Rifat Jashari i dha mbështetje të plotë Komisionit, duke theksuar se edhe të rënët e paraluftës çlirimtare për liri dhe pavarësi janë dëshmorë të kombit.

“Në vazhdën e veprimtarisë për të kërkuar mbështetje, Komisioni i Familjeve të Heronjve dhe Dëshmorëve të Kombit (KFHDK) qëndroi në Prekazin legjendar, me ç’rast vizitoi familjen emblematike të heroit kombëtar, komandantit legjendar Adem Jashari, familje e cila është shembulli më i mirë dhe më kuptimplotë dhe me konotacion shumëdimensional, duke i dhënë atdheut mbi 50 heronj dhe dëshmorë të kombit për liri, pavarësi dhe bashkim kombëtar.

Rifat Jashari u dëshiroi mirëseardhje anëtarëve të Komisionit.

Gjatë një bisede shumë të ngrohtë dhe tejet vëllazërore, kryetari Naim Zhitia, në emër të Komisionit e falënderoi Bacën Rifat për mikpritjen të cilin e njoftoi me aktivitetin dhe kërkesat e Komisionit, të cilat kanë të bëjnë me dëshmorët e rënë në fushën e nderit të paraluftës çlirimtare për liri, pavarësi dhe bashkim kombëtar, në mënyrë që me ligj t’u njihet statusi i dëshmorëve të kombit, ashtu si edhe të gjithë dëshmorëve tjerë.

Rifat Jashari me këtë rast iu dha mbështetje anëtarëve të Komisionit për aktivitetin në drejtim të zyrtarizimit edhe të plejadës së dëshmorëve të paraluftës çlirimtare për dëshmorë të kombit.

Duke kërkuar mendimin edhe të familjes Jashari, Naim Zhitia dhe anëtarët tjerë të Komisionit, Bacën Rifat e njoftuan edhe me iniciativën për themelimin e Shoqatës, e cila do t’i trajtojë në mënyrë të barabartë të gjithë dëshmorët e kombit pa dallim periudhe kohore.

Rifat Jashari me këtë rast i dha mbështetje të plotë Komisionit, duke theksuar se edhe të rënët e paraluftës çlirimtare për liri dhe pavarësi janë dëshmorë të kombit, për çka institucionet e Kosovës duhet t’i njohin ashtu si edhe dëshmorëve të tjerë. Prandaj, me këtë rast Baca Rifat i dëshiroi punë të mbarë dhe suksese Shoqatës në rrugëtimin e saj për të mbrojtur gjakun e derdhur të të gjithë dëshmorëve të kombit në të gjitha periudhat e rezistencës ndaj pushtuesit serb.

Po ashtu Komisioni në fjalë gjatë ditës vizitoi edhe familjen e Tahir dhe Nebih Mehës në po këtë fshat, me ç’rast nipi i Tahir Mehës, Ilir Meha, i priti anëtarët e komisionit në kullën e dëshmorëve të kombit dhe në familjen e tij.

Pasi falënderuan për mikpritjen, Komisioni në Kullën e Tahir dhe Nebih Mehës mbajti një mbledhje, në të cilën u diskutua për hapat e ardhshëm që do bëhen me qëllim të arritjes së kërkesave të drejta të Komisionit për dëshmorët e paraluftës çlirimtare. Në këtë Kullë, në truallin e të cilës Tahir e Nebih Meha, duke luftuar kundër njësive speciale të ish-Jugosllavisë 23-milionëshe, ia dridhen themelet krijesës artificiale jugosllave, apo burgut të popullit shqiptar, duke bërë jehonë të madhe për heroizmin dhe luftën e pabarabartë që u zhvillua më 13 maj 1981, u vendos që të themelohet Shoqata e Familjeve të Heronjve dhe Dëshmorëve të Kombit.

Ndërsa, me qëllim të sensibilizimit edhe më të madh dhe për të bërë presion në institucionet qeveritare të Kosovës, u vendos që më 28 Nëntor, Ditën e Flamurit Kombëtar dhe Ditën e Pavarësisë së Shqipërisë, të organizohet një protestë, me kërkesë të vetme që dëshmorët e paraluftës të njihen dëshmorë të kombit sipas Ligjit aktual, i cili faktikisht i njeh dëshmorë edhe të gjithë të rënët në periudha dhe forma të ndryshme për lirinë dhe pavarësinë e vendit, por Komisioni Qeveritar për Verifikim ende nuk i ka futur emrat e dëshmorëve në listën zyrtare të dëshmorëve të kombit. Prandaj edhe me këtë rast u kërkua nga Qeveria e Republikës së Kosovës dhe Komisioni Qeveritar për Verifikim që të aprovojë kërkesën për njohjen zyrtare të statusit të dëshmorëve të kombit edhe atyre të rënëve para luftës çlirimtare në Kosovë, thuhet në kumtesën e Komisionit të Familjeve të Heronjve dhe Dëshmorëve të Kombit (KFHDK)”, thuhet në njoftim.

Ish-nënkryetari i Kuvendit të Kosovës, Naim Maloku, ka thënë të dielën se pozita është duke e injoruar totalisht opozitën, kurse opozita ka ardhur në një situatë pa rrugëdalje.

Në një intervistë për “Epokën e re” ai i ka vlerësuar të tmerrshme pamjet që e kanë karakterizuar seancën e fundit të Kuvendit të Kosovës. Sipas tij, është dashur të pezullohet mbajtja e seancës dhe të insistohet për dialog në mes të pozitës dhe opozitës për të gjetur rrugëdalje.

“Sigurimi, policia, gjuajtja e gazit lotsjellës dhe shisheve me ujë kanë qenë pamje të tmerrshme. Skena të tilla askush nuk ka mundur t’i paramendojë në Kuvendin e Kosovës”, është shprehur Maloku.

Ndonëse me Rregullore të Punës së Kuvendit është e lejuar mbajtja e seancave edhe në ambiente të tjera, ai ka thënë se pa praninë e opozitës nuk mund të mbahen seancat.

“Pra, në raste të jashtëzakonshme, si tërmete, krizash dhe lufte, kur pamundësohet mbajtja e seancave, gjendet një alternativë. Me Rregullore është e lejuar mbajtja e seancave edhe në ndonjë ambient tjetër, por pa e thirrur opozitën nuk mund të mbahet seanca”, ka deklaruar Maloku.

Për tejkalimin e situatës aktuale Maloku ka thënë se nuk ka zgjidhje tjetër përveç dialogut. Ai i ka bërë thirrje presidentes Atifete Jahjaga që sërish të tentojë t’i bëjë bashkë liderët politikë.

“Mendoj se presidentja Atifete Jahjaga edhe një herë duhet të tentojë t’i ulë në tryezë të gjithë liderët, pavarësisht asaj që qëndrimet janë të ngurta. Nuk ka zgjidhje tjetër përveç dialogut politik, sepse pozicionet janë shumë të ngurta”, ka thënë Maloku. Ai ka bërë me dije se nënshkrimet e dy marrëveshjeve nuk mund të tërhiqen. “Edhe po të vijë qeveria tjetër nuk mund t’i tërheqë këto nënshkrime”, është shprehur Maloku.

Kurse sa i përket marrëveshjes me demarkacionin me Malin e Zi, ai thotë se opozita është ngutur.

“Fillimisht është dashur që kjo marrëveshje të shkojë në Kuvend. Jam i bindur se edhe deputetët e pozitës nuk do ta votonin”, ka thënë Maloku.

Shkuarjen eventuale në zgjedhje të reja Naim Maloku e sheh si zgjidhje.

“Paraprakisht të gjitha partitë politike duhet ta nënshkruajnë një marrëveshje se, pavarësisht rezultatit zgjedhor, do t’u nënshtrohen rregullave në Kuvend. Përndryshe, edhe po të vijë opozita aktuale në pushtet, atëherë edhe 20 deputetë nëse do të mbeten nga PDK-ja dhe LDK-ja, do të mund ta bllokonin punën e Kuvendit”, ka deklaruar Maloku. /Epoka e Re

Retorika e vazhdueshme e faktorit ndërkombëtar, që kërkon ndëshkimin më efikas të krimit të organizuar dhe korrupsionit në Kosovës, tani është bërë një refren i demoduar, i cili po dëgjohet me veshë kritikë nga shumica e analistëve politikë në vend, nga njerëz të opozitës, të cilët veç adresimit publik të këtyre dukurive negative në shoqëri, që vijnë si pasojë e kapjes afatgjate të shtetit nga të dy partitë aktuale në qeverisje, nuk po mund të ushtrojnë ndonjë ndikim tjetër efektiv në ndryshimin e gjendjes.

Është një bindje e përgjithshme e analistëve politikë dhe opozitës se tani është koha që kursi i faktorit ndërkombëtar të ndryshohet, që partive në pushtet t’u thuhet qartë se e kanë tepruar me qeverisjen e keqe të vendit, me kapjen e shtetit dhe kriminalizimin e institucioneve, dhe të mos i mbështesin më ato as edhe në një veprim të vetëm, por duke ndërruar kursin e tyre politik të mbështesin subjekte të tjera politike të pasprovuara deri tani në qeverisjen afatgjatë të vendit. Në këtë aspekt nuk duhet përjashtuar edhe ndonjë nismë të re qytetare.

Sipas opinionistëve të ndryshëm, ndërkombëtarët duhet të marrin për bazë faktin se PDK-ja ka mandatin e tretë në Qeverinë e Kosovës, sikur që edhe LDK-ja ishte gjithnjë në Qeveri, përveç në mandatin e kaluar. Pra, të dyja këto parti janë tejet të konsumuara nga pushteti shumëvjeçar dhe janë të korruptuara e të kriminalizuara. Ka ardhur koha që ato të hetohen e përballen me drejtësinë dhe jo të mbështeten nga ndërkombëtarët.

Njohësi i mirë i çështjeve politike, prof. Riza Smaka, ka pohuar se faktori ndërkombëtar, referuar qëndrimit të vet për pushtetarët aktualë në Kosovë, përfundimisht do të duhej të aplikonte një rishikim revidues në kontekstin e dukurive shoqërore politike dhe ekonomike, dukuri të dëmshme që janë pasojë e qeverisjes së dobët, qeverisje së keqe dhe inkompetente e mbi të gjitha tej mase të korruptuar.

“Pra, faktori ndërkombëtar në favor të interesit të qytetarit të vendit tonë do të duhej menduar më seriozisht dhe do të duhej të distancohej në masë të konsideruar nga papërgjegjësia politike e qeveritarëve, dhe kjo aq më parë, aq më mirë”, thotë Smaka.

Kurse, analisti tjetër, Blerim Burjani, thotë se PDK-ja dhe LDK-ja, me këtë koalicion, po zbatojnë interesat e tyre familjare dhe partiake, si dhe kanë përforcuar shtetin partiak, duke përfituar nga buxheti i shtetit.

“Bashkësia ndërkombëtare mund të vendosë kushte për përmirësim të nivelit demokratik të qeverisjes. Ajo tani ka prioritet sigurinë e qëndrueshme në rajon, të tjerat ua kanë lënë vendorëve. Tani për tani PDK-ja dhe LDK-ja, me këtë koalicion, po kryejnë punët e tyre dhe po zbatojnë interesat e tyre familjare dhe partiake, si dhe kanë përforcuar shtetin partiak, duke përfituar nga buxheti i shtetit”, thotë analisti Blerim Burjani. /Kosova Sot

Dy blloqet e barrikaduara, pushteti dhe opozita, e kanë ndarë mendjen. Ato nuk heqin dorë nga qëndrimet e tyre, seanca sërish thirret për javën tjetër edhe pse paralajmërohet se do të ketë sërish bllokadë. Kjo situatë shihet si ftesë për kaos nga të dyja anët.

Analistët thonë se Kuvendi i Kosovës nuk guxon edhe këtë javë të luajë me “zjarrin”, duke thirrur seancë të re për aq sa kohë palët (mazhoranca dhe opozita) vazhdojnë të jenë fortifikuara në “istikamet e tyre”.

Sipas tyre, në këtë situatë dramatike në të cilën është futur legjislativi duhet dhënë mundësinë presidentes së vendit, Atifete Jahjaga, që të vazhdojë më dialogun e nisur me palët me qëllim që të gjetjes së një zgjidhjeje për tejkalimin e kizës.

Analistët politikë konsiderojnë se vetëm përmes një dialogu mund të zhbllokohet Parlamenti.

Në anën tjetër, partitë e koalicionit janë të vendosura që t’i mbajnë seancat plenare, qoftë edhe në katin e katërt të Kuvendit, në salla të improvizuara, sikurse ndodhi javën e kaluar, siç thonë ata vetëm për të mos bllokuar proceset e Kosovës. /Zëri

Muhamet Bytyçi i VV-së në Malishevë, ka lëshuar një numër akuzash ndaj deputetit të LDK-së nga ky qytet, Salih Morina.

Ai po ashtu ia ka rikujtuar Morinës se si kërkonte vota për të luftuar SHIK-un, “ ndërsa tani e mbrojnë SHIK-un dhe Kadri Veselin”.
Bytyçi i e ka quajtur deputetin e LDK-së nga Malisheva me emrin Salih, ndërkaq me mbiemrin “Zajednica”.

Postimi i plotë i Muhamet Bytyçit në Facebook

Deputetet e LDK-së:

DJE shanin SHIK-un, SOT shajnë në mbrojtje të SHIK-ut.

Deputeti Salih Morina apo siç njihet tash me emrin e ri Salih ZAJEDNICA është përfaqësues i denjët i thënies së mësipërme. Ky deputet sot na risjell në kujtesën tonë do shërbëtorë të djeshëm të Rrahman Morinës.

Salih Zajednica po e mbrojnë me kaq zell Zajednicen dhe Demarkacionin dhe po i del në mbrojtje Kadri SHIK-ut me kaq përkushtim.

Ky deputet sot ka dal hapur kundër idealeve të UÇK-së, kundër vlerave dhe sakrificës për dekada të tëra të popullit shqiptarë për liri dhe vetëvendosje.

Salihu është damka e zezë e Malishevës. Të tillët si Salih Zajednica duhet shporrë nga Malisheva./PrizrenPress.com/