Marrëveshja kontratë në mes të PDK-së dhe LDK-së për koalicionin qeverisës, që për president të radhës, në mars të vitit që vjen, të zgjidhet kryetari i PDK-së, Hashim Thaçi, është vlerësuar në vazhdimësi nga analistët politikë edhe opozita si një marrëveshje jodemokratike dhe tepër e rrezikshme për stabilitetin dhe funksionalitetin e institucioneve të shtetit, shkruan Kosova Sot.
Fillimisht kjo është parë si marrëveshje joserioze, për faktin se zgjedhjen e Thaçit president e vë në pikëpyetje brishtësia e koalicionit qeverisës, mospajtimi i shumë deputetëve të LDK-së për ta votuar Thaçin për president, derisa edhe dyshimet që janë për rolin e tij në kohën e luftës, përfshirja e tij në raportin e Dick Marty-t dhe ngritja eventuale e akuzës nga Prokuroria dhe Gjykata Speciale mund të vijnë si një tërmet që mund të shembë me themel kredibilitetin dhe integritetin e shtetit të Kosovës.
Analisti Blerim Burjani thotë se Kosova do të hynte në rrugë qorre, nëse Gjykata Speciale do të merrte si të dyshuar Hashim Thaçin.
“Kosova do të hynte në rrugë qorre, nëse Gjykata Speciale do të merrte si të dyshuar Hashim Thaçin. Do të ishte përfundimisht edhe fundi i PDK-së dhe karrierës së tij politike, por edhe fundi i të gjithë përfituesve në kurriz të Thaçit, e që shumë pakurrizorë, përkthyes të tij, tash ministra e ambasadorë e gjithçka, kanë përfituar nën emrin e tij dhe rolin e tij politik në vend. Kjo do të ishte katastrofë edhe për militantët e kësaj partie, sepse ata do të ndërroheshin prej fillimi deri në fund në një qeverisje të re të vendit, pra edhe do të humbnin”, thotë analisti Blerim Burjani. /Kosova Sot