Qeveria e Kosovës i ka bërë ftesë opozitës që të kthehet në Kuvend në mënyrë që të dialogojnë për të gjitha problemet, njofton Klan Kosova.
Këtë e ka thënë Isa Mustafa në mbledhjne e sotme të Qeverisë ku ai gjithashtu ka kërkuar nga opozita që të heqë dorë nga dhuna dhe diskursi i dhunës si dhe sulmit ndaj objekteve qeveritare dhe Policisë.
Në këtë mbledhje është thënë se Qeveria është e vendosur që të vazhdojë zbatimin e programit të saj të në të gjitha fushat.
Presidenti i Rusisë, Vladimir Putin, i ka udhëzuar forcat e armatosur të Rusisë që ta fillojnë tërheqjen nga Siria.
Putin i ka thënë ministrit të mbrojtjes së Rusisë, Sergei Shoigu, se forcat ushtarake ruse në masë të madhe i kanë arritur qëllimet e tyre në Siri.
“Prandaj unë e urdhëroj ministrin e mbrojtjes, që nga nesër, ta filloj tërheqjen e pjesës kryesore të kontigjentit tonë ushtarak”, nga Siria, tha Putin.
Ai më tutje, ka shprehur shpresë se tërheqja e forcave ruse do të jetë stimulim për zgjidhje politike të konfliktit në Siri.
Para më se pesë muajsh, presidenti Putin, ka urdhëruar lansimin e operacionit ushtarak në Siri, që e ka forcuar aleatin e tij, presidentin e Sirisë, Bashar al-Assad.
Zëdhënësi i presidencës së Rusisë, Dmitry Peskov, tha se Assad është pajtuar me Putinin për tërheqje, e cila është shpallur në ditën e bisedimeve për paqe në Siri në Gjenevë të Zvicrës, të sponzorizuara nga Kombet e Bashkuara, ndërmjet palëve në luftë. /REL/
Njohës të fushës së sigurisë dhe teorisë së shtetit të së drejtës janë të ndarë në mendime se a duhet që edhe shteti i Kosovës të përfundojë çështjen e lustracionit, apo zbardhjes së dosjeve të bashkëpunëtorëve të dikurshëm të UDB-së jugosllave që dominohej nga hegjemonia e Serbisë. Ndonëse kjo çështje është përfolur disa herë në media, në institucionet më të larta shtetërore, asnjëherë nuk është marrë ndonjë vendim i prerë se kur pritet të hapet si çështje. Veç kësaj, mbetet mister se a do të hapet kjo çështje në bisedimet e radhës Kosovë-Serbi që mbahen në Bruksel me ndërmjetësimin e BE-së.
Deputeti i Kuvendit të Kosovës nga PDK-ja, Fadil Demaku, ka thënë për “Kosova Sot” se nëse vendi ynë ka për qëllim të ecë përpara, sidomos të ketë një siguri ashtu siç duhet ta ketë një shtet demokratik. Sipas tij, sa më parë shteti ynë duhet të dijë për ish-bashkëpunëtorët e armikut. Më tej ai shton se kjo është e domosdoshme edhe për arsyen se të njëjtit mund të jenë potencialë edhe sot, duke shërbyer dhe punuar për ta në destabilizimin e vazhdueshëm të vendit në mënyra të ndryshmet.
Kështu që, siç thotë Demaku, sa më shpejt që të realizohet kjo, aq më i madh do të jetë interesi për vendin tonë për ta ditur këtë strukturë të njerëzve.
“Nëse vonohemi, çdoherë do të kemi probleme të natyrave të ndryshme, sidomos në aspektin e sigurisë, pasi dihet e kaluara, ata janë pushtuesit tanë dhe pretendimet e tyre janë të qarta, këtu s’ka asnjë dilemë”, thotë ai. /Kosova Sot/
Kuvendi i Kosovës sot (e martë) në orën 10:00 do të mbajë seancë plenare, në të cilën do të jetë vetëm një pikë e rendit të ditës: shqyrtimi i rekomandimit të Organit Përzgjedhës të Pavarur për emërimin e anëtarëve të Organit Shqyrtues të Prokurimit.
Tri partitë opozitare, Lëvizja Vetëvendosje!, Aleanca për Ardhmërinë e Kosovës (AAK) dhe Nisma për Kosovën, nuk do të marrin pjesë në këtë seancë, pasi konsiderohet vazhdim i seancës së kaluar. Adonis Tahiri, zyrtar për medie në Lëvizjen Vetëvendosje!, ka thënë se sot vazhdon seanca e kaluar dhe qëndrimi i opozitës mbetet i njëjtë.
“Prandaj, meqë të martën vazhdon e njëjta seancë, qëndrimi ynë ndaj kësaj seance mbetet i njëjtë. Opozita e bashkuar është duke u përqendruar maksimalisht në përgatitjet për tubimin në sallën ‘1 Tetori’ në Prishtinë që mbahet të shtunën, më 19 mars 2016, në orën 14:00, si dhe për protestën e radhës që mbahet në Prishtinë më 26 mars 2016. Sa i përket pjesëmarrjes së deputetëve të Lëvizjes Vetëvendosje! në seancat plenare të Kuvendit, ne do ta bëjmë vlerësimin nga seanca në seancë sepse nuk përjashtohet mundësia që koalicioni qeverisës të përpiqet të kontrabandojë në Kuvend gjëra të këqija si, p.sh., statutin e ‘Zajednicës’, likuidimin e Trepçës e të ngjashme, me ç’rast ne sigurisht se duhet të jemi aty për t’i bllokuar ato seanca”, ka thënë Tahiri për gazetën “Epoka e re”.
Ai ka thënë se VV-ja kërkon që të lirohen të gjithë të burgosurit politikë në Kosovë.
“Kërkojmë edhe një herë lirimin e të gjithë të burgosurve politikë në Kosovë. Janë 13 aktivistë të Lëvizjes Vetëvendosje! nëpër burgje të ndryshme nëpër Kosovë, përfshirë këtu Glauk Konjufcën, Dardan Molliqajn dhe Frashër Krasniqin. Po ashtu, janë edhe gjashtë deputetë të Vetëvendosje!-s dhe dy të AAK-së që vazhdojnë të mbahen në arrest shtëpiak”, ka deklaruar Tahiri.
Kurse zëdhënësi i AAK-së, Muharrem Nitaj, ka thënë për gazetën “Epoka e re” se, pavarësisht se deri më sot opozita e bashkuar ka pasur forma të ndryshme të kundërshtimit, pasi janë parti me profile të ndryshme, sipas tij, opozita mbetet e bashkuar për tema të caktuara. Ndërkaq sa iu përket zërave që opozita është zmbrapsur nga gazi lotsjellës, Nitaj ka thënë se këta zëra janë të paqëndrueshëm dhe, sipas tij, ishte pikërisht gazi lotsjellës që çoi në Gjykatën Kushtetuese çështjen e themelimit të komunave me shumicë serbe dhe bëri që të krijohet një komision ad-hoc për çështjen e demarkacionit.
“Kam përshtypjen se kjo pyetje dhe këta zëra janë tërësisht të paqëndrueshëm, pasi gazi lotsjellës i hedhur në Kuvendin e Kosovës, i cili nuk ka qenë ndoshta pjesa më e shndritshme e veprimit opozitar dhe asnjëherë nuk jemi krenuar me këtë formë të kundërshtimit, i ka dhënë rezultatet e veta. Rezultatet e përdorimit të këtij gazi lotsjellës janë dërgimi i Asociacionit të komunave me shumicë serbe në Gjykatën Kushtetuese, të cilin e ka nënshkruar kryeministri i vendit, e për të cilën Gjykata Kushtetuese ka bërë të qartë se është në kundërshtim flagrant me Kushtetutën e vendit”, ka thënë Nitaj, duke shtuar se si pasojë e përdorimit të gazit lotsjellës në Kuvend ka ndodhur edhe një nismë për krijimin e një komisioni ad-hoc për shënimin e kufirit me Malin e Zi.
“Besoj se këto nuk janë rezultate të pakta. Po mos të ishte përdorur gazi lotsjellës në Kuvend, sot të dyja këto marrëveshje të dëmshme për Kosovën do të ishin konsideruar tema të mbyllura”, ka deklaruar Nitaj.
E lideri i AAK-së dje ka qenë shumë më i qartë se i përket pjesëmarrjes së deputetëve të partisë së tij në seancat e Kuvendit.
“Parlamenti është shfrytëzuar për ta mbuluar kapjen e shtetit dhe marrëveshjet, por edhe me zgjedhjen e Thaçit president, që është arkitekt i kësaj kapjes së shtetit. Prandaj, një parlament i tillë meriton të shpërbëhet dhe vendi të shkojë në zgjedhje. AAK-ja nuk është pjesë e këtij parlamenti”, ka deklaruar Haradinaj.
As grupi parlamentar i Nismës për Kosovën nuk do të marrë pjesë në seancën e sotme. Këtë e ka konfirmuar për gazetën “Epoka e re” shefja e grupit parlamentar e Nismës, Valdete Bajrami.
“Nisma për Kosovën nesër nuk do të marrë pjesë në seancën e Kuvendit. Tani për tani ky është qëndrimi i Nismës”, ka thënë Bajrami.
Për këtë qëndrim të opozitës ka folur njohësi i çështjeve politike në vend, Imer Mushkolaj. Ai ka thënë për gazetën “Epoka e re” se së pari ekziston një shumicë parlamentare që mund të marrë vendime dhe të miratojë ligje dhe, sipas tij, nuk është e jashtëzakonshme që opozita nuk merr pjesë në seancën parlamentare.
“Ka praktika se për muaj të tërë opozita nuk ka marrë pjesë në punimet e Kuvendit në shtete të ndryshme, por kjo nuk do të mund ta arsyetojë atë se çfarë ligjesh mund të miratohen nëse nuk është opozita në Kuvend dhe nëse nuk jep vërejtjet dhe sugjerimet e veta substanciale”, ka thënë Mushkolaj. “Në anën tjetër, sa iu përket qëndrimeve jo të njëjta të VV-së ose të opozitës së bashkuar, besoj se janë të veçanta për secilën. AAK-ja ka zgjedhur mos të marrë pjesë, VV-ja mbase mund të marrë pjesë, pavarësisht se si është deklaruar”, ka thënë Mushkolaj, duke shtuar se strategjia e opozitës duhet të ndryshojë.
“E kam thënë edhe më herët, se strategjia e opozitës së bashkuar duhet të ndryshojë në kuptimin e qasjes që do ta ketë karshi punës në Kuvend”, ka deklaruar Mushkolaj.
Sipas tij, e mira e gjithë kësaj do të ishte që vendimet e opozitës të jenë të njëjta, e jo të larmishme.
“Do të ishte mirë për opozitën, që kur të marrën vendime, të jenë të njëjta për tërë bllokun opozitar, e jo të ketë laramani të vendimeve”, ka thënë Imer Mushkolaj.
Njohësi i çështjeve të sigurisë kombëtare, Ilir Kulla, ka thënë të hënën se dialogu do të ishte zgjidhja më e mirë për tejkalimin e krizës politike në Republikën e Kosovës.
Në këtë intervistë për “Epokën e re” ai u ka bërë thirrje pozitës dhe opozitës të gjejnë një komunikim të përbashkët për t’i zgjidhur problemet.
“Destabilizimi i mëtejshëm i jetës politike në Kosovë në muajt e fundit është dëshmi e një krize të qartë politike të vendit. Nga njëra anë kjo është mundësi e dëshmisë së maturisë së shtetformësisë, e cila shfaqet nëpërmjet aftësisë për t’i përballuar krizat në një shtet, nga ana tjetër është shfaqje tipike e jetës demokratike në shtet të ri. Natyrisht dialogu do të ishte zgjidhja më e mirë, por edhe protestat janë po aq demokratike sa edhe zgjidhjet politike, mirëpo e rëndësishme është të mos ketë dhunë”, ka deklaruar Kulla.
Ai ka thënë se njëherë përnjëherë zhvillimet e fundit nuk e dëmtojnë imazhin e shtetit por, sipas Kullës, institucionet qeverisëse duhet ta zbatojnë vendimin e Gjykatës Kushtetuese, ndërkohë opozita duhet ta respektojë rendin kushtetues të shtetit.
“Jo, nuk kanë pse ta dëmtojnë imazhin e shtetit të Kosovës për sa kohë nuk kalon në anarki. Në Kosovë ka një vendim të Gjykatës Kushtetuese dhe institucionet qeverisëse duhet ta zbatojnë, ndërsa opozita duhet ta respektojë rendin kushtetues të shtetit”, është shprehur Kulla.
Ai ka deklaruar se situata e sigurisë në shtetin e Kosovë është situatë e krizës politike dhe, natyrisht, nëse s’do të ketë zgjidhje politike, atëherë rrezikohet kolapsi i sigurisë.
“Situata e sigurisë në Kosovë është situatë e krizës politike, kështu që edhe zgjidhja është politike. Natyrisht, nëse s’do të ketë zgjidhje politike, atëherë rrezikohet kolapsi i sigurisë politike, por zgjidhja duhet të jetë politike. Kur them se zgjidhja duhet të jetë politike nënkupton që pikërisht pozita dhe opozita duhet të gjejnë një komunikim të përbashkët”, ka vlerësuar Kulla.
Më tutje, Kulla ka thënë se sot Kosovës i duhet një optimizëm social-politik dhe paniku nuk është i dobishëm. Sipas tij, në këto kushte zgjedhjet e parakohshme mund të jenë një zgjidhje optimale.
“Jo, unë mendoj se angazhimi i organeve ligjzbatuese, policisë dhe prokurorisë, përkeqëson klimën politike. Unë mendoj se institucioni i deputetit dhe i opozitës është i shenjtë në demokraci. Gjithashtu, mendoj se sot Kosovës i vyen një optimizëm social-politik dhe paniku nuk është i dobishëm. Në këto kushte zgjedhjet e parakohshme mund të ishin edhe një zgjidhje optimale”, ka theksuar Kulla. /Epoka e Re/
Vazhdimi pa rrugëdalje i kësaj krize politike dhe institucionale në vend, që nga shtatori i vitit të kaluar, pa shenja të dialogu politik për gjetjen e zgjidhjes, sipas përfaqë- suesve të politikës në vend dhe analistëve, po e rrezikon seriozisht demokracinë e brishtë në Kosovë . Vlerësohet se vendi po rrëshqet në situatën ku sundon vetëm anarkia, antiligji dhe oligarkët, por jo edhe shteti i së drejtës për të cilin u luftua në Kosovë, për të pasur liri, demokraci dhe ligjshmëri- një shtet ligjor, por jo një shtet që është i kapur nga një grusht mafio-oligarkësh në të tri pushtetet e tejinkriminuara.
Deputeti i LDK-së, Adem Salihaj konsideron se duke marrë parasysh se Kosova në asnjë mënyrë nuk arriti ta instalojë shtetin e sundimit të ligjit, atëherë nuk mund të flasim as për demokraci të mirëfilltë, as për shtet në të cilin vërtet funksionojnë institucionet e tij demokratike.
“Po ashtu, kemi një polarizim ekstrem të blloqeve politike pozitë-opozitë dhe një luftë të papajtueshme në mes tyre, deri në dëmtimin serioz të interesave vitale të shtetit tonë”, theksoi ai. /Kosova Sot/
Gazetari Nuhi Bytyçi, i cili kishte raportuar në luftën e fundit në Kosovë dhe kishte shumë kontakte gjatë luftës me krerët e Ushtrisë Çlirimtare të Kosovës, ka thënë në Zona B të Klan Kosovës se brenda UÇK-së kishte shumë mirëkuptim dhe bashkëpunim të ndërsjellë.
“Duhet të dihet se Hashim Thaçi asgjë nuk ka bërë pa e pyetur Jakup Krasnqin, po as pa e pyetur Fatmir Limajn, Rexhep Selimin e të tjerët”, ka thënë Bytyqi.
“Bashkëpunimi ka qenë shumë korrekt. Lahi Ibrahimaj ka qenë mik i mirë me Rexhep Selimin, por edhe me Kadri Veselin po ashtu”.
Bytyqi ka treguar edhe një rast nga vizita e diplomatit Christopher Hill.
“Kur Christopher Hill ka ardhur në vizitë në Likoc në Shtab të Përgjithshëm nuk na është lënë të xhirojmë, duke dalë i kam thënë kameramanit ta marr një sekuencë. Kur e kem xhiruar Hill-in ai ka thënë që ajo pjesë të mos transmetohet, dhe pastaj Rexhep Selimi na mori kamerën, por na tha se ‘do ua kthejmë sa po të shkoj diplomati’. Ai ashtu bëri. Na ktheu kamerën dhe ne e kemi transmetuar atë sekuencë aq të rëndësishme për luftën”, ka treguar Bytyçi në Zona B.
“Gjithashtu, kam xhiruar edhe betimin e UÇK-së, njërin nga momentet e veçanta”.
Bytyçi ka folur edhe për veprimtarin Adem Demaçi.
“Ishte një guxim i madh i Adem Demaçit që midis Prishtinës të hap zyrë të UÇK-së dhe të takojë diplomatë të huaj”.
“Një libër me gjithë këto rrëfime do të dalë së shpejti”, ka pohuar Bytyçi.
Polemikat e fundit në mes të ish-komandantëve të Ushtrisë Çlirimtare të Kosovës Bytyçi i quan të pakuptimta.
“Lufta e UÇK-së ishte e shenjt. Këto polemika në opinion nga disa komandantë me të vërtetë më duken të pakuptimta, duke para problemet që po i kalon Kosova”, ka thënë Bytyqi.
“Nuk është koha për këto tema, tani duhet të gjithë të angazhohen për përmirësimin e jetës dhe ndërtimin e shtetit. Ka mundur të ketë diçka të vërtetë nga këto polemika, por janë të parëndësishme, misioni i madh është arritur, është arritur lira dhe pavarësia”.
“Këto polemika njëfarë mënyre po ndikojnë në zhvillimin e popullit, Kosova ka përballuar situata të rënda që prej viteve 81, 89, 93 pastaj 97, 99 të gjithë e kemi pas një qëllim se më nuk durohet robëria dhe duhet të çlirohemi”.
Bytyqi ka deklaruar se puna e tij është bërë e mundur nga bashkëpunimi i shkëlqyeshëm që ai tha se e ka pasur me udhëheqësit e UÇK-së.
“Abaz Zeka ka qenë kameramani im që mendoj që të dy së bashku e kemi kryer misionin tonë, me mbështetjen e parezervë të Shtabit të Përgjithshëm, drejtorit politik Hashim Thaçit, zëdhënësi, Jakup Krasniqi, pastaj Ramush Haradinaj, Rexhep Selimi anëtar i shtabit, Rrustem Mustafa – Remi e Shukri Buja – të gjitha zonat na kanë ndihmuar”, ka thënë Bytyçi.
Indeksonline ka pranuar një informacion për rrahjen brutale të një nxënësi në shkollën fillore “Rudolf Walther” nga arsimtari Gani Sopjani.
Shkolla është në fshatin Denjë të Rahovecit, kurse sipas videos shihet se si arsimtari Sopjani godet pa mëshirë nxënësin.
Indeksonline kontaktuar me drejtorin e shkollës “Rudolf Walther”, Xhafer Berisha i cili ka konfirmuar për rrahjen, por ka thënë se tashmë gjithçka është sqaruar.
“Po rasti ka ndodhur për shkak se nxënësi ka folur fjalë të pista, mirëpo nuk ka pasur pasoja. Unë kam biseduar me arsimtarin edhe me babain e nxënësit dhe rasti është sqaruar, ka pasur kërkimfalje nga të dyja palët”, ka thënë Berisha. /Indeksonline/
Tmerruese: Arsimtari rrah brutalisht nxënësin e shkollës fillore në fshatin Denjë të Rahovecit
Gepostet von IndeksOnline am Montag, 14. März 2016
Fytyra e Anila Brahajt u zbeh së fundmi. 20 vjeçarja nga fshati Gjonaj e Prizrenit tani ka preokupim shëndetin e saj.
Kjo pasi studentja e juridikut ne Universitetin e Prizrenit, së fundmi u diagnostifikua me leukemi akute, njofton Klan Kosova.
Ndërsa, një sëmundje e tillë në Kosovë nuk mjekohet. Rrjedhimisht për këtë shërim mund të ketë vetëm jashtë vendit.
Familja e Anilës për shkaqe financiare nuk ka mundësi ta dërgojë vajzën jashtë vendit.Ajo po pret ndihmë nga të tjerët.
Familja ndihmë po pret edhe nga Ministria e Shëndetësisë ku edhe adresoi kërkesë për ndihmë.
Edhe zëdhënësi i ministrisë së shëndetësisë Faik Hoti konfirmoi se kanë pranuar kërkesë për ndihmë për këtë rast.
Por sikurse në rastet tjera miratimin apo jo të saj pritet ta bëjë komisioni adekuat brenda këtij institucioni.
Të rinjtë e fshatit Poslisht dhe Vlashnje të Prizrenit, kanë ndërmarrë një iniciativë për themelimin e bibliotekave nëpër shkollat e Vërrinit dhe Lumës.
Kjo iniciativë ka gjetur mbështetje nga bashkatdhetarët dhe bizneset në Prizren.
Imami i fshatit Poslishtë, Kurtish Hoxhaj, tha se ky aktivitet ka për qëllim themelimin e bibliotekave nëpër shkollat fillore të mesme të ulta në rajonin e Vërrinit dhe Lumës.
“Janë siguruar lektyrat shkollore nga klasa e I-rë, deri në klasën e IX-të sipas plan-programit të caktuar nga ministria e Arsimit të Republikës së Kosovës”.
“Deri më tani janë pajisur me nga 10 ekzemplarë për secilin titull SHFMU “ “Naim Frashëri “ në Vlashnje dhe ajo “Hasim Maliqaj” në Poslisht, kurse në radhë janë shkolla në fshatin Hoqë e Qytetit, Billushë dhe në Kobajë, ku brenda javes në vijim do të pajisen me lektura shkollore”.
“ Ky aksion po realizohet falë donatorëve nga diaspora, kryesisht nga Zvicra, si dhe bashkëpunëtorëve në fshatrat Vlashnje dhe Poslisht”.
“Ky aktivitet do të vazhdojë edhe në të ardhmen, ku do të sigurohen lektura edhe për shkollat tjera të cilat ende nuk janë pajisur”, njofton Kurtish Hoxhaj/TVPZ/