisë në Agjencinë Pyjore të Kosovës, Gëzim Vuçitërna, vuri në dukje se situata e pyjeve në Kosovë ka shënuar përmirësime falë zvogëlimit të prerjeve ilegale.

Nga ana tjetër, Afërdita Shala nga OJQ “Mjedisi dhe Zhvillimi i Kapaciteteve Rinore” dhe studentja Hana Kryeziu shprehën kënaqësinë e tyre për pjesëmarrjen në këtë aktivitet të rëndësishëm, i cili ndihmon në ngritjen e vetëdijes për mbrojtjen e natyrës.

Ndryshe, Dita Ndërkombëtare e Pyjeve, e cila shënohet më 21 mars, u festua me disa aktivitete të ndryshme në Prizren, me qëllim promovimin e vlerave natyrore dhe ndërgjegjësimin për mbrojtjen e tyre. Në kuadër të këtyre aktiviteteve, pjesëmarrësit mbollën fidane në afërsi të Obeliskut të UÇK-së në Leskovec./tv prizreni/

Nënkryetari i LDK-së, Anton Quni, ka thënë se nuk e përjashton mundësinë e një koalicioni qeverisës me Lëvizjen Vetëvendosje.

“Unë nuk kam personalisht vija të kuq përkundër gjitha atyre frustrimeve dhe konfuzioneve që janë shkaktu, këto janë çështje që diskutohen në organet më të larta të LDK-së”, tha Quni.
Megjithatë, sipas tij për t’u arritur një gjë e tillë duhet të arrihet të implementohet programi i tyre qeverisës.

“Janë shumë të panjohura të cilat do të munden me u diskutu, ne e kemi një program politik me të cilin kemi bërë ofertë qytetarëve dhe për të cilin ne besojmë se Kosovën e nxjerr nga ky qorrsokak. Edhe nëse ne arrijmë si parti politike me implementu programin tonë në qeverisës atëherë duhet të merren në konsideratë të gjitha opsionet”, tha ai, për RTV21.

Quni komentoi edhe kërkesën e ndërkombëtarëve për qeveri stabile, duke thënë se qeverinë e ardhshme e presin procese komplekse.

“Kërkesa e ndërkombëtarëve është shumë e arsyeshme nga fakti se në agjendën e cilës do qeveri do të jenë disa prioritete esenciale për të ardhmen e Kosovës, jo vetëm të Kosovës por edhe për rajonin më gjerë. Prandaj duke filluar nga partia fituese, e cila do ta ketë mundësinë ta ndërtojë koalicionin deri të opsionet e tjera, duhet ta kenë parasysh këtë fakt se një qeveri e radhës duhet të jetë kredibile për faktin se do të menaxhojë procese shumë komplekse për të ardhmen e Kosovës.”, deklaroi Quni.