Kryetari i Odës Ekonomike të Kosovës, Safet Garxhaliu ka inkurajuar kryetarin e Prizrenit, Ramadan Mujën, që të krenohet me shkeljet ligjore dhe dënimin që ka marrë nga Gjykata Themelore në Prizren. Ai tha se Muja ka sakrifikuar vetën për të tërhequr investitorë të huajë në Prizren.

“Prandaj, i nderuari kryetari Muja mbaje kokën lartë për këtë veprim”, i ka thënë Garxhaliu, Mujës në Prizren.

Kryetari i Prizrenit Ramadan Muja vitin e kaluar është dënuar me dy vjet burgim me kusht nga Gjykata Themelore në Prizren. Bashkë me Mujën janë dënuar edhe drejtorët e tij të Ekzekutivit. Muja me ‘shokë’ janë dënuar për keqpërdorim të detyrës zyrtare dhe keqpërdorime me pronën komunale.

Në qershor të këtij viti, Ramadan Muja, do t’i rikthehet gjykimit në Gjykatën e Apelit.

Kryetari i Odës Ekonomike të Kosovës, Safet Garxhaliu, ndërkaq ka lavdëruar kryetarin Ramadan Muja për veprimet kundërligjore që ka bërë siç ka thënë “për interes të rrijtes së zhvillimit ekonimik të Prizrenit”.

“Prizreni e ka një kryetar, i cili duke sakrifikuar vetën ka bërë tërheqjen e investitorëve të huaj dhe për këtë arsye edhe është dënuar”. /PrizrenPress.com/

Deputetja e Kuvendit të Kosovës, Duda Balje, sot është shpallur e pafajshme nga akuzat për mosraportim ose raportim të rremë të pasurisë, të ardhurave, dhuratave, dobisë tjetër materiale ose detyrimeve financiare.

Gjykatësi i Departamentit të Përgjithshëm, në Gjykatën Themelore të Prizrenit, Zejnulla Gashi, mori aktgjykim me të cilin e shpalli të pafajshme, duke e liruar nga akuza deputeten Duda Balje.

Një ditë më parë në fjalën përfundimtare prokurorja e shtetit Sahide Sefa, kishte thënë se gjatë gjykimit është vërtetuar kryerja e veprës penale nga deputetja Balje, ndërsa këtë e mbështeti në dëshminë e zyrtarit të Agjencisë Kundër Korrupsion si dhe provave tjera të administruara në gjykatë.

Ajo, i propozoi gjykatës që e pandehura Duda Balje të shpallet fajtore dhe të dënohet sipas ligjit.

Ndërsa Ruzhdi Berisha, avokati i Duda Baljes, i propozoi Gjykatës që të marrë aktgjykim lirues, me arsyetimin se në rastin konkret nuk ka ekzistuar elementi i dashjes, pa të cilin nuk mund të ekzistoj vepra penale.

Deputetja Balje, akuzohej nga Prokuroria e Shtetit se më 28 mars 2013 në kohë të papërcaktuar në Agjencinë Kundër Korrupsion në Prishtinë në cilësinë e zyrtares së lartë publike në formularin për deklarimin e pasurisë nuk ka paraqitur të dhënat e kërkuara.

Duda Balje, sipas aktakuzës së prokurorisë së shtetit, kishte paraqitur vetëm pagën bazë si deputete në shumën prej 17 mijë e 856 eurove, ndërsa në bazë të të dhënave të Kuvendit të Kosovës është konstatuar se të hyrat vjetore nga Kuvendi për këtë deputete janë 24 mijë e 327 e 19 euro.

Diferenca e mosdeklarimit të pasurisë është 6 mijë e 471 e 19 euro, diferencë të cilën deputetja Balje e merr për pjesëmarrje në seancat dhe mbledhjet e komisioneve parlamentare.

Për të njëjtën vepër penale, nga Prokuroria Themelore e Prizrenit, ishte akuzuar edhe ish- deputeti Nait Hasani, i cili poashtu u shpall i pafajshëm nga Gjykata. /Kallxo.com/

UNDP dhe USAID lansojnë Pulsin Publik, sipas të cilit përfaqësuesit politik si Presidentja, Kryetari i Kuvendit, Kryeministri dhe Institucionet tjera kanë arritur nivelin më të ulët të kënaqshmërisë

Kështu thuhet në një njoftim të UNDP-së të cilët kanë realizuar një anketë me qytetar të cilët kanë thënë se papunësia, varfëria dhe korrupsioni vazhdojnë të mbeten problemet më madhore në Kosovë.

Po ashtu, sot do të prezantohen edhe disa të dhëna lidhur me emigrim e kohëve të fundit nga Kosova ku më shumë se gjysma e respondemtëve është deklaruar se së paku një nga familjarët ose miqtë është larguar nga Kosova gjatë gjashtë muajve të fundit.

Projekti bashkëfinancohet nga USAID dhe UNDP. Rezultatet që do të prezantohen bazohen në analiza statistikore të anketës së Pulsit Publik që është zhvilluar gjatë fundit të marsit 2015 dhe ka përfshirë 1306 respondentë.

Alessandra Roccasalvo, zëvendëspërfaqësuese e përhershme e UNDP-së dhe Sara Buchanan, drejtoreshë e zyrës për Demokraci dhe Qeverisje pranë misionit të USAID-së do të marrin pjesë në ngjarje. /PrizrenPress.com/

Çështjet e identifikuara nga grupi teknik i ekspertëve të Kosovës për Gjykatën Speciale tejkalojnë kornizën e draftligjit të hartuar nga BE-ja për themelimin e kësaj gjykate.

Grupi teknik i ekspertëve nga Kosova, i cili është i ngarkuar nga presidentja Atifete Jahjaga për të diskutuar me BE-në për draftligjin për themelimin e Gjykatës Speciale, sipas një raporti konfidencial që ka siguruar “Epoka e re”, ka vlerësuar se çështjet e mbetura dhe të identifikuara përkitazi me këtë çështje tejkalojnë edhe vetë kornizën e draftligjit për këtë gjykatë.

Sipas këtij raporti, grupi teknik i ekspertëve ka kërkuar të qartësohet juridiksioni kohor i kësaj gjykate, pasi përcaktimi kohor 1998-2000 tejkalon periudhën kohore të luftës. Një veprim i tillë i BE-së, pa paralajmërim, sipas këtij raporti, mund ta dëmtojë procesin e themelimit të Gjykatës Speciale. /Epoka e re/

Kryeministri i Kosovës Isa Mustafa sot përmes Facebookut u është drejtuar mësues dhe arsimtarëve me kërkesën që ata të mos dalin në grevën e paralajmëruar dje nga SBAShK-u.

Mustafa ka shkruar në Facebook:

Në këtë shtet, i kemi borxh njëri tjetrit por të gjithë ne i kemi borxh Kosovës. Para së gjithash e kemi obligim të kujdesemi për fëmijët dhe të rinjtë tanë, të kenë mësim të rregullt dhe të mos shkaktojmë situata, që ata, në vend se të jenë në klasë dhe në salla të mësimit, të bredhin rrugëve dhe atje ku nuk duhet, nga teket politike dhe kërkesat e pabazuara të disa individëve në sindikatë.

Punonjësit e arsimit kanë rol fisnik dhe janë prindërit e dytë të fëmijëve tanë. Qeveria ka ndërmarrë masat e domosdoshme dhe ka siguruar mjetet për pagesën e përvojës në punë, përkundër shumë vështirësive buxhetore të cilat i kemi, të cilat janë shumë më të mëdha sesa duken në opinion.

Unë pres nga arsimtarët që ata të jenë pranë nxënësve të tyre dhe të mbajnë mësimin. Është përgjegjësi e madhe të vendoset që nxënësit të lehet në rrugë. Nuk është e drejtë që askush të marrë pagë të plotë e të mos e bëjë punën e vet.

Kryetari i Bashkimit Demokratik për Integrim (BDI), Ali Ahmeti, ka deklaruar se ngjarjet e fundit nuk mund të nxisin ndonjë destabilizim të brendshëm etnik në Maqedoni. Ai ka thënë se as shqiptarët e as maqedonasit nuk janë të interesuar për përplasje ndërmjet vete. Në këtë intervistë për “Epokën e re”, Ahmeti ka vlerësuar se të dy etnitë dëshirojnë integrimin e Maqedonisë në NATO dhe BE.

“As shqiptarët e as maqedonasit nuk janë të interesuar për përplasje mes vete. Tani Maqedonia po ballafaqohet me disa situata tërësisht të tjera, të cilat nuk kanë të bëjnë me etninë. Në veçanti, shqiptarët presin zbatimin e marrëveshjes së Ohrit, presin të materializohet agjenda e anëtarësimit të vendit në NATO dhe BE”, ka thënë Ahmeti. Ai ka treguar se shqiptarët e këtij vendi duan barazi me maqedonasit dhe fqinjësi të mirë të Maqedonisë me Kosovën dhe Shqipërinë.

Për fyerjet e shqiptarëve nga pushtetarët maqedonas, të cilët janë dëgjuar në përgjimet telefonike, ai ka thënë se nuk e kanë befasuar. Sipas Ahmetit, kjo është pasojë e mungesës së reformimit të mentalitetit të dikurshëm.

“Të jemi realistë, për t’u reformuar dhe për t’u transferuar mentalitetet tona duhet shumë kohë. Unë e kuptoj se provokime dhe ofendime të tilla kanë mundur të ndodhin, por ne duhet të jemi edhe shumë të hapur, sepse edhe nga pala jonë ka ofendime të tilla. Shembull, nëse ata na kanë thënë ‘shiptari’, ne u kemi thënë ‘shka’. Mendoj se këto gjëra janë trashëguar historikisht. Është fakt se këto gjëra kanë ndodhur në ato telefonata, por ato telefonata, pavarësisht se kanë qenë të funksionarëve të lartë maqedonas, kanë qenë private”, ka thënë Ahmeti, duke shtuar se gjëra të tilla nuk kanë ndodhur kurrë në komunikimet zyrtare mes shqiptarëve dhe serbëve.

Megjithatë, Ahmeti ka pranuar se është e papranueshme që fjalori i dëgjuar në përgjime të përdoret nga zyrtarët e lartë shtetërorë maqedonas. Në këtë drejtim ai ka treguar se ka kërkuar hetim nga bashkësia ndërkombëtare të të gjitha proceseve gjyqësore të cilat përmenden në përgjime.

Ahmeti ka mohuar daljen e BDI-së nga qeveria për shkak të ngjarjeve të fundit, duke thënë se ky subjekt politik është votuar nga shqiptarët për t’i mbrojtur interesat e tyre në institucionet shtetërore./Epoka e re/