Të hënën është mbajtur mbledhja e Komitetit për Politikë e Financa të Kuvendit të Prizrenit, ku janë përcaktuar pikat e rendit të ditës për seancën e radhës së organit më të lartë legjislativ të komunës.
Pas mbledhjes së KPF-së, në të cilën mori pjesë edhe kryetari i Komunës, Ramadan Muja.
Para medieve ka folur kryesuesi i Kuvendit të Prizrenit, Kujtim Gashi, i cili ka bërë të ditur se ndër pikat që më së shumti janë debatuar në takim, kanë qenë ato që kanë të bëjnë me kërkesën e MAPL rishqyrtimin e vendimit të të datës 24 maj të vitit 2016, për dhënien në shfrytëzim të pronës për KRU “Hidroregjioni jugor” për ndërtimin e impiantit të ujërave të zeza në Vlashnje, rishqyrtimin e vendimit të datës 28 prill 2016, për lejimin e hartimit të hartave zonale të komunës, si dhe kërkesa e MAPH për rishqyrtimin e vendimit po të datës 28 prill 2016 nga Kuvendi i Prizrenit, për ndryshimin dhe plotësimin e Planit Rregullues Urban të Hollësishëm “Qendra e Re”.
Pikërisht për kërkesat për rishqyrtim të vendimeve nga Kuvendi ka pasur vërejtje anëtari i KPF-së nga LVV, Artan Abrashi, i cili kritikoi në radhë të pushtetin lokal të Prizrenit për mungesë të komunikimit të duhur me ministritë respektive të Qeverisë së Kosovës.
Në seancën e Kuvendit të Prizrenit, e cila është caktuar për ditën e mërkurë, pritet të debatohet edhe për pikën e rendit të ditës që ka të bëjë me shqyrtimin e Propozimvendimit për lejimin e debatit publik të Propozim-Rregullores për Orarin e Punës së subjekteve afariste Tregtare, Hoteliere, Zejtare dhe Shërbyese në komunën e Prizrenit./TV Prizreni/