Kanë mbetur rreth tri javë para se kur këngëtarja e re kosovare Dua Lipa, që po ndërton karrierën e saj në Britani të Madhe e Amerikë, të kthehet në qytetin e saj të origjinës, në Prishtinë, me një koncert për adhuruesit e saj në parkun e Gërmisë.

Kompania organizative e këtij koncerti, Republika Marketing Communications Agency, njofton se biletat e koncertit të 9 gushtit, që kushtojnë 10 dhe 15 euro, do të jenë në shtije nëpër Kosovë nga dita e marte (26 korrik).

Rikujtojmë se ky koncert ka karakter bamirësie dhe se i gjithë fitimi nga shitja e biletave do të shkojnë në fondacionin e saj të bamirësisë SunnyHill Fundation.

Të interesuarit mund t’i gjejnë biletat në të gjitha pikat e Z Mobile nëpër Kosovë dhe në lokalet specifike në qytete të ndryshme siç janë “Bon Vivant”, “Soma”, “CheBar”, “Guest”, “Matisse”, “Lulu’s”, “Morena Bar”, “Papillon”, “Lounge i Vogël” dhe “Bukatore Dita” në Prishtinë, “Soho” dhe “Dio” në Pejë, në “Fellaz”, “Kafiq”, “Kinezi” dhe “Qarshia” në Prizren, në “Cacoo” dhe “Del House” në Gjakovë, në “Check-in” dhe “Bar Code” në Mitrovicë, në “Imprevu”, “Tribeca”, dhe “Taboo Bar” në Gjilan dhe në “Coco Lounge” dhe “French Lounge” në Ferizaj.

Të interesuarit që ndodhën jashtë Kosovës mund t’i sigurojnë biletat përmes RaveTravel.

Pas koncertit në Prishtinë, Lipa do të udhëtojë për në Tiranë, ku do të prezantojë një koncert të hapur në sheshin “Nënë Tereza”, më 10 gusht. / KosovaLive

Lulzim Hoti nga “Green Fest”, ka bërë të ditur për KultPlus se në këtë festival do të prezantohen artistë përgjatë dy mbrëmjeve, sikurse që do të mbahet edhe edicioni i parë i panairit “Gjelbërt dhe Artizanateve 2016-edicioni i parë”.

Nga data 28 deri më 30 korrik “7 arte”, do të organizojë festivalin tradicional “Green Fest”, që këtë vit do të shënojë edicionin e gjashtë me radhë. Në këtë edicion “7 Arte” do të organizojë edhe panairin e “Gjelbërt dhe Artizanateve 2016-edicioni i parë”, shkruan KultPlus.

Organizatorët kanë bërë të ditur se në kuadër të këtij edicioni në “Green Fest”, do të prezantohen artistë të shumtë, nëpërmjet të cilëve edhe synohet sensibilizimi i opinionit kosovar për përkujdesje dhe vëmendje më të madhe ndaj mjedisit dhe të promovojë zhvillimin e qëndrueshëm të rajonit.

Lulzim Hoti organizator i këtij festivali ka thënë për KultPlus se qëllimi kryesor i këtij panairi është që të mbështes dhe promovojë kreativitetin, të rrisë vetëdijesimin e konsumimit të produkteve vendore dhe të nxisë zhvillimin e qëndrueshëm.

Ai më pas ka thënë se këtë vit, festivali do të pasurohet me një ngjyrim ekonomik, ku bizneset e vogla dhe të mesme nga industria kreative do të kenë rastin të promovojnë produktet e tyre. Artistët që do të performojnë në mbrëmjen e parë të këtij festivali që mbahet në Mitrovicë janë: Premenstrual Syndrome, Gipsy Groove, Shpat Deda, DJ Neritan, DJ Bekla, ndërsa në mbrëmjen e dytë do të ngjiten në skenë artistët si: Jutbina, BB Poqi & Armadillo, Asgjë Sikur Dielli, DJ Artan, Doroci.

Vendi ku “Green” do të argëtoj të rinjtë e Mitrovicës është platforma e palestrës “Minatori”, pranë urës kryesore të lumit Ibër në Mitrovicë. Ndërkaq, në panairin “Gjelbërt & Artizanateve” , 15 ndërmarrje të vogla dhe të mesme vendore, OJQ të ambientit dhe ndërmarrës të industrisë kreative do të ekspozojnë dhe promovojnë produktet e tyre. Green Fest 2016 është mbështetur nga: Ambasada Amerikane në Prishtinë, Ambasada e Luksemburgut, Ministria e Kulturës, Rinisë dhe Sportit, Komuna e Mitrovicës – DKRS dhe Drejtoria e Bujqësisë dhe Zhvillimit Rural./KultPlus.com