Vizita e Kerryt i motivon edhe më fort kundërshtuesit e “Zajednicës”. Analistët vlerësojnë se mesazhet e sekretarit amerikan kritikuan Qeverinë
Ndonëse është pritur me shumë shpresë që vizita kalimtare e sekretarit amerikan të Shtetit, Xhon Kerry, në Republikën e Kosovës të ketë efekt në përafrimin politik në mes të pozitës dhe opozitës, që së pakut opozita të ndryshojë qëndrimet e veta pas mesazhit të qartë për marrëveshjet kontestuese për Asociacionin dhe Demarkacionin, nuk pritet të ketë zbutje të qëndrimeve të mëhershme. Të dyja palët deklarimin e Kerryt e kanë interpretuar në mënyrat e tyre.
Kreu i Lëvizjes Vetëvendosje, Visar Ymeri, e ka shtruar nevojën që për të pasur marrëveshje të mirëfilltë të normalizimit të marrëdhënieve në mes të të dyja vendeve, në cilësinë e shteteve të pavarura, atëherë duhet të merret modeli kroato-serb i zgjidhjes së problemeve edhe në raport mes Kosovës dhe Serbisë.
“Kjo marrëveshje e nënshkruar në vitin 1996, pra një vit pas përfundimit të luftës, që në fjalinë e parë e siguron ekzistencën e dy shteteve. Këto dy shtete pastaj që në nenin 1 të marrëveshjes zotohen se “palët kontraktuese do të respektojnë njëra-tjetrën si shtete të pavarura, sovrane dhe të barabarta brenda kufijve të tyre ndërkombëtarë”, ka thënë Ymeri.
Sipas tij, marrëveshja që njihet me emrin e ngjashëm, më saktësisht “Marrëveshja e parë e parimeve që udhëheqin normalizimin e marrëdhënieve”, e nënshkruar mes Thaçit e Daçiqit, nuk ka asnjë referencë të Republikës së Kosovës.
Ndërkaq, analisti Nexhmedin Spahiu thotë se mesazhet e sekretarit amerikan kritikuan Qeverinë.
“Kjo vizitë dhe këto deklarime do të duhej të kishin refleksion pozitiv, por për aq sa kemi mundur të vërejmë kjo vizitë ishte një lloj ngrehje veshi për Qeverinë e Kosovës”, tha analisti Nexhmedin Spahiu. /Kosova Sot