Drejtori i Qendrës Rajonale për Trashëgimi Kulturore në Prizren, Samir Hoxha dhe kryesuesi i Këshillit për Trashëgimi Kulturore të Prizrenit, Vesel Hoxhaj janë duke u hetuar nga Prokuroria Themelore e Prizrenit. Express merr vesh se këta dy zyrtarë po hetohen për keqpërdorim të detyrës zyrtare në rastin e rrënimit e Shtëpisë dhe Hanit të Mullafazlive në Prizren.
Prokuroria Themelore në Prizren, ka marrë aktvendim për fillimin e hetimeve kundër dy të dyshuarave. Express merr vesh se bëhet fjalë për Samir Hoxhën dhe Vesel Hoxhajn, të cilët janë bartës të institucioneve në këtë komunë.
Gazeta Express ka kontaktuar me Kryeprokurorin e Prokurorisë në Prizren, Sylë Hoxha, i cili ka thënë se ata po dyshohen për keqpërdorim zyrtar. Ai ka shtuar se rasti ka të bëjë më Shtëpinë dhe Hanin e familjes Mullafazliu.
“Dy të dyshuarit janë duke u hetuar për rrënimin e shtëpisë së familjes Mullafalziut. Të pandehurit dyshohen se nuk i kanë përmbushur detyrat zyrtare” ka thënë Hoxha.
Samir Hoxha dhe Vesel Hoxhaj dyshohen për veprën penale se nuk i kanë përmbushur detyrat zyrtare, me qëllim të përfitimit të çfarëdo dobie për personin tjetër, apo që t’i shkaktoj dëm një personi tjetër.
Hani i familjes Mullafazliu, një prej objekteve të rralla në Prizren, kaloi më 2 gusht të këtij viti në pronësi të një biznesmeni të shitjes së tekstilit. I njëjti e rrënoi atë. Pas kësaj Prokuroria kishte ngritur aktakuzë ndaj rrënuesit.