Komuna e Dragashit që shtrihet në jug të Kosovës,ende nuk e ka “hapur”zemrën për femrat. Në këtë komunë asnjë femër nuk është në krye të ndonjë institucioni.

Meshkujt në këtë komunë pos që pleqërojnë në krye të odave,ata janë të parët edhe në drejtim të institucioneve.

Ndërkaq, kryetari i Komunës së Dragashit Salim Jonuzi thotë se komuna e Dragashit është e para e cila ka hartuar Strategjinë për Barazi Gjinore/Zëri/

Presidentja e Kosovës, Atifete Jahjaga në intervistën dhënë gazetës “Zëri” për numrin festiv ka folur edhe për çështjen e presidentit. Ajo ka thënë se nuk do të kandidoj për një mandat të dytë.

”Mandati im përfundon më, 6 prill 2016’, ka thënë Jahjaga. E pyetur nëse në mandatin e dytë do të ishit edhe më e suksesshme, presidentja Jahjaga ka shtuar.

“Jam e përqendruar në përmbylljen e mandatit tim si presidente. Kam ende gjëra që më duhet t’i përmbyllë. Dhe mos harroni ende kam për të luajtur rol në tejkalimin e krizës aktuale. Kudo që do të jem, do të vazhdoj të jem e përkushtuar që të kontribuoj në forma të ndryshme në shumë çështje, të cilat i kam iniciuar në rolin tim si presidente”, ka thënë ajo, transmeton zeri.info.

Ndërkohë që sa i përket Hashim Thaçit president të ardhshëm, presidentja Jahjaga ka thënë se kjo do tu takoj deputetëve të Kuvendit të Kosovës.

“Është çështje e 120 deputetëve, që janë të thirrur me Kushtetutë, të zgjedhin presidentin e Republikës së Kosovës. Kjo del përtej detyrave të mia kushtetuese të jap vlerësim për këdo nga ky pozicion”,ka thënë Jahjaga

Top-skandalet në drejtësi

As 2015-ta nuk e përmirësoi sistemin e drejtësisë

Gjyqësia dhe Prokuroria vazhdojnë të jenë më tepër nxitëse të padrejtësive dhe aferave, sesa të luajnë rolin e tyre ligjor dhe kushtetues

Edhe ky vit që po e lëmë pas u karakterizua nga afera në sistemin e drejtësisë, akuza ndaj krerëve të gjyqësorit dhe prokurorisë, për korrupsion dhe abuzim me pozitën. Nuk munguan as skandalet në misionin evropian për sundimin e ligjit, EULEX.

Akuzat në KPK

Në muajin mars të këtij viti, u.d i kryeprokurorit të shtetit, Sylë Hoxha, pezulloi takimet e Këshillit Prokurorial deri në dekretimin e kryeprokurorit të ri të Shtetit, mirëpo pezullimi u quajt i kundërligjshëm nga nënkryetari i KPK-së, Idain Smaili, si dhe nga disa anëtarë të tjerë. Pas pezullimit të takimeve të KPK-së, Hoxha doli me akuza thuajse ndaj të gjithë anëtarëve të këshillit, por sot e kësaj ditë askush nuk është marrë me këto akuza.

Fshehja e rasteve të ndjeshme

Pas emërimit të kryeprokurorit të ri të shtetit, Aleksandër Lumezi, dolën në dritë dhe një sërë rastesh që kishin qenë mbajtur të fshehura nga paraardhësi i tij, Ismet Kabashi. Një ndër këto raste ka të bëjë edhe me hetimet ndaj ish-kryegjyqtarit të Kushtetueses, Enver Hasani.

Kryegjyqtari i Apelit, Sali Mekaj, në arrest

Më 20 korrik 2015, Policia e Kosovës arrestoi kryegjyqtarin e Apelit, Sali Mekaj, nën akuzën e shpërdorimit të detyrës. Në seancën paraprake gjyqësore, gjyqtarja Alltëne Murseli vendosi një muaj arrest shtëpiak për Mekajn, duke hedhur kështu poshtë kërkesën e Prokurorisë për paraburgim. Por, më vonë një kolegj i Gjykatës së Apelit, i përberë nga tre anëtarë të Gjykatës Supreme të Kosovës dhe i udhëhequr nga kolegu i Mekajt, gjyqtari Avni Dinaj, e ka konsideruar si joadekuate masën e arrestit shtëpiak të ricaktuar nga gjyqtarja Alltëne Murseli dhe ka vendosur që kjo masë të ndryshohet dhe e njëjta t’i zëvendësohet me masën e ndalimit për t’iu ofruar vendit ose personit të caktuar me kohëzgjatja prej 2 muajsh.

Saliuka, në KGJK me shkelje ligjore

Gjykata e Apelit, në takimin e kolegjiumit, të mbajtur më 5 gusht 2015, ka bërë përzgjedhjen e anëtarit të Këshillit Gjyqësor të Kosovës, ku thuhet se e kanë propozuar dhe zgjedhur për anëtare të KGJK-së gjyqtaren Makifete Saliuka. Mirëpo, kjo procedurë, sipas gjyqtarëve të Apelit, ka kaluar me shumë parregullsi. Më herët KGJK-ja kishte nxjerrë rregulloren mbi zgjedhjen e anëtareve të KGJK-së, e cila parasheh që nëntë nga anëtarët e Këshillit Gjyqësor dy të jenë të gjinisë femërore, duke e respektuar përfaqësimin gjinor. Rregullorja kishte paraparë që anëtari nga Gjykata e Apelit në këtë këshill të jetë femër, mirëpo me këtë vendim nuk ishin pajtuar gjyqtarët e apelit, të cilët kishin thënë së gjyqtarëve të gjinisë mashkullore nga kjo gjykatë po u mohohet e drejta për nominim për anëtar në KGJK-së dhe kishin kërkuar që të bëhet rishikimi dhe ndryshimi i rregullores, në mënyrë që të krijohet mundësia e kandidimit edhe për gjyqtarë nga gjinia mashkullore/kosova sot/

Lideri i AAK-së, Ramush Haradinaj ka dënuar ashpër thyerjen e varrezave në fshatin Romajë të Hasit, duke e quajtur këtë një akt qyqar. Ai ka kerkuar nga organet e rendit që bëjnë të pamundurën që të zbardhet ky rast.

“Është një fillimviti i keq thyerja e varrezave në fshatin Romajë. Është vepër kriminale dhe përpjekje dëshpëruese për të zbehur tolerancën fetare në Kosovë, e cila ka kohë që është shembull për shumë vende në rajon dhe më gjerë”, thuhet në një reagim të kreut të AAK-së, Ramush Haradinaj.

“E dënoj ashpër këtë akt qyqar dhe kërkoj që organet e rendit dhe të gjithë ata që mund të ndihmojnë, të bëjnë të pamundurën që të zbardhet ky rast, i cili I qet hije të keqe jo vetëm kësaj ane, por gjithë Kosovës. Varrezat janë objekte të shenjta dhe kushdo ngre dorë mbi to ka ngritur dorë mbi shenjtërinë e jetës së përbashkët shekullore të qytetarëve të të gjitha besimeve në Kosovë. Prandaj, nuk do të lejojmë askënd që të na I rrezikojë këto vlera. Unë dua të besoj se kjo është vepër e kriminelëve dhe keqbërësve ordiner, por pavarësisht prej kësaj, zbardhja e këtij rasti është me interes të jashtëzakonshëm për të gjithë ne”, thuhet në reagim.