Dyert e institucioneve të Kosovës do të mund të bllokohen sërish. Pranë Qeverisë dhe Kuvendit pritet të kthehen me protesta ish-ushtarët e UÇK-së. Ata thonë se këtë veprim do ta bëjnë nëse shteti nuk i gjen paratë për t’ua paguar pensionet e premtuara.

E në Qeverinë e Kosovës tashmë janë deklaruar se për pensionet e veteranëve kanë para vetëm edhe për disa muaj, shkruan Gazeta Fjala.

Vërejtje se mund të rrezikohet buxheti nga pagesa e veteranëve Qeveria e Kosovës ka marrë edhe nga Fondi Monetar Nderkombetar.

“Ne jemi në një fazë ku e rrezikojmë marrëveshjen drejtë për së drejti me FMN-në. Nuk e di ende se çfarë zgjidhje duhet gjetur tani për ta tejkaluar këtë çështje. Të dhënat e fundit tregojnë numrin prej 46 mijë e 230 veteranëve. Kjo i tejkalon të gjitha parashikimet tona”, ka deklaruar ditë më parë Ministri i Financave Avdullah Hoti.

Mirëpo, atyre që luftuan për pavarësinë e Kosovës nuk iu interson aspak ky fakt.

Kryetari i veteranëve të Kosovës, Smajl Elezaj, thotë se Qeveria është e obliguar ta respektoj ligjin, për të vazhduar me pagesa për veteranët.

Elezaj, e quan propagandë një vendim të tillë, derisa arsyetohet se numri prej 46 mijë i veteranëve, nuk merr paga nga buxheti i shtetit.

Sipas tij, një numër i tyre janë të punësuar, ndërkaq disa prej tyre punojnë edhe jashtë shtetit, gjë që sipas Elezajt, i tërhjek automatikisht, nga lista e pagave një numër të tyre.

“Nuk janë 46 mijë veteranë që do të marrin paga nga buxheti i Kosovës, pasi një numër i konsiderueshëm janë të punësuar, disa punojnë jashtë, kanë pas biznese dhe i kanë shly bizneset. Nuk ka fuqi ekzekutive Qeveria të merr vendim , përshkak se ligji është i miratum në Parlament të Kosoves”, ka thënë për Gazetën Fjala, udhëheqësi i veteranëve.

Elezaj, tregohet mjaft i vendosur e i guximshëm, duke i adresuar një lloj forme Qeverisë kërcënime, se nuk mund të konfrontohen me veteranët.

“Duhet ti gjajnë burimet për me u përball me veteranët, nuk besoj që janë aq budall me u konfrontu me veteranët, sjemi aq budall, që me u ballafaqu me neve”, ka deklaruar ai.

Protestë, nëse nuk paguhen veteranët

E nëse veteranët, nuk do ta arrijnë qëllimin e tyre, për të marrë pagat që iu takojnë me ligj, ata kanë gjetur një rrugë tjetër alternative për t’iu kundërpërgjigjur vendimit të Qeverisë.

Kryetari i Këshillit për mbrojtjën e veteranëve, Xhevdet Qeriqi, ka thënë për Gazetën Fjala, se qeveria është dashur me kohë ti bëj planifikimet buxhetore.

Mirëpo, përkundër kësaj, nëse vendimi i Qeverisë do të fuqizohet, Qeriqi, ka thënë se protestat janë të pashmangshme.

“Qeveria me kohë është dasht me i ba planifikimet buxhetore .Na kemi reagu për këtë çështje mirëpo Qeveria nuk ka reagu në këtë drejtim Në rast se nuk paguhen veteranët, protestat janë të pashmangshme”, ka thënë për Gazetën Qeriqi.

Se me ligj iu takon paga prej veterani, njësoj sikur Smajl Elezaj, mendon edhe Qeriqi. Derisa ky i fundit, pohon se vazhdimisht janë bërë keqpërdorime me këtë kategori.

“ Qeveria është e obligume me ligj me i kry obligimet për veteranët.Në vazhdim janë ba shkelje e ka pas keqpërdorime. Si do që të jetë nëse nuk jepen pensionet siq shihen me ligj do të protestojmë”, ka shtuar ai.

Derisa, Fondi Monetar Ndërkombtar, vazhdimisht po alarmon, se numri për të paguar 46 mijë veteranët, po e rrezikon buxhetin e shtetit edhe për vitin e ardhshëm.

Në një prononcim për Gazetën Fjala, shefi i FMN-së për Kosovën, Ruud Vermeulen ka thënë se për momentin pensionet e veteranëve janë të mjaftueshme por nëse nuk reformohen skemat e lidhura me luftën buxheti për vitin 2017 mund të jetë në rrezik.

“…vitin e ardhshëm do të jetë vërtetë e vështirë për të mbajtur deficitin brenda kufijve të rregullës fiskale në qoftë se nuk bëhet asgjë”, ka bërë të ditur shefi i FMN-së, për Gazetën Fjala. /Gazeta Fjala

Partia më e madhe në vend (PDK) e sheh të nevojshme arritjen e një konsensusi nacional për çështjen e demarkacionit me Malin e Zi, derisa LDK-ja insiston se demarkacioni shumë shpejt do të shkojë në Kuvend. Opozita ka një alternativë që kjo çështje të zgjidhet deri në shtator

Partia Demokratike e Kosovës (PDK), e cila për më shumë se dhjetë muaj e ka mbështetur Marrëveshjen për Demarkacionin e Kufirit me Malin e Zi, tani është më e rezervuar për këtë çështje.

Madje përfaqësuesit e partisë më të madhe në vend tani thonë se është e nevojshme gjetja e një konsensusi nacional, pasi, sipas tyre, përveç mospajtimeve ndërmjet partive politike parlamentare, ka mospajtime edhe brenda vetë partive. Ata thonë se nuk ka asnjë arsye që në Kosovë të këtë hidhërim në raport me demarkacionin.

Në anën tjetër, zyrtarët nga Zyra e kryeministrit thonë se Marrëveshja për Demarkacionin do të dërgohet së shpejti në Kuvend për t’u ratifikuar. /Zëri

Ndryshimi, në duart e votuesve. Populli duhet të vetëdijesohet

Pritja për zgjedhje të reja lokale dhe parlamentare është një pritje e madhe në mesin e qytetarëve të zhgënjyer në këtë klasë politike, me qëllim të përpjekjes për ndryshime pozitive në qeverisjen e vendit, duke sprovuar fuqinë dhe vetëdijesimin e popullit të stërvuajtur të Kosovës për t’i ndarë përfundimisht nga politika e konsumuar dhe për ta nxjerrë në sipërfaqe një alternativë të re të shpresës dhe ndryshimit të madh, shkruan Kosova Sot.

Analistët politikë vlerësojnë se procesi i ri zgjedhor në vend, qoftë për lokalet apo qendroret, duhet të jetë një “revolucion” demokratik i ndëshkimit me votë të klasës së dështuar politike, megjithëse akoma nuk ka një analizë të besueshme që flet se sa është i gatshëm qytetari të bëjë ndryshime të tilla dhe të nxjerrë një alternativë të re politike të besueshme dhe shpresëdhënëse për perspektivë të re.

Analisti politik, Arsim Haziri, konsideron se tani është koha dhe momenti kritik i thyerjes së stereotipave të votueseve, pasi që shpenzimi joproduktiv i kësaj klase politike ka arritur kulmin.

“Qytetarët janë ata që mund ta bëjnë ndryshimin. Por, duhet pasur parasysh se pushtetet e pasluftës kanë krijuar mekanizma, të cilët është vështirë të zhbëhen”, thekson ai.

Sipas Hazirit, rrjeti e pushteteve të pasluftës është shtrirë aq thellë, saqë nuk mund të imagjinohet.

“Kapja e institucioneve të pavarura nga qeveritë e pasluftës ka krijuar një mekanizëm për partitë, të cilët kanë qenë në pushtet. Gjithherë ka një hapësirë të vogël për të shpresuar për ndryshim, dhe njerëzit e infektuar dhe të vuajtur nga kompleksi i inferioritetit që të pozicionohen në politikë”, u shpreh më tej ai.

“Shpresa për ndryshim duhet menduar si mundësi e mundësisë, por ndryshimit duhet t’i prijnë njerëz të ndërgjegjshëm, njerëz me virtyte të larta njerëzore, intelektuale dhe morale. Një klasë me këto virtyte njerëzish mund të kthejë masën për ndryshim, pasi që edhe qytetarët e kanë humbur shpresën për ndryshim, gjithherë duke pasur parasysh klasën politike e cila udhëheq nga paslufta”, tha Arsim Haziri për Kosova Sot.