Gjykata Supreme e Kosovës ia ka kthyer ankesën një prokuroreje ndërkombëtare rreth rastit të kryetarit të komunës së Prizrenit, Ramadan Muja.
Prokurorja Judit Eva Tatrai ishte ankuar në supreme ndaj vendimit të Gjykatës së Apelit që ta kthejë në rigjykim rastin ndaj Mujës dhe pesë drejtorëve komunalë të Prizrenit.
Në komunikatë të lëshuar nga Gjykata Supreme thuhet se “ankesa është pranuar, por për shkaqe teknike është kthyer prapa”.
Gjykata Supreme është në pritje që prokurorja “ta kompletojë lëndën”.
“Njoftojmë opinionin se Gjykata Supreme, do ta formalizojë me një njoftim këtë apel që e ka adresuar prokurori ndërkombëtar, mirëpo, meqë Gjykata e Apelit e ka anuluar gjykimin e shkallës së parë dhe çështja është kthyer në rigjykim, ndaj aktvendimit të tillë nuk lejohet ankesë”, thuhet në komunikatë.
KALLXO.com ka raportuar të mërkurën se në këtë ankesë, Prokurorja ka kërkuar që Gjykata e Apelit ta rishqyrtojë lëndën e Mujës, por me një panel tjetër gjykatësish.
KALLXO.com ka siguruar ankesën e prokurores së EULEX-it, Judit Eva Tatrai, në të cilën thuhet se Gjykata e Apelit në thelb hodhi poshtë aktgjykimin e shkallës së parë dhe “nuk e ka shqyrtuar individualisht çështjen e ngritur në ankesat e mbrojtësve apo çështjet që përbejnë qëllimin e shqyrtimit ankimor”.