Shkrimtari dhe publicisti Veton Surroi, njohës dhe i përfshirë thuaja në të gjitha proceset e udhëtimit të Kosovës deri në pavarësi, përmes një postimi në Facebook qartëson se nga Pakoja e Ahtisaarit nuk buron asnjë detyrim për formimin e Bashkësisë së Komunave Serbe, siç po pohojnë arkitektët e kësaj shpikjeje.
Në postimin e tij ai shkruan:

Sa për sqarim, në cilësi të negociatorit kyç më 2005-2007: Kosova nuk ka asnjë dhe të vetmin obligim nga Pakoja e Ahtisaarit për të krijuar Bashkësi të komunave serbe.

Kosova i ka integruar të drejtat të komuniteteve jo-shumicë (të drejtave minoritare) në Kushtetutën e Republikës.

Në këtë Kushtetutë, njëjtë, nuk ekziston kurrfarë obligimi për të krijuar Bashkësi të komunave serbe.

Përkundrazi, çfarëdo Bashkësie e komunave serbe e prish strukturën bazë qeverisëse në Kushtetutën e Republikës së Kosovës.

(Përgjigje spekulimeve qeveritare apo pro-qeveritare se Kosova e ka për borxh krijimin e Bashkësisë së komunave serbe) – përfundon postimi.

Artur Zheji, në një editorial të radhës analizon reagimin e kryeministrit kosovar Isa Mustafa ndaj deklaratave të ministres së Mbrojtjes së Shqipërisë, Mimi Kodheli.

“Deklarata e Isa Mustafës, ngjan edhe si një deklaratë shumë dinake në të njëjtën kohë. Është një përpjekje, jo e pasuksesshme, për të politizuar opinionet publike për çfarë po ndodh në Kosovë, e më pas, përmes politizimit, t’i kanalizojë si qëndrime interesash të partive, e pra të cungta dhe të pilotuara, e pra, dashakeqëse ndaj LDK apo ndaj qeverisë legjitime të Kosovës. Kjo është një vetëmbrojtje e dëshpëruar dhe nuk e transformon dot, një Kryeministër në burrë shteti,” shkruan Zheji.

“U ndjeva realisht i lënduar, nga përdorimi i rastit të ministres Kodheli, si një shantazh dhe për përdorimin e përgjegjësive politike e kombëtare për çka ndodhi në Shqipëri në vitin ’97, si një alibi, për të na mbyllur gojën, si të padenjë dhe të pa moral, në opinionet që vijnë nga Tirana,” vijon më tej ai.

Lexoni më poshtë tekstin e plotë:

Zotni Mustafa, kryeministri i Kosovës, është në hall të madh politik. Ka të bëjë me një opozitë radikale dhe me numra të paqëndrueshëm në qeveri dhe qeverisje.

Ndonëse nuk shkëlqen për ndonjë fjalor të shquar, për teza politike apo për suksese menaxheriale, shfaqi dje, një fodullëk të papranueshëm për opinionin publik. Rrëfeu, rrëmbyer nga nervozizmi, dhëmbët dhe kthetrat e veta, ndaj një deklarate shumë normale dhe aspak politike, më shumë se sa miqësore dhe dashamirëse, të ministres Mimi Kodheli.

Kodheli, duke parë edhe ajo si të gjithë ne, me shqetësim të madh përshkallëzimin e përplasjes politike në Kosovë, ku përçarja dhe përplasja po kalojnë çdo nivel dhe po bëhen realisht të rrezikshme për qëndrueshmërinë e këtij Vendi, që ne shqiptarët përkëtej kufirit, e konsiderojmë si Atdheun tonë gjithsesi, hodhi në eter një kujtesë dhe një copëz histori të dhimbshme shqiptare, që lidhet me vitin e mbrapshtë’97.

Mirëpo, zotni Mustafa, sikur u pickua, nuk dihet pse dhe nuk dihet se nga çfarë konkretisht.

Do apo nuk do Isa Mustafa, apo kushdo tjetër, ne jemi të gjithë shqiptarë dhe as nuk na mbyllet dot goja dhe as që kemi ndërmend ta bëjmë një gjë të tillë. Eksperienca tragjike e vitit ’97, ishte dhe mbetet një Gjëmë që e rrezikoi Shqipërinë në mënyrë ekstreme, duke kthyer mbrapsht procesin e zhvillimit të saj, në mënyrë katastrofike. Një Gjëmë që nuk duhet të përsëritet dhe që të mos përsëritet duhet të studiohet, si një periudhë e errët e historisë sonë. Kudo në tokat shqiptare.

Më duket se deklarata e Mimi Kodhelit ishte krejt në të njëjtën linjë të logjikës historike, si e mendojmë të gjithë ne dhe nuk besoj se ishte ndonjë ndërhyrje në politikën e brendshme të Kosovës. Ai ishte thjesht një opinion. Dhe lirinë për të shprehur një opinion e ka gjithkush.

Përse i djeg dhe pse na turret të gjithëve zotni Isa Mustafa?

Të gjithë ne opinionistët shqiptarë, pavarësisht qëndrimeve të tyre ndaj qeverisë X apo Y, këtu në Tiranë apo në Prishtinë, janë në rezonancë të plotë, që burgosja e Opozitës,në Shqipëri apo në Kosovë, është një akt ekstrem, sido që të përligjet apo të justifikohet një akt i tillë. Dhe nëse kjo shkon në mbështetje të lirisë së Albin Kurtit, nuk është një mbështetje për Albin Kurtin, por për shëndetin e demokracisë kosovare dhe mbi të gjitha, është një mbështetje për qëndrueshmërinë e Kosovës, Atdheut tonë të përbashkët.

Por deklarata e Isa Mustafës, ngjan edhe si një deklaratë shumë dinake në të njëjtën kohë. Është një përpjekje, jo e pasuksesshme, për të politizuar opinionet publike për çfarë po ndodh në Kosovë, e më pas, përmes politizimit, t’i kanalizojë si qëndrime interesash të partive, e pra të cungta dhe të pilotuara, e pra, dashakeqëse ndaj LDK apo ndaj qeverisë legjitime të Kosovës. Kjo është një vetëmbrojtje e dëshpëruar dhe nuk e transformon dot, një Kryeministër në burrë shteti.

E drejta për ta ndjerë Kosovën si Atdheun tim, me të mirat dhe me të këqijat e veta, është një e drejtë themelore ngritur mbi shumë gjak dhe sakrifica. Të cilat nuk zhbëhen dot, për kolltukun kryeministror të askujt. Ngado që të vijë dhe kushdo që të jetë ai. Të drejtë që keni reciprokisht detyrën të ushtroni edhe ndaj Tiranës, në mënyrë të paparagjykueshme.

U ndjeva realisht i lënduar, nga përdorimi i rastit të ministres Kodheli, si një shantazh dhe për përdorimin e përgjegjësive politike e kombëtare për çka ndodhi në Shqipëri në vitin ’97, si një alibi, për të na mbyllur gojën, si të padenjë dhe të pa moral, në opinionet që vijnë nga Tirana.

Kjo është një tentativë për të na larguar, duke na “hequr” këtë të drejtë themelore: Opinionin dhe Dhimbjen kur shohim një katastrofë që mund të afrohet pakthyeshmërisht në Kosovë.

Opozita ka të drejtë për kundërshtimin dhe kërkesat e saj, por nuk ka të drejtë të bllokojë funksionimin e institucioneve të Kosovës. Kosova e pranoi Planin e Ahtisarit si bazë për pavarësinë dhe duhet ta zbatojë me besnikëri.

Dhuna dhe përçarja më neveritin, këto nuk duhet të kenë vend në një institucion demokratik. Kështu ka thënë në një intervistë ekskluzive për gazetën “Zëri”, njohësi shumë i mirë i politikave dhe zhvillimeve qysh nga konfliktet e fundit, analisti amerikan Daniel Serwer.

Në zyrën e tij pranë qendrës për studime të avancuara ndërkombëtare në shkollën “John Hopkins” në Washington, në mesin e shumë simboleve dhe flamujve mban edhe atë shqiptar. Njeh shumë mirë situatën në vend, thotë se Kosova s’duhet të mbetet e izoluar, por ka si shqetësim gatishmërinë e kosovarëve për t’iu bashkuar “Shtetit Islamik”. Thotë se Kosova dikur ishte sekulare dhe se sot kjo po ndryshon.

Sa i përket luftimit të korrupsionit nuk është shumë i impresionuar me misionin e EULEX-it, por mendon se Kosova s’ka alternativë tjetër. Gjykatën Speciale e sheh si veprim të domosdoshëm, duke thënë se fakti është se krimet janë kryer kundër serbëve dhe shqiptarëve pas luftës së vitit 1999 në Kosovë. Autorët duhet të hetohen dhe të ndiqen penalisht.

Pa i dënuar individët përgjegjës, faji do të bjerë mbi Ushtrinë Çlirimtare të Kosovës. Shqetësues e sheh edhe tentimin e Rusisë për t’u shtrirë në Ballkan.

“Rusia po bën në Ballkan atë që është duke e bërë dhe në vende tjera: ajo po përpiqet të bllokojë atë që e sheh si zgjerim i NATO-s në sferën e saj të influencës dhe ka arsye të mirë për t’u shqetësuar në lidhje me këtë”, tha ai. /Zëri

Në organizim të Kryesuesit të Kuvendit të Prizrenit, Kujtim Gashi, sot është mbajtur një debat me qytetarë rreth plotësimit dhe ndryshimit të projektrregullores për Dekoratat nga Komuna e Prizrenit. Pjesë e këtij debati përveç disa qytetarëve ishin edhe këshilltarë të Kuvendit Komunal të Prizrenit. Para të pranishmëve, Kryesuesi Kujtim Gashi, tha se qëllimi i kësaj rregulloreje është që të përcaktoj procedurat, kriteret dhe llojet e dekoratave të cilat komuna e Prizrenit i ndanë për individët dhe subjektet, të cilët japin kontribut për qytetin e Prizrenit dhe më gjërë.

Ndërkaq, kuvendarët Getoar Besimi, Alush Shala dhe disa të tjerë, kërkuan që në këtë rregulloren në fjalë të përfshihen edhe propozimet e më shumë organizmave përfshirë edhe grupet e qytetarëve. Drita Millaku, tha ndërkaq përveç tjerash, që të drejtën e propozimeve për përzgjedhjen e lauretavë të dekoratave të ushtrojnë edhe këshilltarët e Kuvendit Komunal.

Ndryshe, rreth kësaj projektrregullore e cila është diskutuar në trajnime të shumta nga organizata të ndryshme, kontribut rreth plotësimit dhe ndryshimit të projektrregullores ka dhënë edhe këshilltari , Skender Susuri. Kjo projektrregullore para se të miratohet do të shqyrtohet nga organi më i lartë legjislativ në Prizren/tv prizreni/

Në fjalën e tij në Kuvend ish kryeministri i Shqipërisë Sali Berisha ka komentuar edhe ngjarjet e fundit në Kosovë. Deputeti demokrat është shprehur se, Tirana zyrtare nuk duhet të ndërhyjë në punët e Kosovës dhe se qeveria duhet të bashkëpunojë me Prishtinën pa dallime partiake.
Sipas tij, marrëveshjet janë tashmë në Gjykatë Kushtetuese dhe duhet pritur vendimi i saj.

“Kërkoj ndërprerjen e menjëhershme të ndërhyrjes së Tiranës zyrtare
në punët e brendshme të Kosovës. Cilido të jetë në pushtet në Kosovë, ne
në vlerësimin tim më të madh jemi të detyruar të destinuar të
bashkëpunojmë pa asnjë dallim partiak me ta, interesi me çdo fqinj, pa
lerë më pas me Kosovën, mesazhet e njëanshme janë të dënueshme.
Autoritetet e Kosovës asnjëri prej tyre nuk do situatën e krijuar në
vend, kanë firmosur marrëveshje të ndërmjetësuara nga BE dhe SHBA.
Autoritetet i kanë nisur marrëveshjet në Kushtetuese, duke kërkuar
ndërmjetësim ndërkombëtar, nëse duam të japim mend atëherë është shumë
lehtë ti anatemosh, por bën gabim shumë të rëndë, ato kanë bërë
përpjekjet e tyre, ligjin nuk e bllokojnë dot”, tha Berisha.

Në fund, ish kryeministri ngriti një pyetje retorike: “Në cilin parlament të botës hidhen bomba?”, përcjell Albeu.com.

“Nëse mendojmë se mund ta grisim bëjmë zuzarin po atë se grisim dot
fatkeqësia më e madhe e Ballkanit janë klikat zyrtare që nuk zbatojnë
marrëveshjet historike, ne kemi qenë viktimat më të mëdha, por në
tërësi, pavarësia erdhi mbi dokumentin e Ahtisarit, tani ta grisim atë,
jo se grisim atë, sepse bashkë me autoritetet kur ky ishte kryeministri,
unë isha, e tjetri jemi përpjekur të jetësohet pavarësia mbi bazën e
atij dokumenti, nëse ju bërtisni me njëanësi, në cilin kuvend hidhen
bomba dhe gaz, në cilin kuvend behet ashtu, do të bësh guerrilasin, dil
në mal jo në sallë të kuvendit, hajde flasim, duhet të jemi të hapur,
asnjë prej jush s’ka folur, gazi në kuvend është i papranueshëm”, tha
ai.